WABAGARI KEISI KRISTIÁNUGU
Aba líchugun Pábulu “eteingiruni lun Bungiu, aba lárügüdün gurasu”
Dan le híchugunbei lílana damuriguaü le Rómabei fe aningirán lan Pábulu ñeinhin, añahein hádangiñe aweiyasuhatiña kéiburi 64 kilometuru (40 maili) lun houdin adunragua luma. Ida liña lasandiragun Pábulu lungua dan le larihinbalin ínsiñeni le harufudubei lun lau sákürifisiu le hadügübei? “Aba líchugun eteingiruni lun Bungiu, aba lárügüdün gurasu” (Adü 28:15). Liibe-agei dan, Pábulu meha íchugubei dǘgüdaguaü houn burí lílana damuriguaü, ánheinti guentó, ligía emegeirubei leresibirun dǘgüdaguaü ladüga ladaürǘña lan (2 Ko 13:10).
Uguñe weyu, ñǘdüntiña óunigirutiña sirkuitu bisidei burí damuriguaü lun híchugun dǘgüdaguaü houn íbirigu. Ani kei lasuseredun houn sun lubúeingu Bungiu, anihein giñe dan hasandirun lubucha uagu, idiheri o maguraasuni. Ka gayaraabei wadügüni lun wíchugun dǘgüdaguaü lun óunigiruti sirkuitu luma tun lani weiriou, gayara láamuga “wíchugun gurasu wóuniwagua” dan le hachülürün bisidawa? (Rom 1:11, 12).
Wachülürün lidoun burí adamuridaguni le adügǘbei lubá apurichihani. Resibiti óunigiruti sirkuitu dǘgüdaguaü dan le larihini áfaaguni le wadügübei lun wídehan lidan aransehani le adügǘbei lubá dimaasu espechaliti le ídanbei lachülüra bisidei damuriguaü le ñein wabéi (1 Te 1:2, 3; 2:20). Áfaagua humá heseriwidun kei prekursoru ídehati lidan hati ligía. Gayaraati san hadügün aransehani lun hapurichihan luma óunigiruti sirkuitu o tuma lani weiriou, o lun houdin huma íchiga aturiahani tídangiñeti Bíbülia? Hínsiñeti houn íbirigu ha háfuridun apurichiha luma íchiga aturiahani hama ámuñegueinarügü íbirigu, íbini hama ha málügilibei lúmagiñe hagumeserun apurichiha o añahagua áfaagua lun hafurendeirun adügei buidu.
Resibi wamaña buidu. Gayaraati san wagunbirahaniña arumuga o eiga wábiñe? Aban igaburi buiti lira le ídanbei warufudei houn hínsiñe hamá woun. Ani magurabuntiña lun wadügün aransehani le hanarimeguti (Lk 10:38-42).
Waganbuni adundehani le híchugubei woun ani falá wameime. Íderagua lumutiwa óunigiruti sirkuitu, lau ínsiñehabuni, lun weseriwidun lun Heowá. Másiñati giñe ñeinbei lan dan lererehan woun (1 Ko 5:1-5). Ánhawa gaganbadi lau ǘnabuguni lun óunigiruti sirkuitu, lauba ugundani ladügei luadigimari (Ebü 13:17).
Geteingiradi humá. Ariñaga humá lun óunigiruti sirkuitu luma tun lani weiriou sagá humá buiti lídangiñe sun áfaaguni le hadügübei. Gayaraati hariñaguni houn hungua o habürüdüni houn tidan somu gárada (Kol 3:15).