Ka uagu anihein lubéi furíei le móunabun lumuti Bungiu?

Lau sun hínsiñe lan lun Heowá, Wáguchi le siélubei, laganbuni afurieiduni le wadügübei lun tídangiñe sun wanigi. Móunabun lumuti sun afurieiduni. Ka uagu? Ka lunbei gabaroun wamani dan le wafurieidun? Ariha waméi le tariñagubei Lererun.

Aban sétanu gürigia tidan aban ligilisi afurieida tídangiñe aban líburu.

Dan “le hafurieidun, máguyuguagüda humá dimurei” (Matéu 6:7).

Mabusenrunti Heowá lun wafurieidun lun lau wáguyuguagüdüni dimurei le wafurendeirubei lidan wachügü ni lun waliihani tídangiñe aban líburu. Busenti lun wafurieidun lun tídangiñe sun wanigi. Lun hamuga sagü lan weyu lariñaguni somu humada ligiaméme katei hun, ma labuchaduña hamuga huagu lubá? Umadagu ha buídubei hanaagun houngua, abahüdaguatiña saragu katei hóuniwagua. Dan le wafurieidun lun Bungiu lau wayusuruni wererun guánarügü, warufuduñein lun ariha wamani kei wamada.

Aban wügüri ariha iñun sun anihán lan áhiaha aban gárada lun larihini ka lan lagañeirubei.

“Anhein hamuriaha, mibihin humuti lugundun luriban hamuriahan” (Santiagu 4:3).

Siñati wagurabun lóunabubei lan Bungiu wafurieidun ánhawa amuriaha katei le wasubudirubei mínsiñe lan lun. Kéiburi hamuga anhein láhureruña lubéi aban gürigia luagu seinsu ani aba lamuriahan luma Bungiu lun gabunurun lan, lóunabuñein hamuga san Heowá afurieiduni ligía dan le ariñagaali lan woun tidan Lererun mabusenrun lan lun wéinamu lan wagu luagu seinsu ni lun wafiñerun luagu ubunuruni? (Isaíasi 65:11; Lúkasi 12:15). Siñati wagurabun lóunabubei lan Heowá furíeigi líbeina lira. Lun lóunabuniwa Bungiu, mosu wachoururuni úaragua lan wafurieidun luma le lariñagubei woun tidan Lererun.

Aban tábuti ligilisi afurieida hau súdaragu.

“Ánhaña maha gürigia hadügün gasu lau lilurudun Bungiu, maganbun lubéi Bungiu hafurieidun” (Ariñawagúni 28:9).

Lidan meha tidaani Bíbülia, móunabun lumuti meha Bungiu hafurieidun gürigia ha maganbadibaña lun Lilurudun. Ligiaméme giñe asuseredubei uguñe weyu (Isaíasi 1:15, 16; Malakíasi 3:6). Anhein busén wabéi lun lóunabuni Bungiu wafurieidun, mosu wáfaagun lun gaganbadi wamá lun Lilurudun. Ánheinti adügaadiwa lubéi katei burí wuribati lidan dan le sügühalibei? Mini lan san lira maganbun lubadiwa lan Heowá? Uá. Aranseñu liña Bungiu lun feruduna lániwa anhein asakürihaadiwa lubéi ani adüga waméi sun wayaraati lun wadügüni lugundan (Adügaü 3:19).