Barǘ humaña profetagu keisi aban hénpulu: Sofoníasi
1. Ida liña meha katei Hudá dan le profeta lubéi Sofoníasi, ani ka uagu aban lubéi hénpulu buiti woun?
1 Lamidoun burí sígulu sedü lubaragiñe wadaani, furanguti meha áhuduraguni lun Baali Hudá. Málügili meha lafarún urúei wuribati le gíribei Amón ani fidí waali meha nibureinti Hosíasi ñein keisi urúei (2 Kro. 33:21–34:1). Lidan dan ligía lanúadirei Heowá Sofoníasi lun lariñaguni uganu luáguti lasiadihan. Genegeti hádangiñeti lan meha haduheñu urúeigu hudana Sofoníasi, íbini ítara, masansirun lumuti uganu lúmagiñeti Heowá kóntüra lábutigu néchani (Sof. 1:1; 3:1-4). Ítara kei Sofoníasi, áfaaguatiwa giñe lun ganigi wamá ani lun madügün lan iduheguaü lun werederuni wáhuduragun lun Heowá (Mat. 10:34-37). Ka uganu lasubudiragüdübei Sofoníasi, ani ka resultóubei?
2. Ka lunbei wadügüni lun wadarirun “aramudaguagülei lídanme luéyuri ligañi Wabureme”?
2 “Áluaha huméi [Heowá].” Heowárügübei gayara lesefuruniña gürigia lidan luéyuri ligañi. Ligía lariñagunbei Sofoníasi houn hudana lun háluahani Heowá, lun háluahan irichaü luma ǘnabuguni lidan meha gadaanigiña lan lun hadügüni (Sof. 2:2, 3). Genegeguati dan ligía luma dan le. Ítara kei meha Sofoníasi, amisuraha wamutiña gürigia lun háluahani Bungiu, gama lumoun mosu giñe wáluahani, ani desidírü wagíame lun madireirun wamá luéi Heowá (Sof. 1:6). Áluaha wamuti Heowá lau waturiahanu Lererun lau duari ani falá waméi ladundehan. Áluahatiwa irichaü lau wawinwandun aban ibagari harumati. Áluahatiwa ǘnabuguni lau gaganbadi wamá lun tadundehan lóundarun Heowá lau sun wagundan.
3. Ka uagu lunti lubéi wakipurun aban igaburi buiti lidan wani ministeriu?
3 Resultóu buiti. Buiti lani uganu le lanügübei Sofoníasi efekütu hawagu fiú hudana, luágutima Hosíasi, le agumeserubei áluahei Heowá dan le irahügili. Dan lárigiñe, adügati Hosíasi aban óunwenbu wadagimanu lun lagumuchun lau áhuduraguni houn guáriua Hudá (2 Kro. 34:2-5). Uguñe weyu, íbini heigua lan ilaü le lánina uganu buiti luáguti Larúeihan Bungiu ǘmadarugu, lidoun dübü luma lidoun hiiyu, anihein giñe amu ábürühati lidoun múa buiti ani aba lagindun (Mat. 13:18-23). Chouru wamuti lasigiruba lan Heowá abinirei wáfaagun lun wasigirun ábunaguei ilaü lánina Larúeihan (Sal. 126:6).
4. Ka uagu lunti lubéi agagudúañu wamá ‘agurabahei Heowá’?
4 Añahein meha fiú hudana asaminarutiña luagu madügünbei lan Heowá ni kata. Gama lumoun, chouru lumuti meha Heowá houn luagu yarafaali lan óunwenbu luéyuri (Sof. 1:12, 14). Hárügübaña meha áluahabaña aramudaguagülei luma Heowá esefura (Sof. 3:12, 17). Lidan awanha lan ‘agurabahei Heowá’, sigí wamá eseriwida lun úara hama sun gürigia ha áhuduragubaña lun (Sof. 3:8, 9).