Buiti le lanügübei adamuridaguni lubá apurichihani
1. Ka burí katei le meha wibihibei lidan Taturiahóun Líburu lidan Damuriguaü gayarabei wibihini lidan sétanu lánina apurichihani?
1 Álugatün san luagu somu katei lídangiñe Taturiahóun Líburu lidan Damuriguaü? Darangilutimati meha katei lidan sétanu burí ligía ani buítiha lun hadügǘn umadagu (Ari. 18:24). Íbiri le alidihabalin taturiahóun líburu ténitiha lun ida waña lan ani ru lumuti meha ídemuei le wemegeirubei woun (Ari. 27:23; 1 Fe. 5:2, 3). Gayaragili wibihini sun katei buiti le lidan sétanu le lánina apurichihani.
2. Ka gayarabei hadügüni lun hadügün umadagu buítiña lidan sétanu le úmabei háfurida apurichiha?
2 Adüga humá umadaguaü hama íbirigu. Libe-agei dan ligíameme hanumerunbei íbirigu ha lídanbaña aban sétanu lánina apurichihani luma hanumerun íbirigu ha meha lídanbaña sétanu lánina taturiahóun líburu. Dan le weseriwidun lidan ministeriu “lidan aban” hama amu íbirigu, adügatiwa umadagu buítiña (Fili. 1:27). Lidan sétanu le ñein hubéi, átirihaña íbirigu úmatiña háfurida apurichiha? Ida liña harihin lun ánhadün áfaagua lun háfuridun hama súngubei lun haganwoundagüdüniña humadagu? (2 Ko. 6:13.) Gayarati giñe hamisurahan fiú hádangiñe íbirigu ha lídanbaña sétanu lun heigin úara o lun hadügüni Guñoun lánina Áhuduraguni lidan Familia. Lidan fiú damuriguaü, adügatiña lílana sétanu burí le lánina áfuriduni apurichiha aransehani lun hamisurahani íbiri le achülürübei íchiga yanu lidan damuriguaü lun leigin hama. Dan le lachülürün hidaani, aba lóundarun sétanu lun gayara lan heigin úara, íbini siñá lan lidin íchuguti yanu eiga hama.
3. Ida liña gayara lan wibihin ídemuei lun lederebugudun wafiñen lidan sétanu burí le lánina apurichihani?
3 Mama ladüga biámarügaali lan weyu luagu dimaasu wadamuridagun keisi damuriguaü lun meresibirun hamaali lan íbirigu ligiaméme ídemuei hámagiñe wéiyaaña lidan afiñeni. Hani íbirigu ha arihibaña lau kada sétanu buligasion lun híchugun gurasu houn íbirigu, íderagua hamañame lidan le hemegeirun ani íderagua hamañame giñe aransera lubá hani ministeriu. Anhein máfuridungidün lubéi apurichiha luma íbiri le óunigirubalin hani sétanu, ka uagu mariñagun hubéi lun busén humá háfuridun luma? Ani aban wéiyaasu luagu hati, ñǘdünti íbiri le arihibei lau apurichihani abisidaha aban lídangiñe sétanu burí le. Lidan burí damuriguaü le ñǘbüriti, háfuga abisidaha lumuti kada sétanu bián wéiyaasu luagu irumu. Adügatün san aransehani lun háfuridun apurichiha dan le lidin íbiri le arihibei lau apurichihani abisidahei hani sétanu?
4. a) Ida liña san aransehani le lunbei ladügǘn lubá adamuridaguni lánina apurichihani? b) Ka uagu lunti lubéi wasaminarun wafuredeirunu waban lun gayara lan ladügǘn adamuridaguni le wábiñe?
4 Gíbeti katei buiti lanügün hóundaragun íbirigu lidan ámuñegueinarügü sétanu samudi luma dimaasu. Furumiñeti, dan le anihein lan saragu sétanu áfuriduti lídangiñe ámuñegueinarügü fulasu lidan ligiaméme oura, ménrenguntimati houn íbirigu lun hachülürün lidoun adamuridaguni le lánina apurichihani luma lun houdin lidoun fulasu le ñeinba lubéi hapurichiha. Sensiyutimati giñe hafanreinhóun íbirigu ani gumese hagía apurichiha sin hadarasahan. Lagumuhóun, buídutimabei letenirun íbiri le arihibei lau sétanu ligía houn íbirigu ha lábugiñebaña laríahan. Ani íbini ítara, según léibugun katei, anihein dan gayarabei lan lóundarawagun biama o lóugiñe biama sétanu lidan aban. Anhein óundaragua sun lílana damuriguaü lun hapurichihan lidan furumiñeti samudi lidan hati o dan le lásurun taturiahóun Garüdia Atalaya, buiti lun hañuurun lílana kada sétanu úara ani lun ladügüni íbiri le arihibei lau kada sétanu aransehani lubaragiñe ladügǘn furíei lubá háfuridun. (Ariha huméi rekuaduru “Gayarati san hafuredeirunu huban?”.)
5. Íbini úaali lan Taturiahóun Líburu lidan Damuriguaü, ka gayarabei wachoururuni?
5 Íbini madügǘnwaali lan Taturiahóun Líburu lidan Damuriguaü, rumeme lágili Heowá le wemegeirubei lun wadügüni lugundan (Ebü. 13:20, 21). Ladügüba lun memegeirun wamá ni kata (Sal. 23:1). Dará lumuti adamuridaguni lubá apurichihani üma lun saragu abinirúni. Ligíati desidírü wamá waganwoundagüdüniña wamadagu, lugundun “le gíbeti lábunagun, gíbebei giñe lalubahan” (2 Ko. 9:6).
[Iyawaü to lídanboun páhina 6]
Gayarati san hafuredeirunu huban?
Lidan fiú damuriguaü mosu hóundaragun saragu sétanu le lánina apurichihani samudi luma dimaasu ladüga lóugua tan muna to ñéingiñe lubéi gayara lan háfuridun. Adamuridaguni le adügǘbei lubá wáfuridun apurichiha, ligía aban fánreinti lídangiñe programa lánina arufudahani le lídanbei damuriguaü, ligía aban lubéi lubuidun chansi lúmagiñe Heowá gayara lan ladügǘn wábiñe. Gayarati san hafuredeirunu huban? Íbini anhein sensiyu tubéi huban, masaminara humá siñá lan hafuredeirunu. Le lunbei háluahani íbirigu, anhein buidu lubéi fulasu le ñein tubéi luma amu burí katei le lunbei gabaroun hamani dan le hanúadahan halíaba lan meha ladügǘwa taturiahóun líburu. Anhein busén hubéi hafuredeirunu huban, ariñaga huméi lun íbiri le arihibei lau apurichihani.