Barǘ humaña profetagu keisi aban hénpulu: Honasi
1. Ka meha igaburi buiti luágubei Honasi?
1 Ka ñǘbuinbei lidoun wachügü dan le wasaminarun luagu profeta Honasi? Añahein saminatiña aban lan meha wügüri hanufudeti, deré tuguya lanigi. Gama lumoun, aban meha wügüri ǘnabuguti, ganigiti ani aranseñu liña meha lun ladügün sákürifisiu. Ida luba wáyeihani lani hénpulu? (Sant. 5:10.)
2. Ida luba wáyeihani ǘnabuguni le larufudubei Honasi?
2 Ǘnabuguti. Dan leresibirunbalin Honasi wadagimanu le ichugúbei lun, lubaragiñe hamuga lárügüdün lidoun fulasu le ñeinhin lubéi lóunahoua, ábarüga lanurahan lidoun le aban oubaü. Maweiriduntu wanigi luagu le, ladüga aganbahóuati meha luagu hanarime hamá asiriana. Ariñawagúati meha giñe luagu Níniwe: “Uburugu ñein lumuti hagundaara lau háwiyuragüdün hitaü” (Naún. 3:1-3). Gama lumoun, ererehati Heowá lun Honasi ábati líchugun ábaya chansi lun lun gaganbadi lan, ani lau ǘnabuguni aba ladügüni le ariñawagúbei lun (Ari. 24:32; Hon. 3:1-3). Íbini áluga lan yebe lanurahan furumiñe luéi lagunfuliruni wadagimanu le ichugúbei lun, dan lárigiñe, adüga lumuti Honasi lugundan Bungiu (Mat. 21:28-31). Angia san wagía, aranseñu waña san lun wasigirun apurichiha íbini lárigiñe lererehóuniwa woun o dan le hénrengu lan lapurichihóuniwa lidan fulasu le atokarubei woun?
3. Ka uagu megei wabéi ganigi wamá luma lun aranseñu wamá lun wadügün sákürifisiu lun wagunfuliruni wani ministeriu?
3 Ganigiti ani adügati sákürifisiu. Dan le líchugunbei Honasi fe luagu ru lani habagari mádulungu lidoun peliguru lau le desidírü lubéi, himei lumuti lounwen lubaragiñe heferiduruni gürigia hagía habagari (Hon. 1:3, 4, 12). Dan lárigiñe, dan le aniha lan agunfulira lau luadigimari Níniwe, éibuga lumuti uburugu ligía darí lumoun lamidangua, háfuga lun láluahan aban fulasu buiti lun ñéingiñeba lan lasubudiragüdei laguseragüdün Heowá. Madügün lubéi hamuga aban gürigia hanufudeti katei le, gürigiarügüñanu ganigitiña adügei lira (Hon. 3:3, 4). Ka wafurendeirubei lídangiñe le? Mégeitiwa lan wamuriahan ganigi luma Bungiu lun wasigirun asubudiragüdei luganute íbini añahein lan gürigia kóntüratiña woun (Adü. 4:29, 31). Furendeitiwa giñe lunti lan warufudun aranseñu waña lan lun wadügün sákürifisiu lau wayusuruni wadaani luma sun wámati lidan ministeriu (Adü. 20:24).
4. Ka uagu mosu lubéi wararamagun asaminara luagun lubuidun burí hénpulu le meha híchugubei profetagu?
4 Ságüme waliihan somu abahüdaguni hawagu lani Bungiu profetagu, buídubei wáfaagun lun wíchaagun woungua lidoun halugaarun. Álügüdagua wamá woungua: “Lun hamuga nuguya lan ligía, kaba hamuga san nadüga? Ida luba san náyeihani lubuidun ligaburi lidan nibagari?” (Ebü. 6:11, 12). Tídanme amu Wani Ministeriu lakutihóuba ka lan gayarabei wafurendeiruni hámagiñe amu lani Bungiu profetagu ha meha úaraguabaña.