Eseriwiduni buiti le mabulieidun lubéi Bungiu

Gayaraati wadügün saragu katei buiti lidan weseriwidun lun Heowá eibu lásügürün dan. Ítara kei lau lan ínsiñehabuni laritagua aban úguchili luagu katei burí le ibiha hamaalibei lisaanigu, haritaguati giñe Heowá luagu katei burí buiti le wadügübei luma luagu ínsiñeni le warufudubei luagu liri (Mt 6:20; Ebü 6:10). Inarüni ámuñegueinarügü lan katei le ídanbei buidu wamá luma gádantiwa. Íbini ítara, gúndaabadiwa ánhawa adügei sun wayaraati lun weseriwidun lun Heowá (Gal 6:4; Kol 3:23). Lidan sun irumu le sügühalibei, seriwihaña saragu milu íbirigu Betelirugu. Gayaraati san híchaagun hungua lun hadügüni? Anhein siñá lubéi hadügüni, gayaraati san hínchahan somu íbiri lun ladügüni o híderagun aban iduhei lun lasigirun eseriwida lun Heowá Betelirugu?

ARIHA HUMÉI BIDÉU ARANSEÑU HUMÁ LUN HESERIWIDUN BETELIRUGU, LÁRIGIÑE, ÁBAME HÓUNABUNI ÁLÜGÜDAHANI BURÍ LE:

• Ka katei lunbei línchahaniwa eseriwida Betelirugu?

• Ka hariñagubei fiu íbirigu luagu abiniruni le resibi hamaalibei ladüga heseriwidun Betelirugu?

• Ka burí katei lunbei lagunfuliruni gürigia lun gayara lan leseriwidun Betelirugu?

• Ka lunbei hadügüni lun heseriwidun Betelirugu?