ÁLÜGÜDAHANI BURÍ TUAGU BÍBÜLIA

Ka san líribei Bungiu?

Sun waduheñu gíritiña. Íbini wabiñanigu gíritiña. Ma háfuga giñe giri lan Bungiu? Tidan Bíbülia yúsuati saragu títulu lun layanuhóun luagu Bungiu, kéiburi “Suntigabafu” luma “Aburemei”. Gama lumoun, gíriti giñe Bungiu. (Aliiha huméi Isaíasi 42:8, TNM.)

Tidan saragu Bíbülia, dariwati liri Bungiu lidan Sálumu 83:18. Kei hénpulu, ítara liña tásügüragüdüni Traducción del Nuevo Mundo de las Santas Escrituras bérusu le: “Lun hasubudiruni gürigia Heowá lan bíribei, buguyarügüñein le Íñugutimabei ligibuagu sun ubóu”.

Ka uagu lunti lubéi wayusuruni liri Bungiu?

Busenti Bungiu lun wayusuruni liri. Dan le wayanuhan hama wamadagu, wátiwa houn lau hiri. Ma lunti giñe wadügüni ligiaméme dan le wayanuhan luma Bungiu? Ani amisuraha lumutiwa giñe Hesukrístu lun wayusuruni liri Bungiu. (Aliiha huméi Matéu 6:9; Huan 17:26.)

Guentó, lun lumadagu wamá Bungiu mégeitiwa wasubudirun amu katei luagu, mámarügü liri. Ida liña san Bungiu? Inarüni san gayara lan wayarafadun lun? Dariwati óunabagülei lun álügüdahani le luma lun amu tidan Bíbülia.