Ragǘ humá guentó luéigiñe lóubadina Larúeihan Bungiu!
Samina humá dagamémeeli lan aban óunwenbu herigini lidoun fulasu le ñein lubéi hawinwanda. Ábati híchuguni gumadimatiña eweridihani le: “FURÍ HUMÁ LAU LÓUFUDAGUN, ÁLUAHA HUMÁ ARAMUDAGUAGÜLEI!”. Kaba hamuga hadüga? Ma hídiña hamuga lidoun aban fulasu chóuruti?
Anite aban katei le ítarati kei “herigini” wawagun. Wati Hesusu lun dan ligía “saragu asufuriruni” (Matéu 24:21). Lau sun siñá lan wanurahan luéi, anihein aban katei le gayaraabei wadügüni lun werederun wínwanñu. Ka katei?
Dan le meha líchuguña lubéi Hesukrístu aban yanu lóubawagu aban wübü, ru lumuti adundehani le: “Áluaha huméi larúeihan luma liricha Bungiu furumiñe” (Matéu 6:33). Ka mini lubéi le?
Áluaha huméi Larúeihan Bungiu furumiñe. Mini lan le lunti lan súdinitimati lan Larúeihan Bungiu woun sügǘ lau furumiñeguarügü amu katei (Matéu 6:25, 32, 33). Ka uagu lunti lubéi wasaminarun ítara? Ladüga úati ni aban wádangiñe gayaraati laransehani turobuli burí le ubouagubei. Búngiurügüñein gayara ladügüni.
Áluaha huméi liricha Bungiu. Mini lan le lunti lan wáfaagun lun gaganbadi wamá lun lilurudun luma ladundehan Bungiu. Ka uagu? Lugundun wuribabei lidin woun ánhawa anúadirei woungua ka lan buídubei lumoun le wuribabei (Ariñawagúni 16:25). Ani ánhawa gaganbadi lun lugumadin Heowá, wadügüba lun lagundaarun ani buídubei lidin woun (Isaíasi 48:17, 18).
“Áluaha huméi larúeihan luma liricha Bungiu furumiñe”. Ka uagu lariñagei Hesusu lira? Leweridihaña meha luagu gayara lan habulieidagun gürigia asaminara chóuruñu haba lan ánhaña áfaagua lun hagañeiruni sun seinsu le hayaraati. Ani ñéinbaña lan giñe amu ha wéiriti hadiheridun luagu habihini katei burí le hemegeirubei darí lun meredebei lan dan houn lun háluahani Larúeihan Bungiu (Matéu 6:19-21, 25-32).
Füramaseti Hesusu houn sun ha árügüdübaña luéigiñe lóubadina Larúeihan Bungiu luagu habihibei lan sun le hemegeirubei uguñe weyu, ibiha hagíame saragu abiniruni ámuñegü (Matéu 6:33).
Lau sun meha áluaha hamani furumiñetiña lani Hesusu disipulugu Larúeihan luma liricha Bungiu furumiñe, marihin hamuti meha lagumuchun asufuriruni. Íbini ítara, daritiña aban aramudaguagülei inarüniti. Ida?
Adügati gaganbadi hamá lun lugumadin Bungiu le richabei lun hesefurun luéi asufuriruni le ídangiñebei hásügüra ha maganbadibaña lun Heowá. Íderagua lumutiña meha lueirin afiñeni le hawagubei luagu liábinba lan Larúeihan Bungiu íbini dan le hagagibudagun luma turobuli le hénrengutimabei lidan habagari. Ruti giñe Bungiu “óunwenbu ubafu” houn lun hawandun (2 Korintuna 4:7-9).
HÁLUAHABEI SAN LARÚEIHAN BUNGIU FURUMIÑE?
Gaganbaditiña meha furumiñetiña kristiánugu lun gumadi le líchugubei Hesusu houn luáguti háluahani Larúeihan Bungiu furumiñe. Apurichiha hamuti uganu buiti luáguti Larúeihan Bungiu lidan sun fulasu le luéigiñebei oubaü le ñein lubéi meha hawinwanda ubouagu (Kolosana 1:23). Añahein san adügüti ligíameme uguñe weyu?
Anha! Subudi hamuti gefentiña luagu Heowá murusunrügaali lan dan lubá lagumuchun Larúeihan Bungiu lau sun le wuribabei ubouagu. Ligía háfaagunbei lun hagunfulirun lau le lariñagubei Hesusu: “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu” (Matéu 24:14).
Kaba hadüga danme le haganbuni uganu buiti le? Amisuraha wamutün áyeihaña lílana uburugu masedóniana le meha gíribei Beréa lidan furumiñeti sígulu. Dan le haganbunbalin gürigia hagía uganu buiti luáguti Larúeihan Bungiu le lapurichihabei apostolu Pábulu houn, resibi hamuti lau ugundani ani akutiha hamuti le tariñagubei Lererun Bungiu buidu buidu lun harihini “anhein inarüni lubéi le ariñawagúbei houn” ani winwan hamuti giñe le hafurendeirubei (Adügaü 17:11, 12).
Gayaraati hadügüni ligíameme. Anhein háluaha Larúeihan luma liricha Bungiu furumiñe, hadariruba aramudaguagülei dandu guentó kei ámuñegü ani hawinwanduba lidan darangilaü luma ichouruni lun súnwandan.