Aganba waméi lumalali Heowá le ñein lumuti wadariragua woungua

1, 2. Ida liña san layanuhan Heowá houn lubúeingu?

LIDAN sun dan le sügühalibei, adundeha laaña Heowá lumutuniña lidan ámuñegueinarügü manera. Yúsuti ánheligu lun layanuhan hama fiú, yúsuti giñe arufudúni luma burí uénedü lun lasubudiragüdüni katei burí le lunbei lasuseredun houn o lun líchugun somu wadagimanu houn (1 Lur. 7:89; Ese. 1:1; Dan. 2:19). Ruti adundehani houn fiú hayumulugugiñe amu lubúeingu ha eseriwidubaña lidan fánreinti tánina lóundarun le yaabei ubouagu. Gama lumoun, meberesenga ida liña lan lachülüragüdüni Heowá uganu, resibitiña ha gaganbadibaña saragu abinirúni.

² Uguñe weyu, adundeha lumutiwa Heowá tau Bíbülia, lau lani sífiri sandu luma lidan damuriguaü (Adü. 9:31; 15:28; 2 Tim. 3:16, 17). Furanguti ladundehan darí lun ítara liña lan kamá waganbuña aban umalali wanagangiñe le ariñagubei: “Anihán ǘmabei, ñéingiñela hidin” (Isa. 30:21). Yusu lumuti giñe Hesusu lun layanuhan woun, lugundun írida laali lun ladundehani damuriguaü lau lídehan “musu úaraguati ani gunfuranda ligía” (Mat. 24:45). Mosu gaganbadi wamá lun ladundehan Heowá; ítararügübei gayara lan wawinwandun lun súnwandan (Ebü. 5:9).

3. Ka gayarabei ladügün lun masigirun wamani ladundehan Heowá? (Ariha huméi dibuhu le lídanbei lagumeseha arütíkulu.)

³ Subudi lumuti Satanási luagu lesefurubadiwa lan ladundehan Bungiu, ligía láfaagunbei lun ladügün lun masigirun wamani. Luagu amu oubaü, gayarati teyeedaguniwa wanigi ani adüga tuguyame lun maganbadi wamá (Her. 17:9). Ligíati, ariha wamá ida luba lan wadisedun tuéi sádara burí to gayaraaboun tadügün lun maganbun wamani lumalali Bungiu. Ani ariha waméi ida liña lan líderaguniwa wayanuhan luma Heowá súnwandan lun labuidurun wamadagua luma, meberesenga ka lan gádanbaliwa.

LISADARAN BURÍ SATANÁSI

4. Ka ladügübei Satanási lun gabafu lan luagu hasaminan gürigia?

⁴ Gabafuti Satanási luagu hasaminan gürigia lau burí ariñahani le iyeeniti (aliiha huméi 1 Huan 5:19). Buruguagüdawati ariñahani lidan sun ubóu tau burí periodiku, radiu, bigibigitu luma Internet. Ani íbini hu lan katei burí le, libe-agei dan furiti ariñahani ñein luagu burí igaburi luma luwuyeri ibagari le kóntürati luagu lilurudun Heowá (Her. 2:13). Kei hénpulu, adügatiña lun hasaminarun gürigia maribanti lan hamarieidun wügüriña hama wügüriña háledigu o würiña hama würiña, ani adügati katei le lun hasaminarun saragu gürigia luagu hanarime lan lihürü lilurudun Bungiu luagu katei le (1 Ko. 6:9, 10).

