Sétiñu waña san lun wasansiruni ligaburi wapurichihan?
1. Kei le asansiragueina liña lubéi léibugun katei ubouagu, ka lunbei wadügüni?
1 Asansiragueina liña léibugun katei ubouagu. Ani adügati asansiruni burí ligía lun giñe asansiheina wamani ligaburi wapurichihan, lóurate wáfuridun apurichiha luma ligaburi wachülürün lau inarüni houn gürigia. Aransetiwa san lun wadügüni?
2. Ka lunbei wadügüni lun wawanserun úara tuma lóundarun Heowá?
2 Ligaburi wapurichihan. Súnwandan ladügün damuriguaü kristiánu asansiruni. Dan le meha lóunahanbaliña Hesusu lani disipulugu apurichiha luagu furumiñeti wéiyaasu, ariñagati houn lun manügün hamá seinsu manügün hagíame lagei ni kata (Mat. 10:9, 10). Gama lumoun, kei le subudi lani luagu añaheinbaña lan abusenrutiña hadügün dañu houn ani lawanseruba lan hawadigimari lidoun amu burí fulasu, aba ladügün asansiruni lidan adundehani ligía (Luk. 22:36). Lidan sígulu le ásügürübei, adügeina tiña lóundarun Heowá asansiruni lidan apurichihani según le mégeiwabei lidan kada dan. Kei hénpulu, yúsuatu meha tarjeta lun lapurichihóun tau, apurichihóuati meha tídangiñe radiu ani yúsuatu giñe karü tau radiu tidan lun lapurichihóun úmada úmada. Uguñe weyu anihein saragu fulasu le ñein lubéi hénrengu lan hadarirún gürigia hábiñe; ligíati wéiritimahali lubéi lichugún adundehani lun wíchuguni uganu buiti houn gürigia ñein lumuti wadariraña, íbini dan le mama la wapurichihaña, lun gayara lan wóustaragüdüni apurichihani muna tuagu muna. Ani lun wadariruniña ha nadagimeinbaña sun weyu, ibihaadiwa adundehani lun wáfuridun apurichiha guñoun. Chóuruti aranseheinatiñalin lan likarün Heowá témeri. Sigí wamutu san ani awanse wagía úara tuma? (Ese. 1:20, 21.)
3. Ka gayarabei wadügüni lun buídutima lan lani wani ministeriu resultóu?
3 Le gayarabei wariñaguni. Ka burí katei adiheridagüdübaliña gürigia ha únbaña wapurichiha? Liserun ibagari? Familia? Wuribu? Dan le subudi wamani le asuseredubei luma ka lan gádanbaliña gürigia, seriwiti woun lun buídutima lan wapurichihan (1 Ko. 9:20-23). Dan le hayanuhan gürigia woun luagu hadiheri, lubaragiñe óunabarügü wamaniña ani aba wasigirun ayanuha, buídutimabei lun wasansiruni tema le buga uágubei wayanuha lun wayanuhan luagu le adiheridagüdübaliña.
4. Ka uagu lunti lubéi wéchudun lau lóufudagun luagu sun asansiruni?
4 Málühali agumesera óunwenbu asufuriruni. “Murusunrügaali dan wabá.” (1 Ko. 7:29.) Súdiniti lubeiti lun wéchudun lau lóufudagun luagu sun asansiruni le ñǘbuinti. Ítararügübei gayara lan wadügüni sun wayaraati lidan murusun dan le mégeigilibei.