Kaba san ladüga Larúeihan Bungiu?

LE ADÜGA LÁALIBEI LARÚEIHAN BUNGIU

Lidan arütíkulu le ásügürübei, akutiha wamuti seini le líchugubei Hesusu. Arufudati seini ligía gumeseeli lan Larúeihan Bungiu agumadiha sielu lau Hesukrístu keisi Urúei.

Ariñagatu Lererun Bungiu dan le lan lagumeserunbei Larúeihan Bungiu agumadiha, aba lan labuguni Hesusu Satanási hau sun lumafianu siélugiñe. Guentó, yárügaali gayara lan hadügün wuribani ani ligía gíbetimahali lubéi turobuli ubouagu lúmagiñe irumu 1914 (Arufudúni 12:7, 9).

Lau sun agadeireinatima liña lan katei ubouagu, adügaali Hesusu, le Lurúeitebei Larúeihan Bungiu, saragu katei buiti hawagu gürigia. Ladundehañein wadagimanu lánina arufudahani tídangiñeti Bíbülia le adügǘbei lidan sun Ubóu, le meha uágubei layanuha lidan profesía, le íderaguaalibei saragu míñunu gürigia afurendeirei luma afalarei adundehani méiniti le tídanbei (Isaíasi 2:2-4). Sun gürigia ha, furendeihaña arihei wadagimanu keisi lubudubu, abuiduragüdei habagari keisi iduheñu luma agundaara lau hámati mamudiraguagüdünga houngua lun. Íderagua tumutiña Lererun Bungiu lun buídutima lan habagari ani aranse tumutiña lun hádangiñe hamá gürigia ha labusenrubaña Bungiu lábugiñe Larúeihan.

KABA LADÜGA LARÚEIHAN BUNGIU YARAFA MADISE?

Lau sun gumeseeli lan Hesusu arúeiha sielu, añahagua gürigia arúeiha ubouagu. Ligía lariñagunbei Bungiu lun Hesusu: “Gumadibaña [...] báganiñu” (Sálumu 110:2). Málühali Hesusu agumucha hau sun láganiñu luma lau turobuli burí le adügübei lun hadiheridun gürigia ha busenbaña gaganbadi hamá lun Bungiu.

Anihán katei burí le lunbei ladügüni Larúeihan Bungiu yarafa madise:

• Lagumuchuba tau sun relihión mama inarünitu. Góubaguagüda tumutu Lererun Bungiu relihión mama inarünitu tuma aban horu to lunboun lagumuchúniwa tau yarafa madise. Ítara, úaarume relihión to arufudahatu iyeeni luagu Bungiu, adüga tuguya lun hénrengu lan habagari gürigia. Taweiriduba hanigi saragu gürigia danme le lasuseredun lira (Arufudúni 17:15, 16).

• Lagumuchuba lau harúeihan gürigia. Lagumuchuba Larúeihan Bungiu lau sun arúeihani le ubouagubei (Arufudúni 19:15, 17, 18).

• Lagumuchuba hau sun gürigia wuribatiña. Kábati asusereda houn ha mabusenrunbaña gaganbadi hamá lun Bungiu ni hígiruni wuribani? “Hahulúba [...] ubouagugiñe” (Ariñawagúni 2:22).

• Lagumuchuba lau Satanási hama lumafianu. “Meyeehandigia laaña[me]” Satanási hama lumafianu néchanigu (Arufudúni 20:3, 10).

Kábati asusereda houn gürigia ha busenbaña hawinwandun lábugiñe Larúeihan Bungiu?

KABA LADÜGA LARÚEIHAN BUNGIU HAWAGU GÜRIGIA?

Keisi urúei le agumadihabei siélugiñe, gíbetimabei katei ladügün Hesusu sügǘ lau furumiñeguarügü gumadimati ubouagu. Libihubei giñe hídehan 144,000 gürigia ha anuadirúbaña ubouagugiñe lun harúeihan luma (Arufudúni 5:9, 10; 14:1, 3). Ladügüba lun ladügǘniwa lugundan Bungiu ubouagu. Kábati ladüga Larúeihan Bungiu hawagu gürigia?

• Lagidarubei sandi luma óunweni. “Mariñagunbei ni aban lílana fulasu: ‘Sándiñadina’”, ani “úaalime óunweni” (Isaíasi 33:24; Arufudúni 21:4).

• Ladügüba lun ñein lan darangilaü luma ichouruni le inarüniti. “Buídubei dan houn [birahüñü]” ani “haganóuba súngubei manufudeuga, gayaraabei hemeraagun lábugiñe tamuñadiri hanadürigu” (Isaíasi 54:13; Mikeasi 4:4).

• Ladügüba lun ñein lan wadagimanu le ruti ugundani. “Harihubei numutuniña le hawadigimaribei lau háhabu. Mawadigimaridunbaña luagu ni kata” (Isaíasi 65:22, 23).

• Larumadahabei garabali, múa, duna luma katei líbeina lira. “Gundaalá fulasu mageirawati, múa mábeiti; buinla lau ugundani, legeleweha” (Isaíasi 35:1).

• Larufudahabei houn gürigia ka lan lunbei hadügüni lun hawinwandun lun súnwandan. “Anihán lébunabei ibagari le magumuchaditi, lun hasubudirunibu buguya le Bungiu ábanrügüti, le inarüniti, luma lun hasubudirunina, au Hesukrístu le bóunahabei” (Huan 17:3).

Busenti Bungiu lun heresibiruni abiniruni burí le (Isaíasi 48:18). Lidan leweñegua arütíkulu, harihubei le gayaraabei hadügüni guentó lun hibihini lubuidun ibagari le ámuñegü.