5. Kaba wadüga lun meferidiraguagüdün lániwa katei burí le laburuchaguagüdübei Satanási?

⁵ Ka lunbei hadügüni ha hínsiñehabubaña lun Heowá lun machawahan lániña sun katei le laburuchaguagüdübei Satanási? Ida luba san hasubudiruni le buídubei lumoun le wuribabei? Mosu “[h]agunfulirun lau [l]ererun [Bungiu]” (Sal. 119:9). Anihein adundehani súdiniti tidan Lererun Bungiu le íderagubaliwa lun wasubudiruni ariñahani le gayarati lafiñerúniwa luagu luma ariñahani le gayarabei leyeeduniwa (Ari. 23:23). Yúsuti Hesusu dimurei tídangiñeti Lererun Bungiu, ani aba lariñagun “habagariduba [lan] giñe [gürigia] lau sun dimurei le lariñagubei Bungiu” (Mat. 4:4). Mini lan le mosu lan wafurendeirun awinwanda según inarüni méiniti le tídanbei Bíbülia. Kei hénpulu, saragu dan lubaragiñe labürüdǘn lilurudun Bungiu kóntüra agabarahani, subudi laali meha nibureinti Hosé luagu lafigouhaba lan ligibugiñe Bungiu anhein arounra tuma lani Potifárü weiriou. Masaminarungubeiti lachararun lun Heowá dan le tálugunbei tafosuruni (aliiha huméi Agumesehani 39:7-9). Lau sun téredun würi tuguya luagu Hosé, desidírüti laganbuni le lariñagubei Heowá, mama le tariñagubei würi tuguya. Ka larufudahabei le woun? Furendeitiwa mosu lan waganbuni lumalali Heowá lun gayara lan wasubudiruni le buídubei lumoun le wuribabei ani madügün wagíame gasu lau sun katei le laburuchaguagüdübei Satanási.

6, 7. Ka gayarabei wadügüni lun meyeedun lániwa Satanási?

⁶ Buin liña ubóu lau relihión, ani ámuñegueinarügü larufudahan kada aban darí lun hasaminarun gürigia siñabei lan hadariruni relihión le inarünibei. Gama lumoun, adügaali Heowá lun sun lan ha áluahabalin ladundehan lun ménrengun lan hadariruni. Mégeirügütiña desidírü hamá kaba lan haganba. Ani kei le hénrengu lubéi haganbun gürigia bián umalali úara, mosu wasubudiruni lumalali Hesusu lun ligía lan waganba, lugundun ligía líridubei Heowá lun lóunigiruniña lubúeingu (aliiha huméi Huan 10:3-5).

⁷ Ariñagati Hesusu: “Teni humatia lun le haganbubei” (Mar. 4:24). Furanguti ladundehan Heowá ani buiti, gama lumoun mosu waranserunu wanigi lun waganbuni buidu ani anha wagíame lun. Ánhawa móunigi, gayarabei wadügün gasu lau lagübüri ladundehan Satanási ani ígira wameime lubuidun ladundehan Bungiu luagu amu oubaü. Maweiyasun wamá ígira lun ladundehani lagübüri saminaü le lídanbei ubóu le wabagari, gayarati liabin woun lidan músika, bidéu, panaagu, máisturugu o furumiñeguarügü gürigia ha saminawati chu lan hau (Kol. 2:8).

8. a) Ida liña gayara lan tadügün wanigi lun wéiguadun tidoun lisadaran Satanási? b) Ka gayarabei lasuseredun woun ánhawa madügün gasu lau burí seini le arufudubalin mosu lan duari wamá?

⁸ Subudi lumuti Satanási anihein lan luriban ayumahani wawagu. Dan le layusuruni wadebilin lun ladügün lun wábürühan, hénrengutimati woun úaragua wamá lun Heowá (Huan 8:44-47). Samina wamá luagun aban gürigia le erederubei etenira lun ugundani le lídanbei ubóu. Aba ladügün aban katei wuribati le masaminarunti luagu ladügübei lan (Rom. 7:15). Ka san uagu lasusereda le lun gürigia ligía? Háfuga murusun murusun aba madagaali lan lererehan Heowá tidan lanigi. Gayarati míchurügü liña lan fe luagu seini burí le eweridirubalin luagu le asuseredubei, o ligía lan desidírübei madügün lan gasu lau seini ligía. Háfuga aba mafurieidunhali lan, mapurichihanhali saragu kei meha furumiñe o aba lagumeserun eferidirei adamuridaguni. Lau lásügürün dan aba ladügüni le layumahabei íbini subudi lani luagu wuriba lan. Kaba san wadüga lun masuseredun lan katei le woun? Mosu agagudúañu wamá lun warihini furumiñeguarügü katei le arufuduti woun mosu lan duari wamá ani adüga wameime asansiruni le wemegeirubei lau lóufudagun. Anhein waganba lumalali Heowá lau duari, maweiyasunbadiwa aganbaha saminaü le kóntürati luagu larufudahan Heowá (Ari. 11:9).

