Ida luba wíderaguniña ha maliihanbaña buidu
1. Ka uagu hénrengu lubéi larufudahóuniwa inarüni tídangiñeti Bíbülia houn gürigia ha lóuguati haliihan?
1 Hádangiñe gürigia ha únbaña wapurichiha, añahein úntiña línsiñeda hafurendeirun luagu Bungiu, gama lumoun kei lougua habéi luma aliihani susta lumutiña tueirin Bíbülia tuma amu burí líburu. Ligíati, gayara lubéi mibihin wamá buiti resultóu ánhawa ederegeroun garüdia Kátima san houn danme wagumeserun bisidaña. Ka lunbei wadügüni lun wíderaguniña gürigia ha afurendeira luagu Bungiu? Álügüdawaguaaña íbirigu subudihabútiña ha lídangiñetiña wein ageiraü libügürü katei le, ariha waméi lidan burí párafu le asigirubei ka lan óunabagülei híchugubei.
2. Ka burí agumeiraguagüdüni gayaraabei wayusurunu lun waturiahan hama gürigia ha lóuguabaña luma aliihani?
2 Anhein maliihadi lubéi gürigia o lougua lan laliihan, gayaraati hagumeserun íchiga aturiahani lun tau agumeiraguagüdüni Aganba huméi Bungiu o Aganba huméi Bungiu ábanme hawinwandun lun súnwandan. Anihein aban íbiri merigana le eseriwiduti kei prekursoru le apurichihati ǘrüwa-wein-diisi oura sagü hati arufudutu biángubei garüdia to lun gürigia, ábati lálügüdüni ka lan tídangiñe labusenruboun. Ariñawagúati tídangiñe sukursáli to Kéniaboun weiri lan tahuudun garüdia to ñein, ladüga furendeitima hamá gürigia ha awinwandubaña Áfürika dan le labahüdawagun somu katei houn sügǘ lau layusurúniwa álügüdahani luma óunabagülei hama. Háfuga ménrengunbei lun aban gürigia le aturiahaali laliihan luma lóunabun álügüdahani, gama lumoun mítaranti luma aban gürigia le lóuguati laleskuelahan. Gíbetiña íbirigu desidírütiña hayusurunu agumeiraguagüdüni Uganu buiti lúmagiñeti Bungiu, Gayarati lumadagu wamá Bungiu o Niliburun lánina abahüdaguni tídangiñeti Bíbülia anhein lougua lubéi aturiahati luma aliihani.
3. Ka lunbei gabaroun wamani lun buidu lan warufudahan houn gürigia ha maliihadibaña?
3 Ru humá dǘgüdaguaü. Másiñati nibusigari hamá gürigia ha maliihadibaña o hasandiragun houngua kamá hamuga mebegitiña ni kata. Wíderaguniña lun buidu lan hasandiragun houngua dan le wíchugun aturiahani houn ligía furumiñeti pasu le gayaraabei lídehan lun warufudahani inarüni houn. Chuti hau hiibe-agei gürigia ha maliihadibaña ani fureseti hafurendeirun. Ligíati, óusera humaña lau inebesei (1 Fe. 3:15, 16). Busentimabaña hasigirun afurendeira anhein hariha merede lan áfaaguni le hadügübei lidan ni kata ani hawanseruña lan lidan hafurendeirun luagu Bungiu. Ligíati, gabügürügualá hariñagun houn buidu lan hadüga.
Másiñati nibusigari hamá gürigia ha maliihadibaña o hasandiragun houngua kamá hamuga mebegitiña ni kata. Wíderaguniña lun buidu lan hasandiragun houngua dan le wíchugun aturiahani houn ligía furumiñeti pasu le gayaraabei lídehan lun warufudahani inarüni houn.
