Arufudati eweridihani ínsiñehabuni

Úarati ererehóuni luma arufudahani gama lumoun úarati giñe luma abeichúni. Ererehati Heowá woun lun wáhuduragun lun kei aubei labusenra (Rom 12:1; Ebü 12:10, 11). Anihein dan gáriti woun dan le lererehóun woun. Ánhawa ánhara lun ererehóuni gürigia báadiwa ha richatiña ani labinirubadiwa Bungiu (Ari 10:7). Ka lunbei gabaroun hamani dandu ha ererehabaña kei ha eresibirubalin ererehóuni?

Ha ererehabaña. Áfaaguatiña wéiyaaña lidan afiñeni, agübürigu hama amu lun hererehan lau ínsiñehabuni ítara kei ladügüni Heowá (Her 46:28). Lunti lererehóun lun gürigia según le lemegeirunbei lau ínsiñehabuni (Tit 1:13).

Ha únbaña lererehóun. Meberesenga ka lan úmagiñe liabin ererehóuni, lunti wánharun lun le ariñagubei woun luma lun gaganbadi wamá lun lau lóufudagun (Ari 3:11, 12). Kei le chará wabéi sungua luagu, mégeitiwa lererehóuniwa woun. Gayaraati weresibirun ererehóuni dan le waliihanu Bíbülia o lidan le waganbubei lidan adamuridaguni. Anihein dan mégeiwati lun hererehan wéiyaaña lidan afiñeni woun. Ánhawa ánhara lun ererehóuni ani adüga waméi asansiruni le mégeiwabei wibihiba ibagari magumuchaditi (Ari 10:17).

LÁRIGIÑE HARIHINI BIDÉU EREREHATI HEOWÁ HOUN HA HÍNSIÑEBAÑA LUN, ÓUNABA HUMÉI ÁLÜGÜDAHANI BURÍ LE:

• Ida liña meha libagari Canon dan meha le ñǘraügili ani ida liña lasansirun?

• Ka ererehóuni libihubei lúmagiñe Heowá?

• Ka wafurendeirubei lídangiñe le lásügürübei Canon?