9. Ka uagu súdini lubéi wetenirun lun furumiñeguarügü luriban échuni wawougua lau lóufudagun?

⁹ Dan le ladarirún aban sandi luagu somu gürigia dan le lagumeseruña lan, wéiritimati emenigini luagu lareidaguba lan. Ítarameme, ánhawa ariha somu igaburi wuribati wawougua ani aba wagidaruni wawariua lau lóufudagun, méiguadunbadiwa tidoun “lisadaran Mafia” lun wadügüni le labusenrubei (2 Tim. 2:26). Ligíati, ánhawa íchiga fe luagu ígiraadiwa lan lun ladisedun wasaminan luma wayumahan luéi le lagurabubei Heowá wámagiñe, ka lunbei wadügüni? Mosu wagiribudun lun Heowá lau ǘnabuguni ani lau lóufudagun, ani aganba wameime ladundehan tau sun wanigi (Isa. 44:22). Lau desidírü wamá wuriba ábanrügü wéiyaasu gayarati ladügün lun wasufurirun saragu lidan ubóu le. Ligía buidu lubéi lun wagagudún lubaragiñe wéiguadun tidoun sádara.

ANAAGUNI UNGUAÜ LUMA IGAADUAÜ

10, 11. a) Ida liña larihín anaaguni unguaü hawagu gürigia? b) Ka wafurendeirubei lídangiñe luriban hénpulu le híchugubei Koré, Datán luma Abirámü?

¹⁰ Lunti mabulieidun wamani gayara lan tadisedagüdüniwa wanigi luéi Heowá. Samina wamá san luagun anaaguni unguaü luma igaaduaü, luma luagu ida liña lan gayara lan ladügün katei burí le lun maganbun wamani lumalali Heowá ani barǘ láwame lidoun günringuaü. Aban gürigia pántati wéiriguti lasandiragun lungua. Háfuga saminati garicha lan lun ladügüni le labusenrun ani úati lan lunti lariñaguni lun kaba lan ladüga. Kei resultóu, gayarati lasaminarun mama lan mosu lasigiruni hadundehan amu kristiánugu ni hadundehan wéiyaaña lidan afiñeni, ni tadundehan lóundarun Bungiu. Aban gürigia ítarati larihibei lumalali Heowá kéirügü aban agülülühani málati.

¹¹ Dan le meha lidan hamá fulasu mageirawati ísüraelina, aba hebedaagun Koré, Datán luma Abirámü kóntüra lilurudun Moisesi luma Aarón. Adügati anaaguni unguaü lun hálugun háhuduragun lun Heowá kei auti habusenra. Ka ladügübei Heowá? Aba láfaraguniña hau sun híbiri ebedaagutiña (1 Lur. 26:8-10). Arufudahati abahüdaguni le aban katei súdiniti woun: súnwandan wuriba lan lidin houn ha ebedaagubaña lun Heowá. Haritaguagüda lumutiwa giñe luagu “lárigi [lan] pantaü liabin günringuaü” (Ari. 16:18; Isa. 13:11).

12, 13. a) Ru humá aban hénpulu le arufudubalin gayara lan lanügüniwa igaaduaü lidoun günringuaü. b) Afuranguagüda huméi ida liña lan laweiridagun igaaduaü dan le magidarun hamani gürigia hawariua.

