ÁLÜGÜDAHANI BURÍ LE HADÜGÜBEI ALIIHATIÑA

Buiti san lun hañuurun agübürigu kristiánugu lidan adamuridaguni úara luma aban hasaani le bugawaali lídangiñe damuriguaü?

Úati resun lun weberesedun halía lan lañuura aban gürigia le bugawaali tidan Luban Wadamuridagun. Áfaaguaru garüdia to lun tínchahaniña agübürigu lun híchugun ídemuei lun somu hasaani le bugawaali lunya laransehani lumadagua luma Heowá, dan le hámagili lawinwanda hábiñe. Kei tarufuduni Garüdia Atalaya to lánina 15 lidan unsu-hati irumu 1988, ubanaü 19 luma 20, gayarati giñe haturiahanu agübürigu Bíbülia luma aban hasaani le bugawaali lídangiñe damuriguaü dan le lábugiñegili hererehan. Gayarati líchuguni katei le ídemuei le lemegeirubei nibureinti ligía lun lun lagiribudun lun Heowá.a

Tidan Luban Hadamuridagun Gefentiña luagu Heowá, gayarabei lañuurun aban nibureinti le bugawaali lídangiñe damuriguaü hóubagiñe lagübürigu. Kei le mama lubéi mosu herederun bugawaaña lidan lagumuhóun burí haláü, maribanti hamuga lañuurun nibureinti ligía le ñein lubéi hañuura lagübürigu. Chóuruti busenbaña lan agübürigu hóunigiruni lumadagua hasaani luma Heowá. Líderagubaña hañuurun luma lun hachoururuni anhein leteniruña lubéi lun le ariñawagúbei lidan adamuridaguni, hénrengubei houn hasubudiruni anhein dise habéi luéi.

Ánheinti mámaali lubéi hama lagübürigu lawinwanda? Lunti san lañuurun hama? Tidan amu burí Garüdia Atalaya ariñawagúati furangu ida luba lan hóuserun kristiánugu luma somu haduhe le bugawaali lídangiñe damuriguaü dan le mama lan tidan abanméme muna heredera.b Gama lumoun, mama ligiaméme hígirun liduheñu aban gürigia le bugawaali lídangiñe damuriguaü lun lañuurun hama lidan adamuridaguni lumoun háluahan hóundaragun luma dan le mama lan mosu hadügüni. Anhein góunigi habalin lílana familia ligaburi hóuserun luma le bugawaalibei, ani áfaagua hagía lun hasigiruni adundehani le tídanbei Bíbülia, úati resun lun wadiheridun (1 Ko. 5:11, 13; 2 Huan 11).

Óuserarügaali ligía bugawaali keisi lubudubu, gayarabei lañuurun lóubagiñe somu liduhe o hóubagiñe furumiñeguarügü hádangiñe lílana damuriguaü. Anihein dan gayara lan lanügün turóbuli dan le lariñawagún lídanrügübei lan ítaga fulasu hañuura gürigia ha bugawaañabaña. Ligíati, ánhaña áfaagua lílana damuriguaü íbini liduheñu bugawaali lun gaganbadi hamá lun adundehani le tídanbei Bíbülia luagu abugúni, ani úati ni aban achugeraguti ladüga lañuurun aban bugawaali lidan somu fulasu, moun lumuti larihín katei le kei aban katei súdiniti.c