Ka dañu tadügübei Iyawaü lánina agamariduni?

Buin liña ubóu lau bidéu o katei burí lánina agamariduni.a Dariwati tidan bigibigitu, lidan ligaburi hasansiragun gürigia, lidan músika, Internet (kéiburi lidan páhina le adügǘbei lun tafidihóun iyawaü), lidan ñunsu, pelíkula, garüdia, lidan burí bidéu lánina huraraü, lidan iseri burí gágamuru luma lidan burí amu luwuyeri máhina le isériti. Genegeti aban lan katei súdiniti lidan habagari gürigia uguñe weyu. Lidan sun fulasu gíbetimahaña gürigia etenirutiña lun katei wíyeti le guentó sügǘ lau lidan amu dan (ariha huméi rekuaduru “Dátosu burí luagu bidéu tuma burí iyawaü lánina agamariduni).

Asansireina liña giñe ligaburi harihini gürigia taríawagun iyawaü lánina agamariduni. Abürühatu máistara Gail Dines: “Wéirihali furangu lan larufudún agamariduni guenlé darí lun le lan meha arihíbei kei lanarime iwiyei lidan amu dan, guenlé manarimeeli luriban larihín”.

Ka hisaminanbei? Saminatün san aban lan isebáhari le madügünti dañu o aban péisini le gáfarahati? Ariñagati Hesusu: “Sun [...] wewe le buiti, buiti lin; wewe le wuribati, wuribati lin” (Matéu 7:17). Ka resultóu ibihíbei lídangiñe taríawagun iyawaü o bidéu lánina agamariduni? Lun wasubudiruni, akutiha wamá ǘrüwa saminaü luáguti katei le.

Ka lánibei taríawagun iyawaü luma bidéu lánina agamariduni efekütu hawagu gürigia?

KA HARIÑAGUBEI HA SUBUDIHABUBAÑA LUAGU KATEI LE?: Dan le haríagun gürigia iyawaü o bidéu lánina agamariduni aba héchudun luagu, darí lun hariñagun akutihatiña hama surusiagu ítara liña lan kei crack (aban tuwuyeri duroga).

Héchuti meha Brianb aríagua iyawaü lánina agamariduni lidan Internet, ani abahüdaguati: “Úatiha ni kata gayarati lararamunina. Kamá hamuga lábugiñeñadina tani duroga efekütu. Darí meha lun nadadagarun ani aba lagaridun nichügü. Barütina saragu irumu áfaagua lun nígiruni”.

Gürigia ha gánibalin bisiu lun haríagun iyawaü o bidéu lánina agamariduni súnwandan haramuduni housan. Mínsiñeti houn hayanuhan ani güreweiti gunfurandawa hamá. Ani libe-agei dan áluahatiña lun hábuguarügü hamá, sanditiña busiganu, íruni, igañi ani mederaguagüdünti hasaminan. Añahein hagía darí lun hálugun hagidaruni habagari guánarügü. “Aba nagumeserun abusenra nábuguarügü nan ani aba magurabaguadi nan, —liña Sergio, le arariragüdübei iyawaü luma bidéu lánina agamariduni sagü weyu lidoun ligagamurun—. Sandiguatina meha nungua kamá meseriwintina lun ni kata, sanditina meha duru ani nábuguarügüñadina lan güragu lidan gádantina. Sanditina meha saragu busiganu luma anufudei lun náluahan ídemuei.”

Íbini ánhabu ariha iyawaü lánina agamariduni sódini lidan baríaguña lan bigibigitu o tidan konputadora gayarati ladügün saragu dañu. Lidan aban damuriguaü hama lílana Senado Meriga, ariñagatu surusia Judith Reisman, aban akutihatu luáguti taríawagun iyawaü luma bidéu lánina agamariduni: “Dan le harihin gürigia iyawaü lánina agamariduni, aba lerederun lidan hasaminan ani sánsiti ligaburi hasaminan, adügati dañu lúmagiñe oura ligía íbini mabusenrun hamá gürigia ani durati saragu dan lidan saminaü, hénrenguti labulieidúniwa o mabulieidúaditi”. Susan, aban nibureintu 19 irumu tau to arihiboun iyawaü luma bidéu lánina agamariduni lidan Internet íbini mama lan taríahañoun ani lárigiñe aba téchudun, abahüdahatu: “Aba terederun iyawaü to narihiboun lidan nisaminan. Sódini aba naritagun tuagun. Genegeti siñabei lan nasagarunu lídangiñe nisaminan sunsuinagubei”.

