Ka mini lubéi uganu le tídanbei líburu Arufudúni hun uguñe weyu?

1, 2. Írida humá aban resun ka lan uagu lunti lubéi webereserun tau líburu Arufudúni?

ARIHAÑAHADÜN san iyawaü burí tidan somu álbum? Másiñati ariha humá saragu hagibu gürigia ha ibidiñetiña hun. Sódini aba harihin aban iyawaü to achawarubalin haritagun. Ka uagu? Lugundun furí humá tidan. Aba herederun aríaguoun ani aba háfaagun lun haritaguni ídabuga lan ani halía lan tadiraarúa. Ani busentün hasubudiruniña sun ha áfuridubaña tidan. Espechalitu iyawaü to hun.

² Ligíati, ítaratiña líburu Arufudúni kei iyawaü to. Ka uagu? Luagu bián resun. Le furumiñeti, woun tabürüdǘwa líburu to. Ariñawagúati lidan furumiñeti bérusu le lídanbei furumiñeti kapítulu: “Anihán burí katei le larufudubei Bungiu lun Hesukrístu lun lasubudiragüdüni houn lánigu, katei le burí lunbei lasuseredun madise” (Aruf. 1:1). Ligíati, mama houn sun gürigia tabürüdǘwa líburu to, woun wagía le lubúeingu Bungiu tabürüdǘwa. Ligía maweiriduntu wanigi lau wídehaña lan lidan lagunfulirun lubuidun burí profesía le. Gayaraati wariñagun “awanhán lan tidan iyawaü”!

3, 4. Según líburu Arufudúni, ídaame lagunfulira profesía le bürüwañubei tidan ani ida luba gani lan lidan le wanúadirubei wadügün?

³ Gániti libiaman resun luma dan le úmabei lagunfulira profesía burí le. Ayanuhati apostolu Huan luagu dan le, dan le lariñagunbei: “Aba nerederun lábugiñe lubafu sífiri sandu lidan luéyuri Aburemei” (Aruf. 1:10, TNM). Bürǘ lumuti Huan dimurei burí le lidan irumu 96 lárigiñe lidaani Kristu. Ani lidan dan ligía dísegili meha lun lagumeserun “luéyuri Aburemei” (Mat. 25:14, 19; Luk. 19:12). Arufudati profesía le tídanbei Bíbülia gumese lan weyu ligía lidan irumu 1914, dan le lagumeserunbei Hesusu Arúeiha sielu. Lúmagiñe dan ligía lagumesera profesía le tídanbei líburu Arufudúni agunfulira, le gánibei hama lumutuniña Bungiu. Ligíati, wawinwanduña lidan “luéyuri Aburemei”.

⁴ Kei wawinwanduña lan lidan aban dan le ídanbei lagunfuliruña lan profesía le tídanbei Bíbülia, mosu gabaroun wamani adundehani le buinbei lau ínsiñeni, le waliihabei tidan líburu Arufudúni 1:3: “Gúndaatiña gürigia ha aliihabalin hama ha aganbubalin laliihóun uganu le, le eresibirúabei lúmagiñe Bungiu adüga hagía gasu lau katei le bürüwañubei ya, ladüga yarafaali dan lun lasuseredun”. Ligíati mosu lubéi waliihani lau umalali héreti “uganu le, le eresibirúabei lúmagiñe Bungiu”, aganba wameime ani gaganbadi wagíame lun. Ka burí dimurei le unbei gaganbadi wamá lun?

CHOURU WAMÉI ANHEIN ANHA LUBÉI HEOWÁ LUN LIGABURI WÁHUDURAGUN

5. Ida liña tarufuduni líburu Arufudúni súdini lan lun wachoururuni anhein anha lubéi Heowá lun ligaburi wáhuduragun lun?

⁵ Lidan furumiñeti kapítulu tidan líburu Arufudúni furanguti larihín subudi lani Hesusu sun le asuseredubei lidan damuriguaü (Aruf. 1:12-16, 20; 2:1). Uganu meha le labürühabei lun sedü damuriguaü le lóubawagubei Liraüraü Asia arufuda lumuti ítara liña lan. Lidan burí uganu ligía, ruti Hesusu adundehani le huuti lun líderaguniña kristiánugu ha lánina furumiñeti sígulu achoururagüdei anhein anha lubéi Heowá lun ligaburi háhuduragun lun. Íderagua lumutiwa giñe adundehani le súngubei wagía ha lubúeingu Bungiu ha lídanbaña dan burí le. Ka larufudahabei katei le woun? Subudi lumuti lan Hesusu, le Wábuti, ida liña lan wamadagua luma Bungiu. Adundeha lumutiwa ani góunigi lawa, ani ariha lumuti sun le asuseredubei. Subudi lumuti le lunbei wadügüni lun meferidirun wamani lugundan Heowá. Guentó, wariha lídangiñe adundehani le líchugubei luma lun wadügün gasu lau uguñe weyu.

