Lafurendeiruni aban óunigiruti inarüni

Anuhein meha aban idamuni nibureingiru Filipu, to meha gabafuboun lun tegesihan luagu le lunbei lasuseredun ladüga anihein lan meha aban sífiri wuribati tidan. Ítara, adügatu lun hagañeirun taburiña saragu seinsu. Dan le lachülürünbei Pábulu luma Sílasi Filipu, aba téibugun hárigi le ñeinhin lumuti houdin luagu bandi weyu. Adügati sífiri wuribati ligía lun tagúarahan: “Heseriwiduña eyeriñu ha lun Bungiu le Suntigabafu”. Lagumuhóun, aba lariñagun Pábulu lun sífiri wuribati ligía: “Lidan liri Hesusu, ariñagatina bun lun báfuridun tídangiñe!”. Ábati láfuridun sífiri wuribati ligía tídangiñe.

Dan le híchugunbei taburiña nibureintu tuguya fe siñaali lan hagañeirun seinsu tau, aba hagañidun saragu. Barǘ hamuti Pábulu luma Sílasi aduruuheina hamoun gumadimatiña, hariñaga houn: “Maganbaditiña wügüriña ha lun lúrudu, hadügüña lun hachagaragun lílana uburugu!”. Aba híchugun gumadimatiña gumadi lun labeichúniwa Pábulu luma Sílasi luma lun hadarún furisunrugun. Ábati líchuguniña óunigiruti lidoun fulasu le búrigatimabei turageirugu furisun, aba giñe ládaruni háhabu luma hagudi lidoun burí huyu le luágubei aban murusun fulansu o tonpu wewe.

Aba leremuhan Pábulu luma Sílasi lun halawahani Heowá, ábati haganbahaniña ha híbiri adaürǘtiña. Sódini, lamidangua áriebu, aba lánhingichunu aban hárabaganali héreti furisun. Aba ladaarun sun bena, farara ligía sun güringüri haweigiñe adaürǘtiña luma tonpu wewe. Beluti óunigiruti éibaagueina furisunrugun, ábati larihini daragu liña lan sun tubenari. Kei samina lan anuraha lan adaürǘtiña, aba lasagarunu lefeinte lun yebe láfaragun lungua.

Ouraméme ligía, aba lagúaragun Pábulu lun: “Máfaraguaba bungua! Awanha súngubei ya!”. Éibaaguati óunigiruti le ñeinhin lubéi Pábulu luma Sílasi, ábati lachüüragun lungua lubadun hagudi. Aba lálügüdüniña: “Ka lunbei nadügüni lun nasalbarun?”. Hariñaga lun: “Lunti bafiñerun luagu Hesusu hau sun tílana buban”. Ábati larufudahan Pábulu luma Sílasi houn luagu lererun Heowá, aba labadiseirun óunigiruti hau sun tílana luban.