SAMINAÜ LE ÍDOUNBEI WACHÜLÜRA: Aban bisiu taríawagun iyawaü luma bidéu lánina agamariduni ani adügati saragu dañu houn ha hínsiñehabubaña lun (2 Féduru 2:19).

Ka lánibei taríawagun iyawaü luma bidéu lánina agamariduni efekütu lidan familia?

KA HARIÑAGUBEI HA SUBUDIHABUBAÑA LUAGU KATEI LE?: “Günringua lumuti taríawagun iyawaü luma bidéu lánina agamariduni maríei luma familia.” (The Porn Trap [Lisadaran porno], tani Wendy luma Larry Maltz.)

Günringua lumuti taríawagun iyawaü lánina agamariduni maríei luma familia lugundun...

• ... adügati lun heferidiruni afiñeni hawougua, lun mabuserun hamá hagunfulirun o harounrun hámagua keisi maríeitiña ani aba leferidirún ínsiñeni (Ariñawagúni 2:12-17).

• ... adügati lun luouguounrügü lan kada aban hádangiñe lasaminara, lun mayanuhan hamá hámagua ani magundan hagía hámagua (Éfesuna 5:28, 29).

• ... adügati lun hebelaagüdün luriban saminaü luagu agamariduni luma ayumahani lidoun hasaminan (2 Féduru 2:14).

• ... ínchaha lumutiña gürigia lun hafosuragun houngua lun hadügün katei lidan agamariduni le mabuidunti ligibugiñe Bungiu (Éfesuna 5:3, 4).

• ... adügati lun lagabarahanu wügüri lani weiriou o lun tagabarahani würi tani weiriei (Matéu 5:28).

Ariñagatu Bíbülia moun lumuti lan lagabarahanu gürigia maríeiti lani weiriou ni tuguya lun (Malakíasi 2:16). Ligíati, múaragun hamá maríeitiña hámagua aban agarabaguni le agadeirubalin maríei ani barǘ lumutiña maríeitiña lidoun fánreinguaü luma ígiraguni, le adügübei saragu dañu houn isaanigu.

Adügatu giñe taríawagun iyawaü lánina agamariduni dañu houn irahüñü. Sigiti Brian ariñaga: “Dan meha le diisi lubéi irumu nau, aba nadarirunu lani núguchi garüdia to lánina agamariduni dan le náhureruña lan. Aba nagumeserun aríaguoun aramudagu, íbini ibidiñe lan meha nun ka lan uagu línsiñedunbei nun naríagunu. Ítara liña lagumeserun aban échuni wuribati le nuagu darí lun naweiridun lau.” Gíbeti aturiahani arufuduti gayarati lan ladügün taríawagun iyawaü lánina agamariduni lun hagumeserun irahüñü agamarida lúmagiñe dan le ñǘbürigiña, lun harourun hama furumiñeguarügü, lun furunde hamá lidan agamariduni ani adügati giñe lun mabuidun lan hasaminan.

SAMINAÜ LE ÍDOUNBEI WACHÜLÜRA: Ítara tiña iyawaü luma bidéu lánina agamariduni kei aban péisini le adügübei lun lagumuchagun ínsiñeni, ani barüti igarigu luma asufuriruni (Ariñawagúni 6:27).

Ka tariñagubei Lererun Bungiu tuagu iyawaü luma bidéu lánina agamariduni?

LE TARIÑAGUBEI BÍBÜLIA: “Ualá ni aban hídangiñe agamariduti mamarieidunga, madügün huguyame katei wíyeti, mafalara huméi luriban haritagun, ígira humeime igaaduaü, lememe ítarabei kei lanügǘniwa irisini kei Bungiu” (Kolosana 3:5).

