Gúndaatiwa lau resultóu le wibihibei luagu wawadigimari
1. Ka gayarabei ladügün lun weferidiruni wagundan lidan wani ministeriu?
1 Adüga lumutiña Bungiu gürigia lun gayara lan ‘hefeduhani le hagañeirubei luagu hawadigimari’ (Apur. 2:24). Ligíati, dan le marihin wamá resultóu buiti lidan wani ministeriu, gayarati weferidiruni waguraasun luma wagundan. Kaba wadüga lun wasigirun arufuda aban lubuidun igaburi?
2. Ka uagu moun lumuti lubéi wagurabun katei le lunbei masuseredun lan?
2 Maguraba wamá katei le lunbei masuseredun lan. Íbini fiúrügüñanu lan meha gürigia afalarei le larufudahabei Hesusu, úabei ni aban ariñaguti wuriba lan meha lidin lun lidan lani ministeriu (Huan 17:4). Lidan hénpulu le labahüdagubei Hesusu luagu wügüri ábunaguti, ariñagati aban profesía ñeinboun lan buga ámuñegueinarügü tuwuyeri anigi to ídanboun mawanserunbei lan meha lila uganu luáguti Larúeihan Bungiu (Mat. 13:3-8, 18-22). Gama lumoun, ariha waméi ka lan lánibei wáfaagun resultóu.
3. Ida liña wíchugun lubuidun alunbahóuni íbini maganbun hamaniwa gürigia?
3 Ida liña wíchugun alubahóuni? Lidan abahüdaguni luáguti ábunaguti ilaü afuranguagüdati Hesusu híchuguba lan buga gürigia ha ánharubaña lun uganu luáguti Larúeihan Bungiu “alubahóuni” (Mat. 13:23). Dan le laweiridun aban lugule türigu ani egeleweha ligía, mama burí iseri ugulei áhüchübei luagu, rúrügüti burí iseri ilaü. Ítarameme, alubahóuni le líchugubei somu kristiánu mámarügüñein ladügün iseri disipulugu mini lan, lubaragiñe lira, mini lan lagibedaguagüdüni ilaü, lidan amu dimurei, layanuhan saragu wéiyaasu luagu ugunu luáguti Larúeihan Bungiu. Ruti “buiti” le wibihibei lau wadügüni lira saragu ugundani woun, meberesenga ka lan ligaburibei hóunabun gürigia. Dan le wapurichihan ídehatiwa lun inebewa lan liri Heowá (Isa. 43:10-12; Mat. 6:9). Aban lubuidun chansi weseriwidun kei ídehatiña luma Bungiu (1 Ko. 3:9). Ani gúndaati giñe Heowá dan le wayusuruni wayuma lun “wíchugun eteingiruni lun” (Ebü. 13:15, 16).
4. Ka resultóu gayarabei lanügün wani ministeriu sin wíchugun fe?
4 Haritagua waméi giñe mámaba lan súnwandan warihei resultóu le lanügübei saragu wadagimanu le wadügübei. Másiñati ñéinñanu lan meha fiú hádangiñe gürigia ha aganbubalin lapurichihan Hesusu ha adügübaña lánigume disipulu darí lárigiñe lagumuchuni lani ministeriu ubouagu. Ítarameme, gayarati giñe tárübei lan labouchun ilaü le lánina Larúeihan Bungiu le wábunagubei tidan hanigi gürigia, lugundun gayarati lachülürün gürigia ligía lun aban lan gefenti luagu Heowá sin wíchugun fe. Furanguti gibe lan buiti le lanügübei wani ministeriu. Ligíati, wabaruaguóun wamá lun ‘gibe lan in wíchugun’, arufuda wamaamugei lani wamá Hesusu disipulugu (Huan 15:8).