Aranseha wamá ebelaagülei le adügüti lun habusenrun gürigia haganbun
1. Ka uagu súdini lubéi waranserun lubuidun burí ebelaagülei?
1 Ítara kei adüga lan lisemén líhemen aban éigini lun laganwoundun walama, adügati giñe wayusurun aban lubuidun ebelaagülei dan le wayanuhan hama gürigia lun busén hamá hasigirun afurendeira. Gayarati gibe lan o mibe lan le wariñagubei ani gayarati ámuñegueinarügü lan tema le uágubei wayanuha, gama lumoun, súnwandan mégeiwa lan wasaminaruni luma waranserun buidu lubá wadügüni (Ari. 15:28). Ka katei lunbei gabaroun wamani danme le waranserun aban ebelaagülei?
2. Ida luba waranserun aban ebelaagülei le adügüti lun habusenrun gürigia hasigirun aganba?
2 Le uágubei habusenra gürigia haganbun. Anhein madügün lubéi ebelaagülei le wayusurubei lun habusenrun gürigia hasigirun aganba, másiñati gayarabei lan ladügün le lun masigirun hamá aganbawa. Ligíati, danme le waranserun, samina wamá luagu katei le lunbei línsiñedun houn gürigia ha awinwandubaña lidan fulasu le ñein lubéi wapurichiha. Ayumahatiña san lun ñein lan aban arúeihani buítimati? Busentiña san gunda lan habagari kei familia? Memeniha san hanigi harihini lagumuchúniwa lau wuribu? Kei gibe habéi gürigia úntiña línsiñeda hariñaguni le hasaminarubei, buídubei lun wadügün álügüdahani houn le adügüti lun hariñaguni le hasaminarubei. Háfuga gayarabei wayusurun aban lídangiñe adundehani le wadarirubei tidan Wani Ministeriu, aranseha wameime según gürigia ha únbaña wapurichiha. Ka uagu masayahan wabéi fiu ebelaagülei lidan Guñoun lánina Áhuduraguni kei Familia?
3. Ida luba gayara lan waranseruni ebelaagülei le wayusurubei según katei le uágubei héchuda gürigia luma le uágubei hafiñera?
3 Subudi waméi le aubei héchuda gürigia luma le uágubei hafiñera. Anihein fulasu le ídanbei haguraba gürigia lun wariñaguni houn lau lóufudagun ka lan lébunabei awahán lan ñein. Gama lumoun, anihein fulasu le ídanti mosu lan wafalarun somu échuni lubaragiñe wariñaguni houn gürigia ka lan lébunabei wabisidahaniña, kéiburi wálügüdüniña ida haña lan luma wayanuhan murusun hama. Lidan burí fulasu le ñein lubéi inebe tan Bíbülia houn lílana, másiñati gayara lan wayanuhan tídangiñe lúmagiñe wagumeserun (Adü. 2:14-17). Ánheinti lougua habéi kristiánugu o mani hamá gürigia ha ñéinbaña relihión, háfuga buídutimabei lan mayanuhan wamá tuagu Bíbülia darime wagiribudun abisidahaña amu weyu (Adü. 17:22-31).
4. Ka katei lunbei gabaroun wamani lidan webelaagüle?
4 Ebelaagülei. Súdiniti wanúadiruni buidu kaba lan burí furumiñeti dimurei wariñaga lidan webelaagüle. Buídutimati míbedigia lan wariñagun, ménrengun ligíame gunfurandawa lan. Gama lumoun, úati buídurügü lan wetenirun lun le lunbei wariñaguni lunti giñe wetenirun lun ligaburi wariñaguni. Arufuda humá ubebeni luma aban lubuidun igaburi. Mabulieida huméi adüga lan háhayachun lau gamadóuni ani tídangiñe sun hanigi hawagun gürigia lun hasandiragun houngua darangilu. Líderagubadiwa wafalaruni adundehani burí le lun waransehan ebelaagülei le adügüti lun habusenrun gürigia hasigirun aganba lídangiñe inarüni le lídanbei “lidabulan Heowá” (1 Ko. 10:21, Traducción del Nuevo Mundo).