Yusu wamá bidéu lun warufudahan houn aturiahatiña Bíbülia

Adügati burí katei arihúarügüti lun wetenirun lun le arufudahóubei woun ani ídehati lun gunfuranda wamani luma lun waritaguni. Yúsuti Heowá, Wamaisturun le Garufudahaditimabei, katei burí arihúarügüti lun larufudahan katei súdiniti (Agu 15:5; Her 18:1-6). Adüga lumuti meha giñe Hesusu, Máisturu le Wéirigutimabei, ligiaméme (Mt 18:2-6; 22:19-21). Bidéu burí ábanbei lídangiñe katei arihúarügüti létima ayusurúbei lidan burí irumu le. Wayusuruñein san lun warufudahan houn ha aturiahabarun Bíbülia wama?

Uguñe weyu, anihein 10 bidéu wama le íderagubaliwa afuranguagüdei le arufudahóubei tidan garüdia Uganu buiti lúmagiñeti Bungiu. Saragu lídangiñe liri bidéu le, lídangiñeti aban lídangiñe álügüdahani le áfuachubei lidan létüra wuritimati le tídanbei garüdia to. Anihein burí lídangiñe dimurei le tídanbei garüdia Uganu buiti to lídanboun Internet óunahati lidoun wani páhina lidan Internet, le aritaguagüdübalin woun ídaba lan warihagüdei kada bidéu. Anihein giñe amu burí bidéu le óustaragüdübalin ariñahani le tídanbei agumeiraguagüdüni tótima wayusuruboun lun wíchugun aturiahani tídangiñeti Bíbülia.

Anhein hénrengu lubéi lun aban aturiahati lun gunfuranda lan somu arufudahani tídangiñeti Bíbülia o anhein lásügürüña lubéi lídangiñe somu lénrengunga, áluaha humá aban bidéu lidan jw.org® o lidan JW Broadcasting® le gayaraati líderaguni. Háfuga gayaraabei harihini úara lun gayara lan hakutihani.

Sagawati iseri bidéu sagü hati. Danme harihiñein lan, samina humá ida luba lan hayusuruni lun híderaguniña amu.