Báfaaguña san lun bibihin buligasion lidan damuriguaü?
1. Lúmagiñe ídaba gayara lan lafalaruni aban wügüri adundehani le lídanbei 1 Timotéu 3:1?
1 Ariñagati 1 Timotéu 3:1: “Anhein abusenra aban gürigia lun alidihatibei lan, aban wadagimanu buiti labusenrubei ladügün”. Dimurei burí le labürüdagüdübei Bungiu le, ínchaha lumutiña wügüriña lun háfaagun lun heresibirun buligasion lidan damuriguaü. Mosu san bagurabun bawügüridun lubá badügüni lira? Uá. Buídutimabei ánhabu gumesegiñe. Gayarabei larufudahóun bun lúmagiñe guentó, áyeihabeime igaburi le mégeiwabei lun beseriwidun kei ídehati lidan damuriguaü (1 Tim. 3:10). Badiseihadibu san? Ariha waméi ka lan gayarabei badügüni lun beseriwidun lidan damuriguaü.
2. Ka lunbei badügüni lun bayumahan bíderaguniña íbirigu, ani ka burí katei gayarabei badügün hawagu amu?
2 Ayumahabá bídehan. Madügabéi ladüga busén ban bibihin aban ubaraü íñuguti lidan damuriguaü, adügabéi ladüga busén ban ‘badügün aban wadagimanu buiti’, le lunbei lanügün buiti houn amu. Lun lira, mosu bayumahan bíderaguniña íbirigu. Líderagubadibu basaminarun luagu lani Hesusu hénpulu (Mat. 20:28; Huan 4:6, 7; 13:4, 5). Anhein hénrengu lubéi bun bebereserun hawagu amu, amuriahabá ídemuei luma Heowá (1 Ko. 10:24). Anihein san somu katei le gayarabei badügüni lun bíderaguniña íbirigu ha sándibaña o ha wéiyougaaña? Gayarati giñe bídehan lidan taransehóun Luban Wadamuridagun, kéiburi arumadahei o aransehei fuluri-agei. Angia hamuga lun bariñagun lun íbiri le arihibei tau Leskuela Kristiánu gayarabei lan bíchugun somu yanu o fánreinti anhein ua lubéi kaba lan adügei? Barihubei wéiribei lan bugundan ánhabu eseriwida houn amu (Adü. 20:35).
3. Ka katei súdinitimabei lun leseriwidun aban gürigia lidan damuriguaü, ani ka lunbei ladügüni lun libihini?
3 Héregüdabei bumadagua luma Heowá. Lun leseriwidun aban gürigia lidan damuriguaü, súdinitimati buidu lan lumadagua luma Heowá sügǘ lau buidu lan lidan somu wadagimanu. Áfaaguati gürigia le buídubei lumadagua luma Heowá lun lasaminarun kei ligía samina ligíame kei Hesusu (1 Ko. 2:15, 16). Arihúati lidan ligaburi luagu áyeiha lani “igaburi le líchugubei [s]ífiri” (Gal. 5:22, 23). Ru lumuti Larúeihan Bungiu lidan furumiñeti lúgaaru ani góudidati apurichiha (Mat. 6:33). Lun buidu lan bumadagua luma Heowá, mosu baliihanu Bíbülia sagü weyu, baliihanu sun Garüdia Atalaya tuma ¡Despertad! mosu baranserun lubá kada adamuridaguni meferidirun buguyame ni aban (Sal. 1:1, 2; Ebü. 10:24, 25). Dan le lamisurahanbalin Pábulu Timotéu, lumada le meha nibureingilibei, lun lawanserun lidan leseriwidun lun Bungiu, ariñagati lun: “[Góunigibei] le barufudahabei” (1 Tim. 4:15, 16). Aransebá lubeiti buidu lubá bíchuguni biyanun tidan Leskuela Kristiána lánina Apurichihani, aranse buguyame lubá apurichihani. Hechubá apurichiha. Saminabá luagu le gayarabei badügüni lidan beseriwidun lun Heowá, kéiburi beseriwidun kei prekursoru, Betelirugu o bidin tidan Leskuela Kristiánu houn Wügüriña Mamarieidungiña ani áfaaguaba lun bibihini. Lóunigirubadibu béredagüdüni bumadagua luma Heowá luéi “luriban hayumahan nibureingiña” (2 Tim. 2:22).
