ARUFUDAHANI 54
Katei san “musu úaraguati ani gunfuranda ligía” ani ka luadigimaribei?
Hesusu lichügüdinabei damuriguaü (Éfesuna 5:23). Uguñe weyu, yusu lumuti Hesusu “musu úaraguati ani gunfuranda ligía” lun ladundehaniña lánigu ha ubouagubaña lúmagiñe siélugiñe (aliiha huméi Matéu 24:45). Hesukrístu guánarügü íridubalin “musu” le ani rúhali murusun ubafu lun. Lau sun lira, mosu gaganbadi lan musu le lun Kristu, seriwi ligíame houn líbirigu Kristu. Katei san musu le? Ida liña lóunigiruniwa?
1. Katei san “musu úaraguati ani gunfuranda ligía”?
Súnwandan layusurun Heowá somu wügüri o somu sétanu wügüriña lun ladundehaniña lumutuniña (Malakíasi 2:7; Ebüréu 1:1). Kei hénpulu, lárigiñebei lounwen Hesusu, apostolugu meha hama wéiyaaña lidan afiñeni ha Herusalénbaña adundehabalin damuriguaü (Adügaü 15:2). Kei meha ladügǘn lidan dan ligía, uguñe weyu, aban liraüraü sétanu hani wéiyaaña lidan afiñeni—Sétanu le Arihibei lau Hawadigimari Gefentiña luagu Heowá lidan sun Ubóu—íchugubei ariñahani lúmagiñeti Bungiu woun ani adundehalei apurichihani. Hagía lílanabaña “musu úaraguati ani gunfuranda ligía, le lígirubei [Hesusu le] liyubudiri lun larihin hau ha lúbiñebaña” (Matéu 24:45a). Kristiánugu anuadirúaaña lau sífiri sandu sun lílana musu úaraguati ani agurabatiña danme lan lásurun habagari ya ubouagu, harúeihaba lan úara luma Kristu lidan Larúeihan sielu.
2. Ka ariñahani lúmagiñeti Bungiu líchugubei musu úaraguati woun?
Ariñagati Hesusu lunba lan musu úaraguati lichugúa dasi “lun líchugun éigini houn [ha híbiri kristiánugu] lidan dan” (Matéu 24:45b). Ítara kei adüga lan éigini lun here wamá luma lun masandirun wamá, ru lumuti giñe ariñahani lúmagiñeti Bungiu—le asagarúbei tídangiñe Lererun—erei le wemegeirubei woun lun úaragua wamá lun Heowá luma lun wagunfuliruni dasi le ru laalibei Hesusu woun (1 Timotéu 4:6). Resibi wamuti ariñahani lúmagiñeti Bungiu le lidan burí adamuridaguni, adamurini, tídangiñe agumeiraguagüdüni luma burí bidéu le asagarúbei tídangiñe Bíbülia. Íderagua lumutiwa sun katei le lun gunfuranda wamani le labusenrubei Heowá luma lun buídutima lan wamadagua luma.
SIGÍ HUMÁ AFURENDEIRA
Warihaali ka lan uagu megei wabalin “musu úaraguati” o Sétanu le Arihibei lau Hawadigimari Gefentiña luagu Heowá lidan sun Ubóu.
Ruti musu úaraguati ariñahani lúmagiñeti Bungiu luma adundehani houn gefentiña luagu Heowá ha lídanbaña sun ubóu.
3. Mosu ñein lan aransehani buiti tidan lóundarun Heowá
Adundeha lumuti Hesusu Sétanu le Arihibei lau Hawadigimari Gefentiña luagu Heowá uguñe weyu. Ítara liña meha giñe lasuseredun lidan burí damuriguaü kristiánu le lánina furumiñeti sígulu. Ariha huméi BIDÉU.
Aliiha huméi 1 Korintuna 14:33, 40, ábameti hayanuhan luagu álügüdahani burí le:
Arufudati san bérusu le busén lan Heowá lun ñein lan aransehani buiti hadan lánigu gefentiña? Ka uagu hasaminara ítara?
4. Adügati musu úaraguati aransehani lun wagunfulirun lau dasi lánina apurichihani
Lúntima meha apurichihani hetenira furumiñetiña kristiánugu. Aliiha huméi Adügaü 8:14, 25, ábameti hayanuhan luagu álügüdahani burí le:
Kátaña meha san adundehabalin apurichihani lidan furumiñeti sígulu?
