Ru wamá aturiahani lidan aban igaburi le barüti buiti resultóu
1. Ka wánibei buligasion hama gürigia ha aturiahabarun Bíbülia wama?
1 Siñati leseriwidun aban gürigia lun Bungiu “anhein mama lubéi lanügün [o lachawahan] Bungiu” gürigia ligía luouguoun (Huan 6:44). Íbini ítara, mosu ladügüni íbiri le íchugubei aturiahani tídangiñeti Bíbülia fánreinti le yuubei lun lidan líderaguni aturiahati ayarafada lun Lúguchi le siélubei (Sant. 4:8). Ligía mosu lubéi laranserun buidu. Úati buídurügü lan laliihóun kada párafu luma ladügǘniwa álügüdahani le tídanbei líburu lun aturiahati lun gayara lan lárügüdün inarüni tidan lanigi luma lun lawanserun lidan leseriwidun lun Bungiu.
2. Kaba buiti resultóu wibiha ánhawa íchiga aturiahani tídangiñeti Bíbülia buidu?
2 Lun wíchugun aban aturiahani le ruti aban buiti resultóu, lunti wíderaguni aturiahati 1) gunfurandei le tarufudahabei Bíbülia, 2) ánhara lun le tarufudahabei Bíbülia, 3) awinwandei le tarufudahabei Bíbülia (Huan 3:16; 17:3; Sant. 2:26). Gayaraati lásügürün saragu hati wau adundeha aban gürigia lun wíderaguni ibihei ǘrüwa katei le. Gama lumoun, lau líchuguni aturiahati kada aban lídangiñe pasu le, arufudati adügeina liña lan aban lubuidun umadaguaü luma Heowá darime lun lachülürün dan lun lederegeragun lungua lun.
3. Ka uagu hadüga máisturugu buítiña álügüdahani le adügüti lun lariñaguni aturiahati ka lan lisaminanbei libügürü le lafurendeirubei?
3 Ka lisaminanbei aturiahati Bíbülia? Lun wasubudiruni anhein gunfuranda lubalin aturiahati le lafurendeirubei anha ligía lun, mayanuha wamá saragu ani ínchaha waméi lun lariñaguni le lasaminarubei (Sant. 1:19). Gunfuranda lumuti san le tariñagubei Bíbülia luagu tema le akutihóuaalibei luma? Gayaraati san lafuranguagüdüni lau guánarügü lererun? Ka lisaminanbei luagu le furendei láalibei? Afiñeti san buidu lan le tarufudahabei Bíbülia? (1 Tesa. 2:13.) Gunfuranda lumuti san lunti lan línchahani sun le furendei láalibei asansirei ligaburi lanügüni libagari? (Kol. 3:10.) Lun wasubudiruni ka lan óunabagüleibei lun burí álügüdahani le, mosu wadügün álügüdahani lun gürigia, lau inebesei, le adügüti lun lariñaguni ka lan lisaminanbei libügürü le lafurendeirubei, ábameti wíchugun arigei lun le lariñagubei (Mat. 16:13-16).
4. Ka lunbei wadügüni anhein gürewei lubéi lun aban aturiahati gunfuranda lan somu arufudahati tídangiñeti Bíbülia o lafalaruni lidan libagari?
4 Liibe-agei dan, hénrenguti ligirúniwa ligaburi saminaü luma burí échuni le uágubei weiri lan lafiñerun gürigia (2 Ko. 10:5). Ka gayaraabei wadügüni anhein maha lubéi aturiahati lun somu arufudahani o mafalarun lani lidan libagari? Mosu gaguraasun wamá, ígira wagíame dan le nófuti lun tadügüni Lererun Bungiu tuadigimari tidan lanigi aturiahati luma giñe lun ladügüni lani Bungiu sífiri sandu luadigimari (1 Ko. 3:6, 7; Ebü. 4:12). Madügüdara wamá luagu, liibe-agei dan, buítimabei wásügürün lidoun amu tema anhein wariha gürewei lan lun aturiahati gunfuranda lan aban arufudahani tídangiñeti Bíbülia o lafalaruni lidan libagari. Ánhawa asigira arufudaha tídangiñe Bíbülia lun lau gurasu luma ínsiñehabuni, másiñati ladügün lira lun labusenrun ladügüni asansiruni le mégeiwabei lau lásügürün dan.