¹² Ayanuha wamá guentó luagu igaaduaü. Aban gürigia igaaduati súnwandan ladügüni le labusenrun ani adügati katei le mabuidunti. Dan le lareidagunbei Naamán —le hábuti súdaragu síriana— lídangiñe lépüra le luágubei, aba lariñagun lun profeta Eliséu líchuguba lan fiú idewesei lun. Máhati Eliséu leresibiruni. Gama lumoun ñeinñein Geasí, le lumusun Eliséu, ani busén lumuti idewesei burí ligía, ábati lasaminarun: “Fiñutina luagu Bungiu luagu néibuga lan lárigi [Naamán] furese, ariha ka lan gayaraabei nibihin lúmagiñe”. Ibidiñeñu lun Eliséu, aba lidin Geasí éibaagueina lárigi Naamán ani aba labahüdahan iyeeni lun lun lamuriahan “ǘrüwa-milu murusun pülata [...] tuma bián sutu daüguaü”. Lárigiñe, aba giñe layanuhan iyeeni lun lani Heowá profeta. Ida liña san lagumuchun Geasí lau igaaduaü le luágubei? Aba lásügürün lépüra le meha luágubei Naamán luagu! (2 Uru. 5:20-27.)

¹³ Gayarati lagumeserun igaaduaü lídangiñe aban liraüraü ayumahani. Gama lumoun, anhein magidarun hamá gürigia hawariua lau lóufudagun, gayarati laweiridagun darí lun ligía lan agumadiraña. Anihein aban hénpulu tidan Bíbülia luáguti Akán. Arufuda lumuti hénpulu ligía here lan igaaduaü ani fureseti laweiridagun hawagu gürigia. Gúfeseti Akán: “Aba narihin aban manda Babilóniana, luma bián-san murusun seinsu le pülata luma aban murusun golu lóugiñe lamidan líburu lihürü. Aba lawamaadun nun, aba nanügüni”. Lubaragiñe hamuga lagidaruni luriban ayumahani ligía luáriua, ábarüga líweruhani katei ligía aba laramuduni tidan likianpun. Dan le lasubudirúnwabei lifigoun Akán, aba lariñagun Hosué lun luagu labeichubei lan Heowá. Ani ítara liña, weyuméme ligía hachamuragua dübü luagun darí lounwen hau sun tílana luban (Hos. 7:11, 21, 24, 25). Gayarati wagumeserun óusera lau igaaduaü lidan furumiñeguarügü oura, ligía lunti lubéi wóunigiragun woungua “luéi igaaduaü” (Luk. 12:15). Gayarati liabin somu luriban saminaü woun sódini o wasaminarun luagun somu katei wíyeti, gama lumoun, súdiniti lun wagumadiruni wasaminan ani moun lumuti giñe wígirun lun laweiridagun wayumahan darí lun wafigouhan (aliiha huméi Santiagu 1:14, 15).

14. Ka lunbei wadügüni ánhawa ariha wóuseruña lan lau anaaguni unguaü luma igaaduaü?

¹⁴ Dandu barüguaü unguaü kei igaaduaü gayarati lanügüniwa lidoun günringuaü. Wasaminarun luagun katei le líderagubadiwa lun mígirun wamá lun ladügün igaburi wuribati le lun maganbun wamani lumalali Heowá (2 Lur. 32:29). Mámarügüñein üma le buídubei larufuda Bungiu woun tidan Bíbülia, arufuda lumuti giñe woun ka lan uagu buidu lubéi wafalaruni üma ligía luma kaba lan asusereda woun ánhawa adireira. Ánhawa tínchaha wanigi lun wadügün somu katei ladüga anaaguni unguaü o igaaduaü, buídubei lun wasaminarun luagun kaba lan lani efekütu wawagu, hawagu waduheñu, ani le súdinitimabei, lidan wamadagua luma Heowá.

