Libiaman álügüdahani: Kaba san asusereda nun ánhana ounwe?

IRAHÜGILI meha Roman dan le lóunwenbei aban lumada dan le tabuguchunbei karü lau. “Adügati lounwen numada lun nanufudedagun saragu, ani sügüti saragu irumu nau ítara, —liña—. Másuti nálügüdagun nungua ka lan funa asuseredubei woun dan le wóunwegun.”

Ka lébunabei hadügüni gürigia álügüdahani le?

Hénrenguti houn sun gürigia hánharun lun óunweni. Meberesenga átirihali lan dan hau awinwanda, úati gürigia busenti lounwen. Íbini lun añahein lan gürigia hanufudetiña luéi le asuseredubei lárigiñe óunweni.

Ka óunabagülei híchugubei fiú gürigia?

Ariñagatiña saragu gürigia anihein lan somu katei lidan gürigia erederuti wínwanñu lárigiñe lounwen. Afiñetiña ibiha hamá gürigia ha buídubaña ibagari sielu keisi afayeiruahaü, ánheinti ha wuribabaña óunahouatiña lun súnwandan máfiougatin keisi abeichúni. Añahein giñe ariñagutiña aban lan lagumuchagun gürigia le óunwebei sunsuinagubei ani lau lan lásügürün dan aba labulieidúniwa.

Ka lanagangiñebei óunabagülei le?

Aban lídangiñe óunabagülei le adügati lun lasaminarúniwa luagu móunwegun hamá gürigia sunsuinagubei, le aban óunabagülei adügati lun lasaminarúniwa masuuni lan ibagari. Gürigia ha afiñebaña masuuni lan ibagari gumesetiña arufudei igaburi lánina “hou wamá, gurá wamá, lugundun haruga wóunwegun” (1 Korintuna 15:32).

Ka tarufudahabei Bíbülia?

Merederun lan ni kata wínwanñu lárigiñe lounwen gürigia. Adügati Bungiu lun labürüdüni urúei Salomón dimurei burí le: “Ha [...] wínwangiñabaña subudi hamuti luagu hóunweguba lan, ánhaña ha hilaañabaña ibidiñeti ni kata houn” (Apurichihati 9:5). Gürigia ha únbaña ‘ibidiñe lan ni kata’ míchutiña fe luagu le asuseredubei geyegu hau, ligíati siñá lubéi hasandirun ni hadügün ni kata. Ligía siñá lubéi híderaguniña ha wínwangiñabaña siñá ligía hadügün damichi houn.

Gíbetiña gürigia saminatiña adüga lániña Bungiu gürigia lun hóunwegun. Gama lumoun iyeeni lira. Lun lawinwandun Adán, le furumiñeti wügüri, lun súnwandan ubouagu ladügei Bungiu. Ábanrügüñein meha wéiyaasu ladimurehan Heowá lun Adán luagu óunweni: dan le lariñagunbalin lun kaba lan abeichúni libiha anhein eiga tídangiñe tin aban tídangiñe tídibu wewe to lídanboun fuluri-agei. “Ninarün bau bóunweba”, liña leweridiruni (Agumesehani 2:17). Anhein hamuga meha gaganbaditi Adán tuma Ewa lun Bungiu, hawinwanduña hamuga lun súnwandan ubouagu dandu hagía kei hadügawagun ha úaraguatiña lun Bungiu.

Gama lumoun, madügünti Adán gasu: aba lafigouhan dan le maganbadi lubéi lun Bungiu, barüti katei le óunweni lun kei resultóu (Rómana 6:23). Úati ni kata lídangiñe Adán erederuti wínwanñu lárigiñe lounwen. Gumuguarügüti Adán. Ariñagaali meha Bungiu lun: “Bagañeiruboun beigan fein lau lárouga bun, darime bagiribudun bárigoun lidoun múa le aubei badügǘwa, lídangiñe múa badügǘwa basaliraguayaba múame” (Agumesehani 3:19). Kei ladügawagun lubéi Adán sun gürigia, galagante wamuti figóu luma óunweni lúmagiñe (Rómana 5:12).

Íbini ítara, mararamun lubéi lumaganbadin Adán lagunfuliruni Bungiu lisuuni. Busenti meha lun labuinchun ubóu hau gürigia mafigountiña ha ladügawagun Adán, ani ítara luba (Agumesehani 1:28; Isaíasi 55:11). Málühali Heowá adüga lunya habagaridun hibe-agei gürigia ha hilaguaañabaña. Ítara kei lariñaguni apostolu Pábulu, “lásaaragüdübaña [Bungiu] [...] hilaaña, dandu ha buídubaña kei ha wuribabaña [o marichatiña]” (Adügaü 24:15).

Roman, le buga uágubei wadimureha, aba laturiahanu Bíbülia luma le tarufudahabei libügürü óunweni luma luagu Bungiu.

Hadariruba lanwoun ariñahani libügürü le asuseredubei lárigiñe óunweni lidan kapítulu 6 tidan líburu Kátima san tarufudahabei Bíbülia? Gayarati hasagaruni lídangiñe páhina lánina Internet www.jw.org/cab

Ka meha larufudahabei Hesusu libügürü óunweni?

Lau sun meha mafiñe hamá fiú lábutigu relihión luagu águyuguni lidaaniwagu Hesusu, múaradunti hama lidan ligaburi hasaminan (Lúkasi 20:27). Marufudahanti giñe anihein lan somu katei hadan gürigia le erederuti wínwanñu lárigiñe hounwen. Kati larufudahabei Hesusu?

Konpararü lumuti óunweni luma arumuguni. Dan le lóunwenbei Lásaru, ariñagati Hesusu: “Arumuga wamada Lásaru, néibuga agagudahei”. Kei ua lubéi gunfuranda hamani lani disipulugu ka lan labusenrubei lariñagun, aba hariñagun lun: “Máisturu, anhein arumuga lubéi, lareidaguárügü liña”. Según tabahüdaguni Bíbülia, ladimurehaña meha Hesusu “luagu hilá lan Lásaru, haritagunti disipulugu luagu lan furumiñeguarügü arumuguni ladimureha. Ábati lariñagun Hesusu houn, furangu: ‘Hilá Lásaru’” (Huan 11:11-14).

Ariñagati háguyuguba lan hilaaña. Dan le lachülürünbei Hesusu lageira Lásaru, sügühali gádürü weyu lúmagiñe lounwen Lásaru. Lun líchugun dǘgüdaguaü tun Marta to litu Lásaru, aba lariñagun Hesusu tun: “Láguyuguba bamulen”. Lárigiñe, aba ladügüni füramasei wéiriguti le: “Au águyugunibei, au ibagari. Le afiñeti nuagu, íbini lounwen, labagaridayaba”. Ouraméme ligía aba larufuduni Hesusu mama lan adimuredügüni adügübei lun lariñaguni lira, lugundun aba láguyuguagüdüni Lásaru hañúarü saragu gürigia (Huan 11:23, 25, 38-45).

Lidan aban arufudúni le larihagüdübei lun apostolu Huan, ábanya füramase lan Hesusu láguyuguagüdübaña lan hilaaña. Ruti aban profesía le adimurehabei keisi aban sínbolu luagu lachülürüba lan aban weyu lun lalibüreruniña óunweni hilaaña ha lábugiñebaña lubafu (Arufudúni [Apokalípsis] 20:13).