Gayaraati hanúadirun ida luba lan hibagari ámuñegü

Kei burí 3,500 irumu guentó, ariñagati Bungiu Heowá houn ha meha áhuduragubaña lun, ka lan meha lunbei hadügüni lun buidu lan habagari ámuñegü: “Ru naadün [...] lun hanúadahan aban lídangiñe bián katei le, ibagari luma óunweni, luma lidan abiniruni luma íñarawaguni. Anúadira huméi lubeiti ibagari lun habagaridun hau sun hadügawagun” (2 Lúrudu 30:19).

Anhein meha busén habéi gürigia ha lun buídubei lan lidin houn ámuñegü mosu meha hanúadiruni le buítimabei. Wagía sun, mosu giñe wanúadahan. Ariñaga tumuti Bíbülia ida luba lan wanúadirun lun buidu lan wabagari ámuñegü: “Hínsiñela [Heowá] le Wabungiute hun, aganba huméi” (2 Lúrudu 30:20).

IDA LUBA LÍNSIÑEDUN HEOWÁ HUN ANI AGANBA HUMÉIME?

FURENDEI HUMÉI LE TARIÑAGUBEI BÍBÜLIA. Furumiñeti katei le lunbei hadügüni lun línsiñedun Heowá hun, hafurendeiruni le tariñagubei Bíbülia luagu. Danme hadügüni, híchuguba fe luagu wéiri lan línsiñehabu ani busén lan lun buídubei lan lidin hun. Busenti giñe lun hafurieidun lun, lugundun lóunigiruñadün le tímatimaati (1 Féduru 5:7). Füramasetu Bíbülia ánhadün lan áfaagua lun hasubudiruni, ábame giñe layarafadun hun (Santiagu 4:8).

WINWAN HUMÉI LE HAFURENDEIRUBEI. Lun waganbuni Bungiu mosu hafalaruni lubuidun ladundehan, le adarirúbei tidan Bíbülia. Danme hadügüni, lasusereduba le lariñagubei Hosué 1:8 hun: “Ítara luba lasalirun sun le badügübei bun buidu”.