Ruti adamurini wéiriti chansi woun lun warufudun ínsiñeni wámagua

Ka uagu weiri lubéi línsiñe wani burí adamurini woun? Ladüga gayara lan walawahani Heowá úara hama saragu san, o íbini saragu milu íbirigu, kei meha lasuseredun lidan binadu Ísüraeli. Mama resibirügütiwa saragu ariñahani lúmagiñeti Bungiu, sügütiwa giñe dan hama wamadagu luma hama waduheñu. Wéiriti línsiñe adamuridaguni burí le woun darí lun adüga wamani sun wayaraati lun ñein wamá ǘrüwagubei weyu.

Dan le wadamuridagun, moun lumuti wasaminarun luágunrügü le lunbei weresibiruni, mosu giñe wasaminarun ida luba lan warufudun ínsiñeni houn amu (Gal 6:10; Ebü 10:24, 25). Mosu wasaminarun hawagun ha híbiri lau márügüdün wamá lóugiñe haláü le lunbei wemegeiruni o lau wágüdahani bena lubá somu íbiri lun lásügürün (Fili 2:3, 4). Gayaraati giñe wadügün iseri umadagu lidan burí adamurini. Áfaagua wamagia lun wayanuhan lun somu íbiri le ibidiñeti woun! Gayaraati wadügüni lubaragiñe o lárigiñe programa, o lidan lóurate éigini (2 Ko 6:13). Gayaraati ladurarun umadaguaü burí le lun súnwandan. Danme le harihini amu hínsiñegua wamá wámagua, másiñati línchahaniña lira lun giñe habusenrun heseriwidun lun Heowá (Hn 13:35).

LÁRIGIÑE HARIHINI BIDÉU ADAMURINI HOUNTI LÍLANA ÁMUÑEGUEINARÜGÜ AGEIRAÜ “MAGUMUCHAGUNBEI ÍNSIÑENI”, ÓUNABA HUMÉI ÁLÜGÜDAHANI BURÍ LE:

• Ka hadügübei íbirigu lun harufudun ínsiñeni houn ha achülürübaña lidoun adamurini hounti lílana ámuñegueinarügü ageiraü le adügǘbei lidan irumu 2019?

• Ka uagu adüga lubéi ínsiñeni luma úarani le hádanbei lumutuniña Bungiu lun taweiridun hanigi gürigia?

• Ka hafuranguagüdübei lílana Musu Úaraguati luagu ínsiñeni?

• Ida liña lóundaraguniña ínsiñeni íbirigu ha lídanbaña ageiraü Yámani luma Koréa le Súrubei?

• Ka lunbei aranseñu wamá lun wadügüni?