4. Ka uagu súdini lubéi lun úaragua lan aban gürigia gafiñerúadi ligíame luagu?
4 Úaraguaba afiñewa ligíame buagu. Dagati meha aban ümi lidan furumiñeti sígulu ani áfaga hamuti meha giñe lílana damuriguaü. Ábati hanúadirun apostolugu “wügüriña [...] ha gafiñerúati hawagu” ani úaraguatiña, lun hafanreinhani éigini. Kei meha subudi habalin hadügübei lan wügüriña hagía hawadigimari buidu, gayarati meha hetenirun lun katei le súdinitimati (Adü. 6:1-4). Ka bafurendeirubei lídangiñe katei le? Mosu lan badügüni sun biyaraati lun badügüni wadagimanu le ichugúbei bun buidu. Áyeihabei lani Noé hénpulu, le meha adügübalin katei kei aubei lariñawagúa lun dan le ladügübarun árüka (Agu. 6:22). Gebegiti úaraguni lun Heowá ani dan le úaragua lan aban gürigia arufuda lumuti derebuguhali lan lidan lafiñen (1 Ko. 4:2; aliihabéi rekuáduru le gíribei “Lisudinin larufudahóun houn gürigia”).
5. Ka uagu lunti lubéi hamuga háfaagun wügüriña nibureintiña lun heresibirun buligasion lidan damuriguaü?
5 Ítara kei lariñawagún lidan profesía, lóufudahañein Heowá alubahani (Isa. 60:22). Badiseitiña kéiburi 250,000 gürigia sagü irumu. Hau saragu iseri gürigia óundara hamoun lumutuniña Heowá, mégeiwatiña wügüriña ha buiti hamadagua luma Bungiu ani gafiñerúadi ligía hawagu lun hetenirun lun ámuñegueinarügü buligasion lidan damuriguaü. Gíbetimarügaali wadagimanu lunti ladügǘn lidan eseriwiduni lun Heowá uguñe weyu (1 Ko. 15:58). Ligíati, nibureintiña ha áfaagubaña lun habihin buligasion lidan damuriguaü busentiña aban wadagimanu buiti.
[Rekuáduru le lídanbei páhina 2]
Hau saragu iseri gürigia óundara hamoun lumutuniña Heowá, mégeiwatiña wügüriña ha buiti hamadagua luma Bungiu ani gafiñerúadi ligía hawagu lun hetenirun lun ámuñegueinarügü buligasion lidan damuriguaü
[Rekuáduru le lídanbei páhina 3]
Lisudinin larufudahóun houn gürigia
Hadügüña wéiyaaña lidan afiñeni buiti houn nibureintiña ha rútiña aban lubuidun hénpulu dan le híchugun wadagimanu houn arufuda hameime houn ida luba lan hagunfuliruni. Aban hénpulu, abahüdaguati aban óunigiruti sirkuitu lárigiñe lan aban adamuridaguni aba lan lañuurun luagu plataforma adimureha luma aban íbiri lun líchugun gurasu lun. Aba larihin aban nibureinti yarafa houn, ábati lálügüdaguni anhein lagurabahañein lubéi lun layanuha luma. Aba lariñagun nibureinti ligía lun lun lan latokara lásügüragüdünu aspiradora luéigiñe plataforma sagü lásurun adamuridaguni. Aranseeña meha lagübürigu lun houdin, gama lumoun mabusenrunti meha lidin sin lagunfuliruni lani buligasion. Lau sun lugundan, aba lagidarun óunigiruti sirkuitu ñéingiñe. Dan lárigiñe, aba lariñagun: “Súnwandan meha aranseñu haña lan wéiyaaña lidan afiñeni ha lídanbaña damuriguaü ligía lun harufudahan houn nibureintiña ha buíduti hamadagua luma Bungiu lau híchugun buligasion houn. Ligíati sagü lubéi meha nidin bisidei damuriguaü ligía, hariñagun wéiyaaña nun luagu aranseeli lan somu nibureinti lun leseriwidun kei ídehati lidan damuriguaü”.