Lidan amu dimurei, iyereegutu iyawaü luma bidéu lánina agamariduni lun Heowá.c Ani mama ladüga sándudua lan. Adüga lumutiwa lun gayara lan wagamaridun ani adüga lumuti ítara lun gayara lan híchuguni maríeitiña le hemegeirubei hóuniwagua, lun yarafaguatima hamá luma lun hasandiruni ugundani le lanügübei hanügǘn irahüñü ubouagun (Santiagu 1:17).

Kati uagu wariñaga iyereegu tan iyawaü luma bidéu lánina agamariduni lun Heowá? Akutiha wamá fiú resun.

• Subudi lumuti Heowá gayara lan lagünrinchaguni taríawagun iyawaü lánina agamariduni habagari gürigia (Éfesuna 4:17-19).

• Hínsiñetiwa lun ani mabusenrunti lun wasufurirun (Isaíasi 48:17, 18).

• Busenti lóunigiruniña maríeitiña luma familia (Matéu 19:4-6).

• Busenti lun haruma wamá luma lun inebehabu wamá lun haricha amu (1 Tesalónikana 4:3-6).

• Busenti lun inebe lan lumegegun wágubu woun, létima líchugubei woun lun gayara lan hagibedagun gürigia ubouagu ani lun wayusuruni keisi lubudubu (Ebüréu 13:4).

• Subudi lumuti Heowá adügati lan taríawagun iyawaü luma bidéu lánina agamariduni lun harihini gürigia agamariduni wuriba, lun hawouguounrügü lan hasaminara luma lun háyeihani lisaminan Satanási (Agumesehani 6:2; Húdasi 6, 7).

SAMINAÜ LE ÍDOUNBEI WACHÜLÜRA: Gadei lumuti taríawagun iyawaü luma bidéu lánina agamariduni hamadagua gürigia luma Bungiu (Rómana 1:24).

Gama lumoun, gudemehabuti Heowá houn gürigia ha busenbaña hesefurun luéi bisiu le. Ariñagatu Bíbülia: “Areidati Aburemei, gudemehabu ligía; gaguraasunti giñe hínsiñehabu ligía. [...] Subudi lumuti ka lan wabuñabei káteitimañadiwa lan: Subudi lumuti buidu, luagu múa lan wabuñabei” (Sálumu 103:8, 14). Amisuraha lumutiña Bungiu gürigia ha ǘnabugubaña lun hayarafadun lun lun ‘gudemehabu lan houn, íderagua láñame lau lareini lidan hemegeirun’ (Ebüréu 4:16; ariha huméi rekuaduru “Ida luba hígiruni taríawagun iyawaü luma bidéu lánina agamariduni”).

Gíbeeña gürigia ánharutiña heresibiruni lídehan Bungiu. Barüti san buiti resultóu houn? Ariha waméi le tariñagubei Bíbülia hawagu fiú gürigia ha áfuridubaña lídangiñe échuni le wuribati: “Anhein guentó, chibawaali hifigoun, harumagüdawaadün, richaguaadün ladüga le ladügübei Wabureme Hesusu huagu, luma sun le ladügübei lani Bungiu [sífiri]” (1 Korintuna 6:11). Gürigia burí ha, úaratiña luma dimurei le lariñagubei profeta Isaíasi: “Bungiu esefurubalina, hemenigitina luagu, manufudetina. Aburemei naramudaguagülebei luma nere, ligía nesefuragülebei” (Isaíasi 12:2).

Susan, to ibihiboun tígiruni échuni lánina taríawagun iyawaü lánina agamariduni, ariñagatu: “Heowárügüñein gayara líderagun aban gürigia ígirei bisiu le. Anhein wamuriaha lídehan luma ladundehan, gayarabei haruma lan wabagari ani adüga wagíame aban umadaguaü buiti luma. Maweiyasunbei Bungiu acharara woun”.