Duari humá luéi haburuchaguagüdün iyeeni

Wéiriti lufuresen léibaagun ñunsu hadan saragu míñunu gürigia uguñe weyu ladüga Internet, radiu, periodiku tuma bigibigitu. Wagía ha áhuduragubaña lun “Lubungiute inarüni”, mabusenruntiwa waburuchaguagüdün iyeeni ni íbini mabusenrunga (Sal 31:5; Afu 23:1). Gayaraati lanügün ariñahani le wásügüragüdübei houn amu saragu wuribani. Lun hasubudiruni anhein inarüni lubéi aban katei, álügüdagua humá hungua:

• Gayaraati san wafiñerun luagu le ariñagubalin? Másiñati ibidiñe lan sun ariñahani lun le ariñagubalin. Asansireina liña giñe dimurei eibu lásügürün lúmagiñe aban gürigia lumoun amu. Ligíati, duari humá dan le ibidiñe lan hun halíagiñe lan liabin aban ariñahani. Kei agurabúa lan lun inarüni lan sun ariñahani le ñǘbuinbei hámagiñe íbirigu ha anügübalin ubaraü, lúntitima duari hamá luéi hariñagun aban katei le machourun hamuti.

• Híchuguba san luriban iri luagu somu gürigia? Anhein ítara liña lubéi, buídutimati lun máguyuguagüdün humani (Ari 18:8; Fili 4:8).

• Gayaraati san lafiñerúniwa? Duari humá dan le hanarimeya lan sügǘ le abahüdawagúbei hun.

LÁRIGIÑE HARIHINI BIDÉU IDA LUBA NARARAMUNI ACHURAHANI?, ÓUNABA HUMÉI ÁLÜGÜDAHANI BURÍ LE:

• 

  Según Ariñawagúni 12:18, wéiriti san damichi le gayaraabei ladügüni le wariñagubei?

• 

  Ida liña líderaguniwa Filipuna 2:4 lun wasaminarun kaba lan wariñaga houn amu?

• 

  Ka lunbei wadügüni dan le lagumeserun amu gürigia ayanuha wuriba hawagu ha híbiri?

• 

  Lubaragiñe wagumeserun ayanuha hawagu amu, ka álügüdahani lunbei wadügüni wóuniwagua?