Úati araramuti hapurichihan

Sagü meha weyu lañuurun aban wügüri méibugunti arihadiha tubenari ténpulu. Aban rábounweyu, aba larihin méibugunti ligía anite lan Féduru luma Huan achülüreina tidoun ténpulu, ábati lariñagun houn: “Edeweha humá seinsu nun”. Aba lóunabun Féduru: “Gayaraati níchugun aban katei bun le buídutimati luéi seinsu. Lidan liri Hesusu, saraba, béibuga!”. Ábati líderaguni Féduru wügüri ligía iñuragua, aba lagumeserun éibuga. Dan le harihinbalin gürigia milaguru le, aba hagundaarun saragu, ábati hafiñerun saragu hádangiñe luagu Hesukrístu.

Ánhañati fádirigu hama saduséugu aba hagañidun. Aba hárügüdüniña apostolugu, ábati hanügüniña ligibugiñoun Liñun-agei lúrudu, le ídanbei haguseragüda lábutigu relihión, ha álügüdübaliña: “Ka úmagiñe hibiha ubafu lun hareidaguagüdüni wügüri le?”. Ábati lóunabuniña Féduru: “Hesukrístu, wügüri le meha háfarubei hilagubei, ligía íchugubalin ubafu le woun”. Aba hagúaragun lábutigu relihión ariñaga: “Hebé hadimurehan luagu Hesusu!”. Aba hariñagun apostolugu: “Mosu wayanuhan luagu. Siñati wámanichun”.

Lárigiñe ligiragüdǘniwa Féduru luma Huan, aba houdin furesegueina abahüdaguei sun le asuseredubei houn ha híbiri disipulugu. Aba hafurieidun sun hagía: “Heowá, íderaguabawa lun ganigi wamá sigí wamaamuga ayanuha buagu”. Ruti Heowá sífiri sandu houn, ábati hasigirun apurichiha luma areidaguagüda sánditiña. Eibu dan gíbetima hamá gürigia afiñerutiña. Wéiriti meha hagimugan saduséugu houn apostolugu darí lun hádaruniña furisunrugun. Óunahati Heowá aban ánheli áriebu ligía lun ladararuni tubenari furisun ani ariñagati houn apostolugu: “Héibaaya apurichiha ténpulurugu”.

Laruganbei, aba lariñawagúniwa houn lílana Liñun-agei lúrudu: “Daruñu liña wadarirunu furisun, ánhañati wügüriña ha hádarubaña ñeinhin úaaña ñein! Añahein apurichiha ténpulurugu!”. Ábaya hanügǘniwa apostolugu ligibugiñoun Liñun-agei lúrudu. Aba lariñagun fádiri le íñutimabei houn: “Ma san rúhadiwa gumadi hun lun masigirun humá ayanuha luagu Hesusu?”. Ábati lóunabun Féduru: “Mosu gaganbadi wamá lun Bungiu keisi warúeite lubaragiñe wadügüni le hariñagubei gürigia”.

Wéiriti meha hagañi lábutigu relihión darí lun busén hamá háfaruniña apostolugu hilagubei. Ábati lararamun aban fariséu gíriti Gamalieli, lariñaga: “Góunigi humá! Háfuga anihein lan Bungiu hama wügüriña ha. Mabusenruntün hageindagun luma Bungiu, adián?”. Adügatiña gasu. Aba hígiragüdüniña, lau sun rugua hamá wewe hawagu furumiñe, ábayati hariñagun houn lun hebé lan hapurichihan. Íbini ítara, meredeti hapurichihan apostolugu. Sigitiña apurichiha lau ganigi ténpulurugu luma tidan burí muna.