Seriwi humá kei prekursoru

Adügati wáfaagun lun waganwoundagüdüni weseriwidun lun Heowá lun buidutimalá wayusuruni were luma wadaani lubaragiñe lagumuchun ubóu (1 Ko 9:26; Efe 5:15, 16). Lidan háhuduragun lun Bungiu keisi iduheñu, ka uagu mayanuha hubéi ida luba lan haganwoundagüdüni heseriwidun lun Bungiu lidan iseri irumu lánina eseriwiduni? Tidan agumeiraguagüdüni to hadariruba saragu ariñahani luagu le gayaraabei hadügüni lun haganwoundagüdüni heseriwidun lun Heowá lárigiñeme hafurieidün lun (Snt 1:5).

Kei hénpulu, gayaraati san hídehan sun tílana muna lun leseriwidun aban hádangiñe kei prekursoru le adügübei ǘrüwa wein diisi oura? Anhein samina hubéi siñabei lan hagunfuliruni oura, ayanuha humá luma aban prekursoru le ítarabei gádanti kei huguya (Ari 15:22). Másiñati, gayara lan hálügüdagun aban prekursoru lidan háhuduragun lun Bungiu keisi iduheñu luagu burí katei le ladügübei, ábameti habürüdüni oura le gayaraabei lahuudun hun. Luagu le aban oubaü, anhein meha seriwi hubéi kei prekursoru lidan dan le sügühalibei, ka uagu máfaagun hubéi lunya hadügüni?

Gayaraati san leseriwidun aban hádangiñe tílana muna kei prekursoru ídehati luagu aban hati o lóugiñe? Anhein lóuguaali lubéi here gayaraati hapurichiha murusun oura sagü weyu. Ani anhein madaani hubéi lun hapurichiha labadinagua dimaasu ladüga wadagimanu o leskuela, háfuga gayara lan heseriwidun kei prekursoru lidan aban hati le ídanbei lefeduhan ageiraü o seingü ñein lan samudi o dimaasu lidan hati ligía. Makü huméi tidan aban kalendáriu hati burí le ídanbei habusenra heseriwidun kei prekursoru ídehati ani abürüha huméi ida luba lan hagunfuliruni hóurate (Ari 21:5).

LÁRIGIÑE HARIHINI BIDÉU GANIGI HUMÁ, PREKURSORUGU, ÓUNABA HUMÉI ÁLÜGÜDAHANI BURÍ LE:

• Ida liña lóunigirunu Heowá íbiri Aamand? Ka larufudahabei le woun?