AYANUHA HUMÁ BUIDU LUMA HEOWÁ

15. Ka larufudahabei lani Hesusu hénpulu woun luagu ayanuhani luma Heowá?

¹⁵ Busenti Heowá lun buidu lan lidin woun (Sal. 1:1-3). Ruti saragu adundehani woun dan le wemegeiruni (aliiha huméi Ebüréu 4:16). Íbini Hesusu, le meha mafigounbei, mégeiti meha layanuhan luma Heowá súnwandan, ligía meha lafurieidunbei súnwandan. Ani hanarime buriti meha ídemuei le libihibei lúmagiñe Heowá. Óunahati meha ánheligu lun heseriwiduni, ruti sífiri sandu lun ani adundeha lumuti dan le lanúadirunbaliña 12 apostolugu. Ayanuhati meha giñe siélugiñe lun larufuduni luagu anihein lan luma Liráü ani gunda lan lau (Mat. 3:17; 17:5; Mar. 1:12, 13; Luk. 6:12, 13; Huan 12:28). Ítara kei meha Hesusu, mosu giñe wadaarunu wanigi lun Heowá (Sal. 62:7, 8; Ebü. 5:7). Anhein wadüga ítara, gayarabei wayanuhan luma Heowá ani ru wagíame uéiriguni lun lau ligaburi wawinwandun.

16. Ka lunbei wadügüni lun líderaguniwa Heowá aganbei lumalali?

¹⁶ Íbini gayara lan hadariruni sun gürigia ladundehan Heowá, mafosurunti ni aban lun lasigiruni. Mosu wamuriahan luma lun líchugun sífiri sandu woun anhein busén wabéi lun ladundehaniwa, ani líchugubei woun lau sun lugundan (aliiha huméi Lúkasi 11:10-13). Ariñagatu Bíbülia: “Aganba humá lubeiti buidu” (Luk. 8:18). Kei hénpulu, warufuduña hamuga biangua lan wagibu ánhawa amuriaha luma Heowá lun líderaguniwa lun wígirun somu ayumahani le wíyeti ani awanha aríagua pornografía o pelikula le gaganati agamariduni. Le lunbei wadügüni, mosu wáluahan lun lidan wamá fulasu le ñein lubéi lani Bungiu sífiri sandu. Subudi wamuti luagu anihein lan sífiri ligía lidan adamuridaguni. Gíbetiña íbirigu, dan le haganbuni lumalali Heowá lidan adamuridaguni, aba híchugun fe luagu anihein lan somu ayumahani wuribati tidan hanigi ani aban hagidaruni hawariua, ani sefu lumutiña katei le luéi saragu asufuriruni (Sal. 73:12-17; 143:10).

SÚNWANDAN ARANSEÑU LUN WAGANBUNI LUMALALI HEOWÁ

17. Ka uagu peliguru lubéi hafiñerun gürigia hawougua?

¹⁷ Samina wamá luagun urúei Dawidi. Dan le meha nibureingili gañei lumuti Goliadi, aban hígandei filistéana. Lau lásügürün dan aba súdara lan ani lurúeite giñe aban néchani, góunigi lumutiña lílana linechani ani desidírü ligía saragu katei súdiniti. Gama lumoun, dan le lafiñerunbei luougua, aba teyeeduni lanigi, aba léiguadun lidoun aban figóu wéiriti tuma Betüsawé ani adüga ligía lun lafarún Uríasi, le tani Betüsawé weiriei. Dan le lererehanbei Heowá lun, ánhati lun lidurun lau ǘnabuguni ani ábaya labuidurun lumadagua luma (Sal. 51:4, 6, 10, 11).

18. Kaba íderaguawa lun waganbuni lumalali Heowá?

¹⁸ Sigí waméi adundehani le lídanbei 1 Korintuna 10:12 ani mafiñera wamá saragu wawougua. Kei le siñagua wabéi woungua lun ‘wadundehani wémeri guánarügü’, wafalarubei ladundehan Heowá, o ladundehan Satanási (Jer. 10:23, TNM). Ligíati, furíei wamá lun Heowá súnwandan ani sigí waméi ladundehan lani sífiri sandu. Anha, aganba waméi lumalali Heowá!