Laransehani Hakobu lituróbulin luma Esaú

Füramaseti Heowá lun Hakobu lóunigirubei lan ítara kei meha lóunigiruni Abüraámü luma Isaakü. Wínwanti Hakobu lidan aban fulasu gíriti Arán. Ñein lamarieida, larisida, gasaanigu ligía saragu.

Dan lárigiñe, aba lariñagun Heowá lun Hakobu: “Giribubá lageiroun búguchi”. Ábati lagumeseruni Hakobu lidise luéiyasun hama liduheñu. Ǘmada, aba hayabin fiu lumusuniña ariñaga lun: “Anitén Esaú le bíbugaña wabaroun hau 400 wügüriña”. Kei meha hanufude lan Hakobu luéi ladügün Esaú katei wuribati lun luma houn liduheñu, aba lafurieidun: “Heowá, adügabá fulesei nun, sefubána luéi níbugaña!”. Laruganbei, óunahati Hakobu idewesei lun Esaú: saragu mudún, gábara, bágasu, kameyu hama burigü.

Dan lerederunbei Hakobu lábugua guñoun ligía, aba larihin aban ánheli. Aba lagumeserun ánheli ligía ageindagua luma. Ageindaguatiña darí larugadun. Íbini bulesei lan Hakobu, sigiti ageindagua. Aba lariñagun ánheli ligía lun: “Ígiragüdabana”. Lariñaga Hakobu lun: “Uá, mígiragüdün nubadibu ánhana mabinirun ban”.

Ábati labiniruni ánheli Hakobu. Adügati lira lun lachoururuni Hakobu mígirunbei lan Heowá lun ladügün Esaú ni kata wuribati lun.

Binaafinbei, aba larihini Hakobu dísegiñe anite lan Esaú hau 400 wügüriña. Aba lidin habaragiñe liduheñu adunragua luma Esaú, dan layarafadúnbei lun, aba labuluchagun sedü wéiyaasu ligibugiñe. Ábati léibaagun Esaú óuburei Hakobu. Aba hayahuahan biángubei, ábayati buíduhali lan hanaagun houngua. Afiñetibu san gunda lan Heowá lau le ladügübei Hakobu?

Lárigiñe lira, giributi Esaú lúbiñoun, ánheinti Hakobu, aba lasigiruni luéiyasun. Dúusuñanu meha lisaanigu Hakobu: Rubén, Simeón, Lewí, Hudá, Dan, Nefütalí, Gadü, Aserü, Isakárü, Sabulón, Hosé luma Benhamín. Layusurubei meha Heowá Hosé, aban hádangiñe lisaanigu Hakobu, lun lesefuruniña lumutuniña. Busentibu basubudiruni ida liña lan ladügüni? Ariha waméi.