4. Ida luba wínchahaniña gürigia ha lóuguabei haliihan lun haranserun lubá aturiahani?
4 Íbini lougua lan laliihan gürigia le aturiahabei, ariñagaméme humá lun lunti lan laranserun lubá aturiahani. Añahein íbirigu ageiraü Sudafürika ariñagutiña houn ha aturiahabarun Bíbülia hama lun hamuriahan ídemuei luma somu haduhe o hamada le aliihati buidu. Lun línchahaniña aban íbiri alunduna gürigia ha aturiahabaña luma lun haranserun lubá aturiahani, aba lafuredeirunu liliburun houn lidan burí fiu párafu lun harihini houngua ménrenguntimati lan ladarirúniwa óunabagülei dan le máküñu liña lan. Amuriahati aban íbiri lídangiñeti ageiraü le gíribei India hama gürigia ha aturiahabaña luma lun haríagunu iyawaü to lídanboun leksióun le lunbei hakutihani leweñegua dimaasu luma lun hasaminarun tuagun lubaragiñe lachülürün luéyuri aturiahani.
5. Ida luba warufudun gaguraasuni dan le wíchugun aturiahani?
5 Gaguraasun humá. Teni humá lun burí puntu méiniti le tídanbei agumeiraguagüdüni to haturiahaboun ani íderagua huméi aturiahati lun gunfuranda lani buidu. Danme hagumeserun, háfuga buídutimabei díisirügü lan minutu lidura haturiahan o keinsi. Máfaagua humá haturiahan saragu ariñahani, fiurügülá párafu haturiaha lidan kada sesióun. Meferidira huméi huguraasun anhein darasa lubéi laliihan gürigia le aturiahabei huma. Másiñati busentimabei lan lafurendeirun aliiha buidu éibume laganwoundun ínsiñeni le lasandirubei luagu Heowá. Lun laganwoundun ínsiñeni le, buídubei hamisurahani aturiahati lidoun adamuridaguni lúmagiñe lagumeserun.
6. Ida luba warufudahan aliihani lun aban gürigia?
6 Furesetimabei lawanserun aturiahati lidan leseriwidun lun Bungiu anhein afurendeira aliiha buidu (Sal. 1:1-3). Íderagua hamaaña saragu íbirigu gürigia ha aturiahabaña hama lau hayusurunu garüdia Aplícate a la lectura y a la escritura fiu minutu lárigiñe lagumuchun kada aturiahani. Anhein leferidira aturiahati luguraasun, háfuga gayaraabei híderaguni asandira ichouruni luougua lau haritaguagüdüni lun ka burí lan katei furendei láalibei adüga. Chóurugüda huméi lun labinirubei lan Heowá áfaaguni le ladügübei ani amisuraha huméi lun lafurieidun lun Bungiu amuriaha láamuga ídemuei luma (Ari. 16:3; 1 Huan 5:14, 15). Añahein íbirigu alunduna ínchaha hamutiña gürigia ha aturiahabaña hama lun háfaagun hafurendeirun katei burí le gayaraabei hafurendeiruni eibu lásügürün dan, kéiburi hafurendeiruni sun létüra, hadariruni bérusu tidan Bíbülia aliiha hameime luma haliihan agumeiraguagüdüni tídangiñetu Bíbülia to ménrengunti taliihóun. Liibe-agei dan, mosu giñe wínchahaniña gürigia ha únbaña warufudaha aliihani lun busén hamá hadügüni.
7. Ka uagu lunti lubéi warufudahani inarüni houn gürigia ha lóuguabei haliihan?
7 Marihin lumutiña Heowá gürigia ha lóuguabei haleskuelahan kamá hamuga mebegitiña ni kata (Hob 34:19). Ariha lumuti ka lan tídanbei hanigi (1 Kro. 28:9). Arufudaha waméi lubeiti inarüni houn gürigia ha lóuguabaña aliihan. Anuhein tubuidun burí agumeiraguagüdüni wama to auboun gayara lan wagumeserun. Lau lásügürün dan, gayaraabei wagumeserun aturiahoun líburu Kátima san lun lahulilidun lisubudin aturiahati tuagu Bíbülia.