Ka uagu lunti lubéi wetenirun lun ligaburi wasansiragun?

Hínsiñeti houn sun gürigia lun hanúadiruni ida luba lan hasansiragun luma haranseragun houngua. Ánhawa afalara fiu adundehani tídangiñeti Bíbülia, gayaraabei wasansiragun kei aubei línsiñeda woun sun awanha lan agundaaragüdei Heowá. Ariha wamá fiu lídangiñe adundehani le.

1. Ka adundehani tídangiñeti Bíbülia gayaraabei líderaguniwa anúadirei ida luba lan waranseragun woungua?

Lunti “hadaüragun [kristiánugu] keisi lubudubu”, lunti giñe haruma lan haríawagun keisi gürigia “ha deregeguaañabaña houngua lun Bungiu” (1 Timotéu 2:9, 10). Teni humá lun gádürü adundehani lídangiñeti bérusu le: 1) Lunti wasansiragun “keisi lubudubu”. Kei harihini lidan burí adamuridaguni, ámuñegueinarügüti ligaburi hadaüragun lumutuniña Heowá, lau sun lira, arufuda lumuti ligaburi wasansiragun luma ligaburi waranseruni wádiburi inebe lan Bungiu le unbei wáhuduragua woun. 2) Dan le wasansiragun, moun lumuti wadaürün daüguaü to murutu o to adügütu lun haríaguniwa gürigia luma lun liábingua liwiye saminaü hachügüwagun. 3) Arufudatiwa lubuidun igaburi dan le mafalarun wamani iseri ligaburi hadaüragun gürigia. 4) Lunti larufuduni ligaburi wasansiragun gürigia lan “ha deregeguaañabaña houngua lun Bungiu” wagía, ménrengun láamuga larihíniwa lun lan Bungiu le inarünibei wáhuduragua (1 Korintuna 10:31).

2. Ka uagu lunti lubéi wasaminarun hawagun wábirigu dan le wanúadiruni kaba lan wadaüra?

Lau sun garicha wamá lun wanúadiruni kaba lan wadaüra, lunti wasaminarun luagun ida luba lan hasandiragun amu houngua lau ligaburi wasansiragun. Adüga wamuti sun wayaraati lun ua lan asandiraguti lungua wuriba lau ligaburi wasansiragun. Falá waméi adundehani le: “Kada aban wádangiñe, lunti lagundaaraguagüdüni gürigia líledi lau le buídubei lun gürigia ligía, luma lau le gayaraati laganwoundagüdüni lafiñen” (aliiha huméi Rómana 15:1, 2).

3. Ida luba ladügün ligaburi wasansiragun lun busén hamá gürigia hasubudiruni Heowá?

Lau sun áfaagua wamá lun wasansiragun keisi lubudubu súnwandan, ténitimatiwa lun ligaburi wasansiragun dan le woudin adamuridagua luma dan le wáfuridun apurichiha. Mabusenrúntiwa hamuga lun hetenirun gürigia lun ligaburi waríawagun lubaragiñe hetenirun lun uganu buiti le wanügübei houn. Lubaragiñe lira, busentiwa ladügün ligaburi waríawagun lun busén hamá gürigia lun hasubudiruni Bungiu le unbei weseriwida luma lun harihini luagu “buidu lan arufudahani le luáguti Bungiu le Wasalbaragüle” (Titu 2:10).

SIGÍ HUMÁ AFURENDEIRA

4. Arufudatiwa inebesei lun Heowá dan le buidu lan ligaburi waranseragun woungua

Kátima uagu lunti lubéi webereserun lau ligaburi waríawagun? Aliiha huméi Sálumu 47:2, ábameti hayanuhan luagu álügüdahani burí le:

• Ka lánibei ligaburi wadaüragun luma ligaburi harihini gürigia Heowá, Bungiu le unbei wáhuduragua?

• Saminatün san lunti lan berese wamá lau ligaburi wasansiragun dan le woudin adamuridagua luma dan le wapurichihan? Ka uagu hasaminara ítara?

5. Kaba íderaguawa lun buidu lan wanúadirunu wadaüragun luma ligaburi waranseragun woungua?

Ariha huméi BIDÉU.

BIDÉU: Adüga huméi sun katei “lun híchugun uéiriguni lun Bungiu” (10:18)

Mámaba lun átiri lan tuagu daüguaü wetenira, lubaragiñe lira, lunti wáfaagun lun haruma tan luma lun gadünama tan lun kada ókaasion. Aliiha huméi 1 Korintuna 10:24 luma 1 Timotéu 2:9, 10. Lárigiñe, ayanuha humá luagu ka lan uagu moun lumuti lubéi wayusurun daüguaü to...

• ... mechenbelegutu o chafitu.

• ... murutu, to arufudubalin wágubu o to adügütu lun liábingua liwiye saminaü houn amu gürigia.

Lau sun mámañadiwa lan lábugiñe Lilurudun Moisesi, arufuda lumuti lúrudu le woun ka lan lasaminarubei Heowá. Aliiha huméi 2 Lúrudu 22:5, ábameti hayanuhan luagu álügüdahani le:

• Ka uagu mabuidun lubéi lun tadaürünu würi ladaüragun wügüri ni lun ladaürünu wügüri tadaüragun würi?

Aliiha huméi 1 Korintuna 10:32, 33 luma 1 Huan 2:15, 16, ábameti hayanuhan luagu álügüdahani burí le:

• Ka uagu lunti lubéi wáfaagun lun masandiragun hamá íbirigu hama gürigia ha awinwandubaña lidan fulasu le ñein lubéi wawinwanda houngua wuriba lau ligaburi wasansiragun?

• Ida liña hadaüragun luma haranseragun gürigia houngua lidan fulasu le ñein lubéi hawinwanda?

• Anihein funa san lídangiñe ligaburi asansiraguni ligía le madünamati houn kristiánugu? Ka uagu?

LE HAFURENDEIRUBEI

Arufudatiwa inebesei lun Heowá luma houn amu dan le buidu lan wasansiragun luma waranseragun woungua.

Águyuguagüdüni

• Ka uagu berese lubéi Heowá lau ligaburi waranseragun woungua?

• Ka adundehani tídangiñeti Bíbülia gayaraabei líderaguniwa anúadira buidu libügürü ligaburi waranseragun woungua?

• Ka lánibei ligaburi waríawagun luma ligaburi harihini amu áhuduraguni inarüniti?

FURENDEI HUMÁ LANWOUN

Samina humá luagun ka lan hasaminarubei amu huagu dan le harihini ligaburi hasansiragun.

“Ka hasaminarubei amu huagu dan le harihini ligaburi hasansiragun?” (Ariñahani lídangiñeti jw.org)

Ariha huméi ka lan uagu lunti lubéi hasaminaruni buidu lubaragiñe hadügagüdün dibuhu luagu hura.

“Ka tariñagubei Bíbülia luagu hadügagüdün gürigia dibuhu luagu hara?” (Ariñahani lídangiñeti jw.org)

Ariha humá amu adundehani tídangiñeti Bíbülia le gayaraabei líderagunün anúadira buidu.

“Ruti san ligaburi wasansiragun uéiriguni lun Bungiu?” (Garüdia Awisahatu, nefu-hati, irumu 2016)

Ka íderagubarun aban würi haruma tanigi ánhara lun ligaburi haranseragun amu houngua?

“El arreglo personal era mi piedra de tropiezo” (¡Despertad!, to lánina 22 lidan duusu-hati, irumu 2003)