ADÜGA HUMÁ DISIPULUGU
ARUFUDAHANI 11
Menrengunlá ligaburi harufudahan
Adundehani tídangiñeti Bíbülia: “Ánhawa mariñagun dimurei le gayaraati gunfurandawa lan, ida lubagia lasubudirúniwa ka lan wariñagubei?” (1 Ko. 14:9).
Le meha ladügübei Hesusu
1. Ariha huméi BIDÉU o aliiha huméi Matéu 6:25-27. Ábameti hasaminarun luagun álügüdahani burí le:
Ka hénpulu layusurubei Hesusu lun larufudahan góunigi lániwa Heowá?
Lau sun meha subudi lan Hesusu saragu katei hawagu dunuru, ka uagu layanuha luagu katei burí le kamanibei hawagu? Ka uagu buidu lubéi larufudahan ítara?
Ka wafurendeirubei lúmagiñe Hesusu?
2. Ánhawa ayanuha lidan aban igaburi le ménrengunti gunfurandawa lan, haritagubei gürigia le warufudahabei houn ani wachülürüba tidoun hanigi.
Áyeiha huméi Hesusu
3. Madimureha humá saragu. Mafuranguagüda huméi lun aturiahati sun le hasubudirubei luagu aban tema. Lubaragiñe lira, teni humá lun ariñahani le áfuachubei tidan agumeiraguagüdüni to haturiahaboun. Danme le hadügün aban álügüdahani lun aturiahati, agurabaha humá lau gaguraasuni lun lóunabunün. Ánheinti ibidiñe lubéi óunabagülei lun o lariñagun aban katei le múaranti luma le tarufudahabei Bíbülia? Adüga humá amu burí álügüdahani lun lun híderaguni asubudirei ka lan óunabagülei buídubei. Anhein gunfuranda laali lubéi aturiahati arufudahani ligía, sügǘ humá lidoun le aban.
4. Yusu huméi le subudi láalibei aturiahati lun híderaguni gunfurandei iseri burí katei le afurendeireina lubéi. Kéiburi hamuga anhein hagumeseruña lubéi afurendeira luagu águyuguni, gayaraati háguyuguagüdüni le furendei láalibei aturiahati luáguti le asuseredubei woun dan le wóunwegun.
5. Anúadira huméi hénpulu le lunbei hayusuruni buidu. Lubaragiñe hayusurun aban hénpulu, álügüdagua humá hungua:
“Ménrengunbei san gunfurandawa lan hénpulu le?”.
“Gunfuranda lubéi san aturiahati?”.
“Gayaraabei san laritaguni le nabusenrubei nafuranguagüdün lun o hénpulurügübei laritagua?”.