Barǘ humaña profetagu keisi aban hénpulu: Mikeasi
1. Háfuga ka álügüdahani ladügübei Mikeasi lúniwagua ani ka uagu gayara lubéi wariñagun merede lan lapurichihan lidan ni kata?
1 Másiñati álügüdaguaadiwa lan woungua: “Ídabatima san lagumucha ubóu wuribati le?”. Háfuga álügüdagua lan meha giñe profeta Mikeasi aban katei ítarati lúniwagua sun dan le laubei eweridiraña lílana arúeihani ísüraelina luma hudaana luagu lagünrinchagubaña lan Heowá. Gama lumoun, meredeti lapurichihan lidan ni kata. Lídanbei irumu 740 lubaragiñe lidaani Hesusu, sun meha wínwangili lan Mikeasi, gúnfuli lumuti Heowá le lariñagubei lidan aban profesía libügürü lagünrinchawaguba lan Samaria (Mik. 1:6, 7). Saragu irumu lárigiñe, aba lagünrinchawagun Herusalén lidan irumu 607 (Mik. 3:12). Angia wagía, ida luba san wáyeihani Mikeasi lidan awanha lan agurabahei lagunfuliruni Heowá lasiadihan?
2. Ka uagu lunti lubéi wagurabahani luéyuri Heowá lau gurasu, ani ka mini lubéi katei le?
2 Gagurabaguadi wamá. Abürühati meha Mikeasi: “Anhein au, nagurabahaba lúmagiñe Wabureme, níchugubei nemenigin luagu Bungiu le nesefuragüle” (Mik. 7:7). Úati mini lan lira, aba lan meha lerederun Mikeasi agurabaha chagu larüna. Lubaragiñe lira, gúnfuli lumuti luadigimari keisi profeta lau ubebeni. Ítarameme, lunti giñe wakipuragun woungua beresegu ani “deregeguañu [wo]ungua lun Bungiu sunsuinagubei” sun wagurabahañein lan luéyuri Heowá (2 Fe. 3:11, 12). Mabulieida waméi ru lan luguraasun Bungiu chansi houn gürigia lun hasakürihan (2 Fe. 3:9). Ligíati, ítara kei tariñaguni Bíbülia woun, arufuda wamá aban gaguraasuni libe le meha harufudubei profetagu (Sant. 5:10).
3. Ka uagu lunti lubéi wasigirun amuriaha sífiri sandu luma Heowá?
3 Afiñe wamá líchuguba lan Heowá erei woun. Hénrenguti meha wadagimanu le leresibirubei Mikeasi, ligíati lamuriahanbei erei luma Heowá (Mik. 3:8). Subudi lumuti Heowá megei wamuti lan giñe lídehan ani ínchaha tumutiwa Bíbülia lun wamuriahani luma lidan wafurieidun. Anhein abuchada wawagu, líchuguba saragu erei woun gúnfuli wamaamuga lau buligasion le ru laalibei woun (Sal. 84:5, 7; Isa. 40:28-31). Saragu wádangiñe, ariha wamaali ru lan Heowá erei woun lun wagunfulirun lau weseriwidun keisi kristiánugu. Ligíati, sigí wamá amuriaha sífiri sandu luma (Luk. 11:13).
4. Ka meha lubuidun hénpulu líchugubei Mikeasi woun lau ligaburi lanügüni libagari?
4 Lun Mikeasi, súdinitimati meha ladügǘniwa lugundan Heowá. Desidírüti lakipurun úaraguni íbini wiye lan meha hagaburi gürigia ha awinwandubaña lidaaniwagu. Óuchawaguatiwa giñe sagü weyu lun larihíniwa anhein úaraguabadiwa lubéi lun Bungiu. Ligíati, desidírütima wamá wasigirun abagarida lau gaganbadi lun Wabungiute Heowá lun súnwandan (Mik. 4:5).