Ruti Aritaguagülei aban lubuidun chansi woun lun warufuduni weteingiradi

1. Kaba chansi espechaliti líchiga Aritaguagülei woun?

¹ Ruti Aritaguagülei le lunbei ladügǘniwa 14 lidan gádürü-hati aban chansi le móubawati woun lun warufuduni weteingiradi luagu lareini Heowá. Arufuda lumuti le lariñagubei Lúkasi 17:11-18 le lasaminarubei Heowá luma Hesusu luagu igaburi le. Ma lirun ábanrügüñein lan hádangiñe diisi gawagutiña lépüra ha areidagubaña agiribuda íchiga seremei. Ámuñegü, ladügüba lidewese Bungiu le lánina lebegi asalbaruni lun lagumuchun sun wuribani luma lun wibihin ibagari magumuchaditi. Lídanme dan ligía, másügürünhalime ni aban weyu meteingirunga waméi Heowá luagu abinirúni le. Gama lumoun, ida lubati warufuduni weteingiradi lidan burí dimaasu le lunbei liabin?

2. Ka gayarabei wadügüni lun laganwoundun eteingiruni le wasandirubei luagu lebegi asalbaruni?

² Áfaagua wamá lun geteingiradi wamá. Katei burí le uágubei wasaminara ínchahabaliwa arufuda eteingiruni. Ligíati, kei ídemuei lun laganwoundun ínsiñeni le wasandirubei luagu lebegi asalbaruni, ñeinbei aban programa espechaliti lánina taliihóun Bíbülia lidan lidaani Aritaguagülei lidan saragu fulasu, kéiburi tidan kalendáriu luma tidan garüdia Examinando las Escrituras diariamente. Ma buídubei hamuga haliihani bérusu burí ligía úara hama hiduheñu? Anhein wadüga ítara, laganwounduba ínsiñeni le wasandirubei luagu lebegi asalbaruni ani gánibei aban lubuidun efekütu lidan ligaburi wóuserun (2 Ko. 5:14, 15; 1 Huan 4:11).

3. Ka ámuñegueinarügü katei gayarabei wadügüni lidan lidaani Aritaguagülei lun warufuduni weteingiradi?

³ Arufuda waméi weteingiradi. Arufuda lumuti gürigia leteingiradi lau burí katei le ladügübei (Kol. 3:15). Lun larufuduni wügüri gawaguti lépüra leteingiradi ñǘdünti áluahei Hesusu lun líchugun seremei lun. Ani chóuruti abahüdagua lani houn sun gürigia, lau saragu ugundani, lau lan aban milaguru lareidagua (Luk. 6:45). Línchahabadiwa san eteingiruni le wasandirubei lun wawadigimaridun lau ubebeni lidan tafanreinhóun amisurahani lubá Aritaguagülei? Weseriwidun kei prekursorugu ídehatiña o waganwoundagüdüni dan le wásügürübei lidan apurichihani lidan lidaani Aritaguagülei ligía amu katei gayarabei wadügüni lun warufuduni weteingiradi. Ani línchahabadiwa eteingiruni le wasandirubei tidan wanigi lun wíchugun buiti achülürüni houn sun achülürütiña lidoun Aritaguagülei guñoun ligía, ariñaga wagíame houn gayara lan wóunabuni hálügüdahan.

4. Ka lunbei wadügüni lidan Aritaguagülei le luéime wasakürihan lárigiñe?

⁴ Anihánba funa san lagumuhóun wéiyaasu wadügüni adamuridaguni le lánina Laritawagún lounwen Kristu? (1 Ko. 11:26.) Ibidiñeti woun. Lérügüñein wasubudirun, sügühali ligía lanme adamuridaguni le, ñǘdünhame aban chansi móubawati wawéi lun warufuduni weteingiradi. Meferidira waméi! Weiri láamuga lugundan Heowá, Bungiu le íchugubalin lebegi asalbaruni, lau burí dimurei lánina geteingiradi le wariñagubei luma lau saminaü le áfuridubei lídangiñe tilulin-agei wanigi (Sal. 19:14).