Arufudúni le larihibei Huan

Dan meha ladaürǘña lubéi apostolu Huan lidan ubouhu le gíribei Pátümosu, adügati Hesusu lun larihin 16 arufudúni luáguti le lunbei lasuseredun ámuñegü. Lidan burí arufudúni ligía, ariha lumuti Huan ida luba lan inebewa lan liri Heowá, liabin Larúeihan luma ladügǘn lugundan ubouagu kei ladügǘniwa sielu.

Lidan aban arufudúni, ariha lumuti Huan Heowá luagu luéirigun lálana larúeihan sielu hama 24 wéiyaaña mutu geyegu lau. Harutu hadaüragun ani ñeinñein ridi lauti golu hábulugu. Luéigiñe lálana arúeihani ligía áfurihati igemeri le ítarabei kei labirihaniga, aganbúa ligía kamá hamuga lamuri wayuhuru ñéingiñe. Buluguatiña 24 wéiyaaña mutu hagía ligibugiñe Heowá lun háhuduragun lun. Lidan amu arufudúni, arihati Huan saragu gürigia ha lídangiñetiña sun néchani, rasa luma iñeñein áhuduragua lun Heowá. Góunigi lumutiña Mudún, lememe Hesusu, adundeha laña larun duna le íchugubei ibagari. Lárigiñe, lidan amu arufudúni, gumeseti Hesusu arúeiha keisi Urúei sielu úara hama 24 wéiyaaña mutu. Lidan le aban arufudúni, ariha lumuti Huan Hesusu awuribuha luma düragón, lememe Satanási, hama lumafianu. Bugá lumutiña Hesusu siélugiñe, ábati lachüürüniña ubouagun.

Lárigiñe, arihati Huan aban lubuidun arufudúni le ídanbei larihúa Mudún hama 144,000 anuadirúaaña rara lábulugu wübü le Sión. Arihati giñe aban ánheli áhamaha geyegu lau sun ubóu, ariñageina: “Inebelá Bungiu hun, ru huguyame uéiriguni lun”.

Lidan amu arufudúni, arihúati lageindawagun wuribu le gíribei Arümahedón. Lidan wuribu ligía, gañei lumutiña Hesusu hama lisudaranigu lílana ubóu le lábugiñebei lubafu Satanási. Lidan lagumuhóun arufudúni, arihati Huan anihein lan úarani luma darangilaü dandu sielu kei ubouagu. Günringua lumuti Heowá Satanási hama sun ha afalarubalin. Inebeti liri Heowá dandu houn sun ha siélubaña kei houn ha ubouagubaña, ani lúnrügüñein háhuduragua.