Létima gadurunbei luagu wuribu luma asufuriruni

Gumuti Furumiñeti Wuribu Wéiriti weyu 11 lidan unsu-hati, irumu 1918. Darú hamuti burí gürigia hani bísinisi ani aba háfuridun abinaha ǘmadarugu. Gama lumoun, madurati meha efeduhani ligía saragu dan. Anihein meha ábanya lamiselu —gáfarahaditimati sügǘ tau aragabusu— lunti liabin luagun ubóu.

Lidan sisi-hati irumu 1918 aba láfuachun gripe española lidan fulasu le ñein lubéi hawuribuhan faransuna, ani málüti lárigiñe aba larihín luagu hanarime lan láfarahadi sandi ligía. Lídanrügü fiú hati gíbetimatiña súdaragu merigana láfarun sandi ligía Francia sügǘ lau balu le haduuragubei háganiñu. Ani súdaragu ha agiribudubaña hábiñoun barüina hañalin sandi ligía ani aba laburuchagun lidan sun ubóu.

Ilamaü luma gudemei ligía meha lígirubei wuribu lubá burí irumu le lunbei buga liabin. Hilatiña saragu gürigia Yuropa lau débili ladüga méigini lárigiñebei lagumuchun wuribu. Lúmounbei irumu 1923, féridi laali meha haseinsun yámani lebegi. Sisi irumu lárigiñe, aba liabin sun ageiraü ǘnabun ladüga luan seinsu. Ani, lidan irumu 1939, aba laduurun Libiaman Wuribu Wéiriti, ani gayarati wariñagun ligía lan lóustarubei furumiñeti wuribu le meha ásügürübei. Ka lébunabei lasuseredun wuribu gabügürüguati le?

LISEININ LAGUMUHÓUN DAN

Lun gunfuranda wamani ka lan lanagangiñebei somu burí sügǘ le mabulieiduaditi, kéiburi Furumiñeti Wuribu Wéiriti, lunti wakutihani profesía burí le tídanbei Bíbülia. Lubaragiñebei lasuseredun, ayanuhaali meha Hesukrístu luagu aban dan le ídanbei lageindaguba lan aban néchani luma amu ani ñeinbei lan sandi luma likesin éigini lidan sun fulasu (Matéu 24:3, 7; Lúkasi 21:10, 11). Ariñagati houn lani disipulugu sun lan burí katei le liseininbei lan lagumuhóun dan. Tidan tagumuhóun líburu to tídanboun Bíbülia, Arufudúni, anihein saragu amu dátosu, ñein arufudúati úara lan sun asufuriruni le ubouagubei luma aban wuribu siéluna. (Ariha huméi rekuáduru “Wuribu ubouagu, wuribu sielu”.)

Lidan Arufudúni ayanuhóuati hawagu gádürü agalufehatiña gabayu. Ǘrüwa hádangiñe sínboluñanu lani chagaguaü le uágubei layanuha Hesusu: wuribu, ilamaü luma sandi. (Ariha huméi rekuáduru “Gumeseña san gádürü agalufehatiña gabayu ha uágubaña layanuhóua lidan Arufudúni agalufeha?”.) Furanguti gumese lani Furumiñeti Wuribu Wéiriti aban dan lánina asufuriruni le aniheinguabei uguñe weyu. Arufuda tumuti Bíbülia Mafia lan gadurunbei (1 Huan 5:19). Lachülürüba san dan lun lararamuni somu gürigia?

Chóurugüda tumuti líburu Arufudúni “luagu murusunrügaali lan lidaani” Mafia (Arufudúni 12:12). Ligía weiri lubéi ligañi ani ladügüña lun lagibedun asufuriruni ubouagu. Le linarün katei, sun turóbuli le warihibei geyegu wau arufudati luagu murusuntimarügaali lan dan.

LAGÜNRINCHAWAGUN LUADIGIMARI MAFIA

Le Furumiñeti Wuribu Wéiriti ligía asansirubalin katei ubouagu. Ligía lagumesehabei aban dan lánina wuribu, chagaguaü luma magundani hama polítiku. Arufuda lumuti giñe lira luagu bugawa lan Satanási siélugiñe (Arufudúni 12:9). Ítara liña lóunabun lurúeite ubóu le, le marihínwabei, kei aban urúei furundeti le asubudirubalin luagu murusunrügaali lan lidaani larúeihan. Danme le lagumuchun lidaani, ábame lagumuchun lidaani asufuriruni le agumeserubei lidan Furumiñeti Wuribu Wéiriti.

Ruti profesía burí le tídanbei Bíbülia resun buiti woun lun wafiñerun luagu málühali lan Hesukrístu, Warúeite le siélubei, agumucha lau “luadigimari Mafia” (1 Huan 3:8). Lúmagiñe guentó hafurieiduña saragu míñunu gürigia lun liabin Arúeihani ligía. Agia huguya? Seremei arúeihani ligía, gayarabei harihini gürigia ha buídubaña lagunfulirun lugundan Bungiu ubouagu, mama lugundan Mafia (Matéu 6:9, 10). Lábugiñe Larúeihan Bungiu, masuseredundigiaalime aban wuribu wéiriti ubouagu ni amu luwuyeri wuribu (Sálumu 46:9). Furendei humá luagu Bungiu ábame hawinwandun lun harihini lidaani ñein lan darangilaü lidan sun ubóu (Isaíasi 9:6, 7).