Ka harufudahabei profetagu woun luagu Bungiu?
Lidan meha binadu dan, yúsuti meha Bungiu profetagu lun lóunahan uganu súdiniti houn gürigia. Ariñaga lumuti san Bungiu woun lidan burí uganu ligía ka lan lunbei wadügüni lun labiniruniwa? Anha. Ariha waméi ka lan gayaraabei wafurendeiruni lídangiñe le hariñagubei ǘrüwa profetagu úaraguatiña.
ABÜRAÁMÜ
Úati himei lan Bungiu aban gürigia luéi aban; busenti labiniruniña sun gürigia.
Füramaseti Bungiu lun profeta Abüraámü: “Habinirúba [sun] gürigia ubouagu bídangiñe” (Agumesehani 12:3).
Ka wafurendeirubei? Weiri lan wínsiñe lun Bungiu ani busén lan labiniruniña sun gürigia ha gaganbadibaña lun (wügüriña, würiña, irahüñü).
MOISESI
Gudemehabuti Bungiu ani biní lumutiña sun ha áfaagubaña lúntima hasubudiruni.
Ruti meha Suntigabafu ubafu lun profeta Moisesi lun ladügün burí milaguru. Íbini ítara, amuriahati Moisesi luma Bungiu: “Subudigüdabei baransehan nun, gayara láamuga nemenigidun buagu, gayara ligíame nasigirun eseriwidabu númameme láamuga bufulesein” (Áfuriduni 33:13). Gúndaati Bungiu lau le lamuriahabei Moisesi luma, ábati labiniruni lau líchugun lichú aau lun luma lau líderaguni asubudirei ligaburi luma ligaburi lóuserun, kéiburi gudemehabu lan, gaguraasun ligía (Áfuriduni 34:6, 7).
Ka wafurendeirubei? Labinirubadiwa lan Bungiu súngubei wagía (wügüriña, würiña, irahüñü) ánhawa áfaagua lun wasubudiruni buidu. Ariñaga lumuti woun tidan Lererun ida luba lan wáhuduragun lun ani ayumaha lan labiniruniwa.
HESUSU
Gudemehabuti meha Hesusu ani areidaguagüdati sun luwuyeri sandi.
Labinirubadiwa Bungiu lun súnwandan ánhawa afurendeira luagu le larufudahabei luma le ladügübei Hesusu.
Ayanuhatu Lererun Bungiu saragu luagu libagari Hesusu luma le larufudahabei. Ruti meha Bungiu ubafu lun Hesusu lun ladügün saragu milaguru, kéiburi larihagüdün marihintiña, laganbagüdün maganbuntiña luma lareidaguagüdüniña danimatiña. Águyuguagüdati íbini hilaaña. Ítara liña larufuduni Hesusu kaba lan ladüga Bungiu wawagu ámuñegü. Afuranguagüda lumuti woun ka lan lunbei wadügüni lun wibihini abiniruni burí ligía: “Anihán lébunabei ibagari le magumuchaditi, lun hasubudirunibu buguya le Bungiu ábanrügüti, le inarüniti, luma lun hasubudirunina, au Hesukrístu le bóunahabei” (Huan 17:3).
Gudemehabuti meha Hesusu, hínsiñehabuti ani gamadounti. Ánhatiña meha dandu wügüriña kei würiña ha ámuñegueinarügüti harumudiri lun agunbirahani hínsiñehabuti le ladügübei houn: “Furendei hu[má] númagiñe; lau gaguraasun nan, ñulú tuguya nanigi, ábame hadarirun emeraaguni tun huani” (Matéu 11:29). Añahein meha wügüriña lidaaniwagu Hesusu, wuribati meha hóuseruniña würiña, ánheinti Hesusu, óusera lumutiña meha würiña lau inebesei luma ínsiñehabuni.
Ka wafurendeirubei? Weiri lan meha hínsiñe gürigia lun Hesusu ani arufuda lani woun ida luba lan wóuseruniña amu.
MAMA BUNGIU LE SUNTIGABAFU HESUSU
Arufudahatu Bíbülia woun “ábanrügüñein [lan] Bungiu”, ánheinti Hesukrístu, aban meha lóunagüle Bungiu le ǘnabuguti ligía (1 Korintuna 8:6). Ariñaga lumuti Hesusu furangu Bungiu lan óunahabalin ubouagun ani wéirigutima lan Bungiu luéi (Huan 11:41, 42; 14:28).a
a Anhein busén hubéi lanwoun ariñahani luáguti Hesukrístu, aliiha huméi leksióun 4 le tídanbei garüdia Uganu buiti lúmagiñeti Bungiu. Anuhein lidan www.jw.org/cab.