Huuti páhina jw.org lun larufudahóun houn isaanigu
1. Ka uagu ladügǘwa seksióun le gíribei “Niños” lidan páhina jw.org?
1 Adügǘwati wani páhina lidan Internet, jw.org, houn sun gürigia meberesenga ka lan harumudiribei. Aban hénpulu, ídehati seksióun le gíribei “Niños” (lídanrügüñein chumagü; belú humá lidoun Enseñanzas bíblicas > Niños) lun ñein lan úarani haganagua isaanigu hama agübürigu luma lun habuiduragüdüni súngubei hagía hamadagua luma Heowá (2 Lur. 6:6, 7). Ida luba hayusuruni seksióun le lun harufudahan houn hisaanigu?
2. Ida luba hasubudiruni ka lan ariñahani lunbei haturiahani luma kada irahü?
2 Aturiaha humá según lemegeirun irahü: Ámuñegueinarügütiña irahüñü hawariuagua (1 Ko. 13:11). Ligíati, ida luba hasubudiruni ka lan ariñahani lunbei haturiahani luma kada irahü? Lunti gabaroun humani harumudiri luma le hínsiñebei houn, átiribei lan katei hayara gunfuranda ani átiribei lan dan hawandun etenira lun aturiahani. Huuti abahüdaguni burí le lídanbei seksióun “Mis primeras lecciones de la Biblia” lun haturiahani agübürigu hama irahüñü ha ǘrüwati irumu hau lun ǘnabun. Añahein iduheñu ha úntiña línsiñeda hakutihani abahüdaguni burí le lídanbei seksióun le gíribei “De padres a hijos”. Guentó, akutiha wamá amu burí seksióun le gayarabei hayusuruni.
3. Ida luba hayusuruni agübürigu abahüdaguni luma katei burí le gayarabei ladügǘn le adarirúbei lidan seksióun “Ideas para la adoración en familia”?
3 Le gayarabei hadügüni lidan áhuduraguni kei Familia: Huuti seksióun le gíribei “Ideas para la adoración en familia” lun haturiahan agübürigu hama hasaanigu. Lun hasubudiruni ida luba lan hayusuruni abahüdaguni burí le ñeinbei luma katei burí le gayarabei ladügǘn, adüga humá klik luagu budún lun harariragüdüni ábameti haliihani “Guía para los Padres”. Buídubei lun hayusuruni agübürigu seksióun le gíribei Actividades ilustradas, kéiburi páhina le ñein lubéi dibuhu le lunti lefeindihóun lun harufudahan houn hasaanigu ñǘbürigiña. Íderagua humaña hisaanigu ha wéiriaraühaña adügei wadagimanu le lídanbei seksióun “Proyectos de investigación para niños”. Sun katei le gayarabei ladügǘn le adarirúbei lidan ubanaü le gíribei “Guía para los Padres” ladimurehaña luagu ligiaméme abahüdaguni o leksióun tídangiñeti Bíbülia. Ítarati, gayarabei hídehan sun iduheñu lidan áhuduraguni kei familia.
4. Ka burí katei adarirúbei lidan seksióun le gíribei “Hazte amigo de Jehová”?
4 Adügabá umadaguaü luma Heowá: Íderagua lumutiña burí bidéu, uremu, luma burí katei le gayarabei ladügǘn le lídanbei seksióun “Hazte amigo de Jehová” lidan páhina jw.org agübürigu lun harufudahanu Lererun Bungiu houn hasaanigu ha ñǘbürigiña (2 Lur. 31:12). Arufudahati bidéu burí hauti pichingu le ñeinbei saragu leksióun súdiniti ani ídehati huraraü le lídanbei páhina lau katei le gayarabei ladügǘn lun mabulieidun hamani. Kei hínsiñe lubéi houn hiibe-agei irahüñü heremuhan —ani ídehati burí uremu lun laritawagún le furendei waalibei—, láfuriduba uremu lun lalawahóun Heowá luma uremu hounti irahüñü sagü átiri dan.
5. Ka uagu mosu lubéi hamuriahan agübürigu adundehani luma Heowá?
5 Agübürigu, busenti Heowá lun buidu lan lidin hun lidan harufudahani inarüni houn hisaanigu. Ligíati, amuriaha humá adundehani luma (Ali. 13:8). Lau lídehan Heowá, gayarabei híderaguniña hisaanigu adarirei “sun lichú aau le busenwabei lun gayara lan hasalbarun [...] lau hafiñerun luagu Hesukrístu” (2 Tim. 3:15; Ari. 4:1-4).