Seingü katei súdiniti lun wadarirun gürigia ha busentiña haturiahan
1. Ka lunbei wadügüni anhein madarigidiwa lubéi gürigia ha busentiña haturiahanu Bíbülia, ani ka uagu?
1 Hénrenguti san hun hadarirun gürigia ha busentiña haturiahanu Bíbülia? Mabuchadalá huagu, sigí humá áluaha. Biní lumutiña Heowá gürigia ha asigirubaña adügei lugundan (Gal. 6:9). Anihán seingü adundehani, chóuruti líderagubadün lan.
2. Ida liña gayara lan wagumeserun aban aturiahani tídangiñeti Bíbülia dan le wálügüdüniña gürigia anhein busén habéi haturiahan?
2 Busentün san haturiahanu Bíbülia? Saragu gürigia subudi hamuti apurichiha wamá tau Garüdia Atalaya tuma ¡Despertad!, gama lumoun, ibidiñeti houn ru wamá giñe aturiahani tídangiñeti Bíbülia. Leweñegua háfuridun apurichiha muna tuagu muna, ka uagu mariñagun hubéi houn gürigia furangu ru humá aturiahani tídangiñeti Bíbülia? Ariñaga huméi giñe houn gürigia ha burí habisidahabaña. Ánhaña ariñaga hun mabusenrun hamá, sigí humá anügoun agumeiraguagüdüni houn lun hasigirun afurendeira. Anihein aban íbiri barühali meha saragu irumu anaahoun garüdia houn aban feru maríeitiña. Aban weyu aba lidin íchigoun to iseritimagiruboun houn, ani lárigiñe layouragun houn, aba desidírü lan lálügüdüniña: “Hínsiñeti hamuga san hun haturiahanu Bíbülia?”. Magurabun lumuti yebe, gama lumoun ariñagatiña lun anha, ani guentó badiseihaña biángubei.
3. Ka uagu moun lumuti lubéi wasaminarun sun lan gürigia ha achülürübaña tidoun Luban Wadamuridagun haturiahañoun lan Bíbülia?
3 Ayanuha humá hama gürigia ha achülürübaña tidoun Luban Wadamuridagun. Masaminara humá lau ichouruni sun lan gürigia ha achülürübaña lidoun adamuridaguni haturiahañoun lan Bíbülia. Ariñagati aban íbiri: “Hibe-agei gürigia ha únbaña níchiga aturiahani, lidan adamuridaguni nadariraña”. Anuhein meha aban gürigia maniñudügütu barütu keinsi irumu abasiiha tidoun Luban Wadamuridagun úara hama tisaanigu badiseihaña. Súnwandanha tachülürün dan le lúnhali latatirun adamuridaguni, ani kei lagumuchun aban tidin. Aban weyu, aba desidírü tan aban íbiri tálügüdünu anhein busén tubéi taturiahanu Bíbülia. Ánhatu gürigia tuguya ani lau lásügürün dan, aba tabadiseirun. Aba tabürühan íbiri tugía: “Kame funa nagurabaha keinsi irumu lubá nálügüdünu anhein busén tubéi taturiahan!”.
4. Írida humá fiú manera ida liña lan gayara lan wíderagun amu íbirigu lun gayara lan wibihin somu gürigia le busenti laturiahanu Bíbülia.
4 Áluaha humá híderagun amu. Anuhein aban íbiri súnwandan tidin hama amu íchiga aturiahani. Lárigiñe aturiahani, aba tamuriahan üma tuma íbiri to arufudahaboun lun tálügüdüni aturiahati anhein subudi lubéi somu gürigia le busenti laturiahanu Bíbülia. Gayarati giñe wálügüdüniña gürigia ha wabisidahabaña ani ígira wamaaru líburu Kátima san houn anhein subudi habéi somu gürigia le busenbei leresibirun aban tibe líburu to. Gayarati giñe añahein lan apurichihatiña o prekursorugu ha siñati hetenirun lun somu gürigia le busenti laturiahanu Bíbülia. Ka uagu mariñagun hubéi houn gayara lan hetenirun lun gürigia ligía?
5. Ka uagu buidu lubéi wálügüdüniña hani wíbirigu weiriei o weiriou ha mafiñetiña luagu Heowá anhein busén habéi haturiahanu Bíbülia?
5 Adimureha humá tuma o luma úmari le mama gefenti luagu Heowá. Añahein san íbirigu lidan hadamuridagun ha maríeitiña hama gürigia ha mama gefentiña luagu Heowá? Añahein gürigia mínsiñeti houn lun lapurichihan hani weiriei o weiriou houn, gama lumoun ánhatiña haturiahan hama amu gürigia ha mama haduheñu. Libe-agei dan, buítimati hayanuhan furumiñe luma le genfenti luagu Heowá lun hasubudiruni ida luba lan hayanuhan tuma lani weiriou ani ida luba lan hadügüni.
6. Ka uagu súdini lubéi furíei lun wadarirun aban gürigia le busenti laturiahanu Bíbülia?
6 Amuriaha humá ídemuei luma Heowá. Mabulieida huméi gabafu lan furíei (Sant. 5:16). Füramaseti Heowá laganbubei lan wafurieidun anhein úara lubéi luma lugundan (1 Huan 5:14). Aban íbiri le bereseguheiti aba lamuriahan luma Heowá lun líderaguni adarira aban aturiahati. Ánhounti lani weiriou, nidiheritu luagu madaanibei lan lun letenirun lun aturiahati ligía, ánheintima adarira aban gürigia le gíbeti liturobulin. Aba lubeiti tariñaguni lun Heowá lidan furíei ka lan tidiheribei. Aganba lumuti Heowá hafurieidun biángubei lugundun bián dimaasu lárigiñe, aba tadarirun aban prekusora aban gürigia le busenti laturiahanu Bíbülia ani aba tayanuhan luma íbiri ligía lun letenirun lun gürigia ligía. Abürühatu íbiri tugía: “Ha asaminarubaña siñabei lan híchugun aturiahani tídangiñeti Bíbülia, ariñagatina houn lun mígirun hamani hafurieidun ani lun furangu lan hariñaguni lun Heowá ka lan haturobulinbei. Masaminarungubeitiwa meha wasandiruba lan aban ugundani le wéiriti kei le”. Anhein mabuchadun huagu, gayarabei giñe hadarirun aban gürigia le busenti laturiahanu Bíbülia ani gúndaabadün lau híderaguni éibuga luéigiñe “üma le anügübei gürigia lidoun ibagari” (Mat. 7:13, 14).