LEKSIÓUN 18

Ru humá ariñahani le huuti houn gürigia

1 Korintuna 9:19-23

LE LUNBEI HADÜGÜNI: Adüga humá lun hasaminarun gürigia ha aganbubalün; lunti hasandirun furendeihaña lan katei le gayaraati lahuudun houn.

Gabaroun huméi le subudi hamaalibei gürigia. Magufurumada humá láurügü hariñagun katei le aganbañaha hamaali gürigia, íderagua humaña afurendeira somu katei iseri lídangiñe.

Málüda humá ayanuha luagu burí katei le subudi hamaalibei gürigia ani gibetimalá dan hadireirun lun hayanuhan luagu iseri katei le gayaraabei lafurendeirúniwa lídangiñe.
Direi humá dan lun háluahan ariñahani luma lun hararamagun asaminara. Anhein gayara, ru humá ariñahani le lóuguati lasubudirúniwa o sügǘ burí le málügili lúmagiñe lasuseredun lun hafuranguagüdün somu puntu súdiniti. Samina humá buidu luagun puntu ligía luma ida liña lan lúaradun luma ariñahani le uágubei habusenra hayanuhan.

Danme hakutihani ariñahani, adüga humá álügüdahani kéiburi le húniwagua: katei? ka uagu?, ídabuga?, halía?, ka gürigia?, ida? Adüga humá lun gíbetima lan buiti asagarúti lídangiñe harufudahan lau hadaagun álügüdahani ani óunabeina huméi.
Arufuda huméi ida luba lan layusuruni gürigia le lafurendeirubei lidan libagari. Afuranguagüda huméi ka lan lunbei hadügüni gürigia lun lahuudun adundehani tídangiñeti Bíbülia houn lidan habagari sagü weyu. Írida humá burí sügǘ, igaburi luma dasi le subuditi houn.