Barǘ humaña profetagu keisi aban hénpulu: Abakúku
1. Ka uagu gunfuranda wabalin profeta Abakúku buidu?
1 Lau warihin aganwoundeina liña lan wuribani ubouagu, másiñati sandigua wamá woungua kei meha Abakúku le álügüdübalin Heowá: “Ka san uagu barihagüdana saragu idiheri luma wuribani?” (Abak. 1:3; 2 Tim. 3:1, 13). Líderagubadiwa wararamagun asaminara luagu uganu luma hénpulu lánina úaraguni le líchugubei Abakúku lun wawandun sunme awanha lan agurabahei “luéyuri guséi” le lunbei lanügüni Heowá (2 Fe. 3:7).
2. Ida luba úaragua wamá kei meha Abakúku?
2 Úaragua wamá. Lubaragiñe meha lábürühan larüna Abakúku luagu le gádanbalin, rédeiti beresegu luma agagudúañu lidan leseriwidun lun Heowá (Abak. 2:1). Chóurugüda lumuti Heowá lun profeta le lagunfuliruba lan Lererun lidan dan ani hasigiruba lan gürigia ha richaguabaña abagarida (Abak. 2:2-4). Ka mini lubéi lira houn kristiánugu ha awinwandubaña lidan lagumuhóun dan le? Súdinitima lan wachoururuni lachülürüba lan lagumuchagüle ubóu sügǘ lau wasubudiruni ídaba lan lachülüra. Ínchaha lumutiwa wafiñen lun agagudúañu wamá luma lun wíchuguni apurichihani lidan furumiñeti lúgaaru (Ebü. 10:38, 39).
3. Ka uagu mosu lubéi wasigirun eseriwida lun Heowá lau ugundani?
3 Gúndaañu lau weseriwidun lun Heowá. Louchawagúba wafiñen danme le lábürühan Gogu le Magoguna hawagun lumutuniña Heowá (Ese. 38:2, 10-12). Sagü ñein lan wuribu, liábingua lidere dan, íbini houn ha agañeirubalin wuribu. Féridi hamuti gürigia hamegen, lóuguati éigini ani másiñati ábatima lan hagudemedun hiibe-agei hádangiñe. Kaba wadüga danme le wagagibudagun luma turobuli burí ítarati? Agurabati meha Abakúku lagagibudaguba lan luma lénrengunga, ligíati desidírü lubéi meferidirun lubéi lan lugundan lidan leseriwidun lun Heowá (Abak. 3:16-19). Gayaraabei giñe líderaguniwa “ugundani le líchugubei Bungiu” lun wawandun danme le wásügürün lídangiñe óuchawaguni (Neem. 8:10; Ebü. 12:2).
4. Ka ugundani gayaraabei wasandiruni dandu uguñe weyu kei ámuñegü?
4 Lasigiruba Heowá arufudaha houn gürigia hame lúnbaña lesefuruniña lidan luéyuri guséi (Abak. 2:14). Hafurendeiruba giñe gürigia ha águyugutiña lídangiñe óunweni saragu katei luagu Heowá. Lúmagiñe guentó, adüga waméi sun wayaraati lun meferidirun wamá chansi lun wadimurehan houn amu luagu Heowá luma lubuidun burí katei le ladügübei (Sal. 34:1; 71:17).