Ka meha ladügübei Féduru luma Huan lau adundehani le meha heresibirubei hámagiñe ha híbiri apostolugu?
Lúntima dasi le lánina apurichihani letenira musu úaraguati. Ariha huméi BIDÉU.
Arufuda lumuti meha Hesusu lunti lan letenirún lun apurichihani. Aliiha huméi Márükosu 13:10, ábameti hayanuhan luagu álügüdahani burí le:
Ka uagu weiri lubéi lisudinin apurichihani lun musu úaraguati?
Ka uagu megei wabéi lun ladügün “musu úaraguati” aransehani lun lapurichihóun lidan sun ubóu?
5. Adundeha lumutiwa musu úaraguati
Adundeha lumutiña musu úaraguati kristiánugu lidan sun ubóu. Ida liña lanúadiruni kaba lan adundehani líchiga? Ariha waméi ida liña lan meha hadügüni wéiyaaña lidan afiñeni ha adundehabaliña kristiánugu lidan furumiñeti sígulu. Aliiha huméi Adügaü 15:1, 2, ábameti hayanuhan luagu álügüdahani burí le:
Ka meha katei ídanbei múaran hamá fiu kristiánugu lidan furumiñeti sígulu?
Ka umoun lidin Pábulu, Berünawé hama amu kristiánugu lun laransehóun turobuli le?
Aliiha huméi Adügaü 15:12-18, 23-29, ábameti hayanuhan luagu álügüdahani le:
Ka hadügübei ha meha arihibaña hau lumutuniña Bungiu lidan furumiñeti sígulu lun hígirun lun Bungiu lan adundehaña lidan le lunbei hanúadiruni? (Ariha huméi bérusu 12, 15 luma 28).
Aliiha huméi Adügaü 15:30, 31 luma 16:4, 5, ábameti hayanuhan luagu álügüdahani burí le:
Ida liña hasandiragun furumiñetiña kristiánugu houngua dan le heresibirunbalin adundehani le hóunahabei wéiyaaña lidan afiñeni ha meha arihibaña lau hawadigimari lidan dan ligía?
Ida liña wasubudiruni biní lani Heowá haganbadi?
Aliiha huméi 2 Timotéu 3:16 luma Santiagu 1:5, ábameti hayanuhan luagu álügüdahani le:
Ka hadügübei lílana Sétanu le Arihibei lau Hawadigimari Gefentiña luagu Heowá uguñe weyu lun heresibiruni adundehani le hemegeirubei dan le lunti lan hanúadiruni kaba lan adügǘwa?
LE HARIÑAGUBEI FIU GÜRIGIA: “Wafalaruña wügüriña dan le gaganbadi wamá lun musu úaraguati”.
Ka achoururagüdübalin hun Hesusu lan adundehabalin musu úaraguati?
LE HAFURENDEIRUBEI
Sétanu le Arihibei lau Hawadigimari Gefentiña luagu Heowá, ligía “musu úaraguati ani gunfuranda ligía” le lanúadirubei Kristu. Ruti musu le adundehani luma ariñahani lúmagiñeti Bungiu houn kristiánugu ha lídanbaña sun ubóu.
Águyuguagüdüni
Ka anúadirubalin “musu úaraguati ani gunfuranda ligía”?
Ida liña lóunigiruniwa Sétanu le Arihibei lau Hawadigimari Gefentiña luagu Heowá lidan sun Ubóu?
Afiñetün san Sétanu lan le Arihibei lau Hawadigimari Gefentiña luagu Heowá lidan sun Ubóu músubei “úaraguati ani gunfuranda ligía”?
FURENDEI HUMÁ LANWOUN
Ariha huméi ida liña lan laransehan musu úaraguati lun lagunfulirun lau dasi le ichugúbei lun.
Ariha huméi ka lan ladügübei musu úaraguati lun lachoururuni gayara lan lafiñerúniwa luagu ariñahani lúmagiñeti Bungiu le weresibirubei.
Ka hasaminarubei lílana musu úaraguati luagu dasi le ru laalibei Hesusu houn?
Ida liña larihíniwa lidan burí adamuridaguni luma adamurini Heowá lan adundehabalin musu úaraguati?