Góunigi huméi hibagari keisi maríeitiña

Ariha lumuti Heowá füramasei le hadügübei maríeitiña hámagua kei aban katei le sagüráuti (Mt 19:5, 6). Ariñagati mosu lan hasigirun maríeitiña hámagua. Añahein saragu maríeitiña gúndaatiña hadan lumutuniña Heowá. Keiti ua habéi maríeitiña ha machararuntiña, anihein dan gaturobulin hamá. Moun lumuti wasaminarun ígiraguni lan o afanreinraguni láranibei turobuli. Ka gayaraabei hadügüni kristiánugu lun hóunigiruni habagari keisi maríeitiña?

Ariha wamá seingü adundehani.

1. Góunigi humóun hanigi ani maha humá lun isebáhari wíyeti, merederun huguyame adariha amu. Gadei lumuti lira habagari maríeitiña (Mt 5:28; 2 Fe 2:14).

2. Héregüda huméi humadagua luma Heowá ani áfaagua humá lun gunda lan lau hibagari keisi maríeitiña (Sal 97:10).

3. Sigí humá áfaagua lun háyeihani iseri igaburi luma lun hadügün lirahüñü burí katei le buíduburiti húmawagua, lun ladügün kada aban hídangiñe lun ménrenguntima lan ibagari lun le aban (Kol 3:8-10, 12-14).

4. Gayanuhadi humá húmagua ani adüga huméi lau inebesei (Kol 4:6).

5. Arufuda humá ínsiñehabuni dan le harounrun húmagua (1 Ko 7:3, 4; 10:24).

Dan le inebe lan maríei houn kristiánugu, harufuduñein inebe lan Heowá houn, Bungiu le adügübalin maríei.

LÁRIGIÑE HARIHINI BIDÉU LUNTI WAWANDUN LIDAN ÉIBAAGUNI: FALÁ WAMÉI LILURUDUN ÉIBAAGUNI, ÓUNABA HUMÉI ÁLÜGÜDAHANI BURÍ LE:

• Íbini buidu lan lagumeserun aban maríei, ka turobuli gayaraabei liábingua?

• Ida liña gayara lan líderaguniña adundehani le tídanbei Bíbülia maríeitiña ha asandirubaña ua lan ínsiñeni hadan?

• Ka adundehani líchugubei Heowá houn maríeitiña?

• Ka lunbei hadügüni maríeitiña lun gunda lan habagari hámagua?