Rudu tuma Noemí

Dan meha ua lubéi éigini Ísüraeli, águyatu aban ísüraelina gíritu Noemí, tani weiriei hau bián tisaanigu Moabün. Dan lárigiñe, aba lounwen tani Noemí weiriei. Lárigiñe, aba lamarieidun aban tisaani tuma Rudu, le aban tuma Orufá, bián würiña moábüna. Híruti aba lan giñe hóunwegun tisaanigu Noemí.

Dan taganbunbei Noemí anihein yaali lan éigini Ísüraeli, aba tagiribudun tageiroun. Ñǘdüntu Rudu tuma Orufá tuma. Lidan üma, aba tariñagun Noemí houn: “Weiriou meha buítiña huguya houn nisaanigu, ídiñugu giñe buítiña huguya. Busentina lunya hamarieidun. Giribu humá Moabün”. Hariñaga tun: “Hínsiñetibu woun! Mígirun wabadibu”. Ariñagatu Noemí houn lóugiñe aban wéiyaasu lun hagiribudun. Ábagubei tagiribudun Orufá, ánhounti Rudu rédeitu. Tariñaga Noemí tun: “Giribuha Orufá tageiroun luma houn tubungiutegu. Beiba tuma, giribubá túbiñoun búguchu”. Tariñaga Rudu tun: “Mígirun nubadibu. Le bageira ligíaba nageira, le Bubungiute ligíaba Nubungiute”. Ma funa lueirin tugundan Noemí lau taganbunu Rudu ariñagei lira, adián?

Chülütu Rudu tuma Noemí Ísüraelin dan le lagumeserunbei lalubahóun sebada. Aban weyu, aba tidin Rudu abudaha ilaü lídangiñe le erederubei lidan lichari aban wügüri gíriti Boosu, le meha tisaani Raabü. Aganbati aban lan moábüna Rudu to arufuduboun úaraguni lau terederun tuma Noemí. Aba lariñagun houn ha nadagimeinbaña luma lun hígirun bandi ilaü lidan lichari lun tabudahani Rudu.

Rábounweyu ligía, aba tálügüdünu Noemí Rudu: “Ka ichari ídanbei bawadigimarida uguñe?”. Tariñaga Rudu tun: “Lidan lichari aban eyeri gíriti Boosu”. Ábati tariñagun Noemí tun: “Liduhe meha nani weiriei Boosu. Rédeiba nadagimein lidan lichari hama híbiri hiñaruñu nibureingiña. Masuseredunbei ni kata wuribati bun ñein”.

Nadagimeintu Rudu lidan lichari Boosu darí lagumuchun sebada. Ariha lumuti Boosu nadagimein tan Rudu saragu ani aban lan würi buitu. Lidoun burí dan ligía, anhein meha ounwe aban wügüri le masaaniti wügüriña, maríeiti meha liduhe tuma lani le hilaalibei weiriou. Ligía lamarieidunbei Boosu tuma Rudu. Aba gasaani hamá aban irahü gíriti Owedi. Ligíaba meha láruguti urúei Dawidi saragu irumu lárigiñe. Ma meha lueirin hagundan tumadagu Noemí. Ábati hariñagun: “Furumiñe, ru lumutu Heowá Rudu bun ani buíduti tóuserunibu, guenleti, ruha aban ibari bun. Alawahoualá Heowá”.