Aban idamuni gaganbaditi lun Bungiu

Aban meha hádangiñe lisaanigu Hakobu le amuleñein Hosé. Rútiña meha líbugañanu fe ligía lan hínsiñetimabei lun háguchi. Subuditi bun ida liña lan hasandiragun houngua? Aba hagimugadun lun iyereegu ligía houn. Luagu aban weyu, aba gewenedü lan Hosé fiu uénedü le úati kamani lan, ábati labahüdaguni houn líbugañanu. Saminatiña meha arufuda lan uénedü ligía lachülürüba lan aban weyu lun habuluchagun ligibugiñe. Ligía ábatima lubéi liyereegudun houn.

Luagu aban weyu, hóunigiruña meha líbirigu Hosé mudún yarafa lun uburugu Sikemü. Ábati lóunahani Hakobu Hosé arihei ida liña lan lidin houn. Dan le harihinbalin liabin dísegiñe, aba hariñagun: “Anitén labureme uénedü. Áfara waméi hilagubei”. Ábati hárügüdüni, da haméi lidoun aban fusu huliliti. Gama lumoun, aba lariñagun Hudá, aban hádangiñe líbugañanu: “Máfara huméi. Buítimati lun waluguruni idamunime”. Ani ligía hadügübei. Aba haluguruni luagu wein murusun pülata houn madianna ha ásügürübaña lau hebegidina Ehiptun.

Lárigiñe, aba hádarunu líbirigu Hosé ligounun lidoun lita aban gábara, ábati hanügünu lun háguchi, álügüda haméi: “Ma ligounun bisaani to?”. Aba lasaminarun Hakobu áfarala lan somu animaalu áraabuna Hosé, ábati lírudun saragu. Úati meha gayaraati líchugun gurasu lun.

Aba lagañeinhani aban úfisi gíriti Potifárü Hosé lun leseriwidun lun kei idamuni Ehiptu. Gama lumoun, anihein meha Heowá luma Hosé. Ruti Potifárü fe aban lan nadagimeinti buiti Hosé ani gayara lan lafiñerún luagu. Ábati líchuguni lun ligía lan ariha lau sun lumegen.

Ariha tumuti lani Potifárü weiriou magadiñe lan Hosé here ligía ani amuriahatu luma lóugiñe aban wéiyaasu lun larounrun tuma. Kati ladügübei Hosé? Máhati ani ábaha lariñagun tun: “Uá, wuribati lira! Afiñeti niyubudiri nuagu, ani lani weiriou buguya. Ánhana arounra buma, nafigouhaña ligibugiñe Bungiu”.

Aban weyu, aba touchun lani Potifárü weiriou tafosuruni Hosé lun larounrun tuma. Aba tárügüdüni tuéigiñe ladaüragun, gama lumoun aba láfuridun éibaagueina. Dan lachülürünbei Potifárü múnadoun, aba teyeeduni lau tariñagun lun áluga lan Hosé lafosurunu lun tarounrun luma. Aba lagañidun Potifárü, ábati ládaruni Hosé furisunrugun. Lau sun lira, mabulieidagunti Heowá luéi Hosé.