Katei san Lurúeitebei Larúeihan Bungiu?

• Bungiu anúadirubalin. “Ru naali nurúeite [...] lun níchuguni néchani burí bun balaganteme” íbini “lagumuhóun larigeirugu ubóu, níchugubei bun” (Sálumu 2:6, 8).

• Galagante lubéi lálana larúeihan Dawidi. “Águrahouaali aban irahü, rúhali Wabungiute aban isaani woun [...]. Lañuuruba luagu lálana larúeihan Dawidi; lachawaraguba lubafu le lánina larúeihan lidoun sun fulasu ani magumuchadibei darangilaü; lárügüdüba larúeihan buidu buidu” (Isaíasi 9:6, 7).

• Lídanba meha uburugu Belén lágurahoua. “Aba lálügüdaguniña halíaba lan lágurahoua Kristu. Aba hariñagun lun: ‘Belén, le lumúanrugubei Hudéa, ladüga ítara liña labürüdüni profeta’” (Matéu 2:4, 5).

• Meberesenbaña meha gürigia lau ani háfarubei meha hilagubei. “Meberesenwati lau, barǘ hamuti kei ni kata [...]; luéigiñe wamabuchahan lasufurira, muliliwati luagu wafigoun” (Isaíasi 53:3, 5).

• Láguyuguba meha, ibiha ligíame uéiriguni. “Mígirun bubadina lidan umúahaü, mígirunbadibu lun tañaladun nuani húyurugu [...]. Anihein óunwenbu ugundani biñuarü” (Sálumu 16:10, 11).

Hesukrístu Urúeibei le buídutimabei

Luágurügüñein Hesukrístu lagunfulira sun lira. Ariñagati aban ánheli tun María, to lúguchu Hesusu: “Larúeigüdübei [...] Bungiu lidan lubara larúeihan Dawidi, le lagücha [...] ani magumuchadibei larúeihan” (Lúkasi 1:31-33).

Lau sun meha marúeihan lan Hesusu dan le ya lubéi ubouagu, larúeihabaña gürigia siélugiñe keisi Lurúeite Larúeihan Bungiu. Ka uagu ligía lubéi urúeibei le buítimabei? Ariha waméi le ladügübei dan meha le lawinwandunbei ubouagu.

• Bereseti Hesusu hau gürigia. Íderagua lumutiña meha dandu wügüriña kei würiña, dandu nibureingiña kei wéinamugaaña, meberesenga halíana hamá ni anhein gaseinsun habéi o maseinsun hamá (Matéu 9:36; Márükosu 10:16). Dan le lariñagunbei aban gürigia gawaguti lépüra lun Hesusu: “Gayaraati bareidaguágüdünina ánhabu busén”, aba lagudemedagun gürigia ligía lun ani aba lareidaguagüdüni (Márükosu 1:40-42).

• Arufudahati Hesusu woun ida luba lan wagundaaragüdüni Bungiu. Ariñagati: “Siñati leseriwidúniwa lun Bungiu luma lun irisini”. Ariñagati giñe lunti lan wóuseruniña amu kei línsiñe woun lun wouserún. Arufudahati mámarügüñein lan lun le wadügübei letenira Bungiu, berese lan giñe lau le wasaminarubei luma le wasandirubei. Ligía lunti lubéi wóunigiruni le tídanbei wanigi gayara láamuga wagundaaragüdüni (Matéu 5:28; 6:24; 7:12). Arufudahati giñe Hesusu dánrügüñein lan wafurendeiruni ka lan lugundanbei Bungiu ani adüga waméi, ligíarügüñein lan wibihin ugundani le tímatimaati (Lúkasi 11:28).

• Arufuda lumuti Hesusu woun ida luba lan hínsiñehabu wamá. Hingí lumutu meha le lariñagubei luma le ladügübei Hesusu hanigi gürigia. Ariñagatu Lererun Bungiu: “Ma lueirin hanigi gürigia lau le larufudahabei, ladüga lau lan ubafu larufudaha” (Matéu 7:28, 29). Ariñagati houn: “Hínsiñe hamá háganiñu hun”. Ani ligía guánarügü afurieidubei hawagu ha áfarubalin hilagubei, ariñageina: “Núguchi, feruduna baña ladüga ibidiñeti houn ka lan hadügübei” (Matéu 5:44; Lúkasi 23:34).

Hesusu urúeibei le buídutimabei. Aranserúaali buidu buidu, hínsiñetiwa lun ani busenti líderaguniwa. Ídaba méhati lagumesera arúeiha?