6. a) Según Arufudúni 2:3, 4, ka burí turobuli úmabei hagagibudagua kristiánugu ha Éfesubaña? b) Ka wafurendeirubei lídangiñe?

⁶ (Aliiha huméi Arufudúni 2:3, 4). Meferidira waméi ínsiñeni le meha wasandirubei luagu Heowá. Uganu le meha líchugubei Hesusu houn kristiánugu ha meha Éfesubaña arufudati awandaaña lan ani seriwi haña lan meha lun Heowá mabuchadunga hawagu íbini gaturobulin hamá. Gama lumoun, maweirinhali meha ínsiñeni le hasandirubei luagu. Anhein meha busén habéi lánharun Heowá lun ligaburi háhuduragun mosu meha hederebudagüdüni ínsiñeni le hasandirubei luagu. Ligiaméme asuseredubei uguñe weyu. Úati buídurügü lan lun wawandun, lunti gébuna lan ka lan uagu wadügei. Mámarügüñein le wadügübei lariha Heowá ariha lumuti giñe ka lan uagu wadügei. Súdiniti lun Heowá ka lan lébunabei wadügüni katei. Agurabati wáhuduragun lun ladüga línsiñe woun luma ladüga teinki wamani (Ari. 16:2; Mar. 12:29, 30).

7. a) Según Arufudúni 3:1-3, ka turobuli larihibei Hesusu lidan damuriguaü le uburugubei Sárüdisi b) Ka lunbei wadügüni?

⁷ (Aliiha huméi Arufudúni 3:1-3). Ítarameme wamá agagudúañu. Amu meha haturobulinbei lílana damuriguaü le Sárüdisibei. Íbini seriwi hamá meha lun Bungiu lau ubebeni furumiñe, lau lásügürün dan aba úaali lan meha ubebeni ligía hawagu. Ligía lariñagubei Hesusu houn lunti lan agagudúañu hamá. Ani anihán aban eweridihani woun uguñe weyu. Inarüni mabulieidun lubéi lan Heowá sun le wadügübei luagu (Ebü. 6:10). Moun lumuti wasaminarun kei seriwihadiwa lan lun Heowá lidan dan le sügühalibei mámaali lan mosu wáfaagun. Másiñati siñaali lan wadügüni sun wayaraati kéiñaha wadügüni, gama lumoun, le lunbei wadügüni waganwoundagüdüni luadigimari Wabureme ani agagudúañu wamá darime lachülürün lagumuchagüle ubóu (1 Ko. 15:58; Mat. 24:13; Mar. 13:33).

8. Ka wafurendeirubei lídangiñe le lariñagubei Hesusu houn kristiánugu ha Laodiseabaña? (Arufudúni 3:15-17).

⁸ (Aliiha huméi Arufudúni 3:15-17). Hudugua wamá lun Heowá tau sun wanigi luma lau ubebeni. Lidan uganu le lóunahabei Hesusu houn kristiánugu ha Laodiseabaña ayanuhati ñein luagu ábaya turobuli; luagu madili hamá ani masü hagía lidan heseriwidun lun Heowá. Ligía lariñagubei Hesusu houn fugiabu hamá ani gudeme hagía. Ligía lunti lubéi hasansiruni hagaburi lun harufudun ubebeni lidan háhuduragun lun Heowá (Aruf. 3:19). Ka wafurendeirubei lídangiñe sügǘ burí le? Anhein féridi wamaali lubéi ubebeni le meha wawagubei, lunti waganwoundagüdüni weteingiradi luagu le ru laalibei Heowá tuma lóundarun woun (Aruf. 3:18). Mígira wamá lun ladügün wabusenrun wawinwandun aban lubuidun ibagari lun ladireirun wasaminan luéi katei lúmagiñeti Bungiu. Busentiwa lun súdinitima lan woun weseriwidun lun Heowá lidan wabagari.

9. Lau gabaroun wamani le lariñagubei Hesusu lun damuriguaü le Pérügamubei luma lun le Tiatirabei, ka denchaü lunbei wadisedun luéi?

⁹ Maha wamá lun harufudahan ha agarabaagubaña luagun Bungiu. Ererehati meha Hesusu houn kristiánugu ha Pérügamubaña ladüga anihein lan meha lanarime fánreinguaü haganagua (Aruf. 2:14-16). Luagu le aban oubaü, ariñagati Hesusu gunda lan hau kristiánugu ha Tiatirabaña lugundun mafala hamuti “lilulin-agei katei lani Mafia” ani ínchaha lumutiña lun hárügüdün luagu inarüni (Aruf. 2:24-26). Kristiánugu meha ha débilibaña afiñe ani ígiraguagüda hagía houngua lun arufudahani mama inarüniti mosu meha hasaküriha. Ítarameme, mosu wamahadun lun furumiñeguarügü arufudahani le múaranti luma larufudahan Heowá. Gayaraati hafamurun ha agarabaagubaña luagun Bungiu “kamá gúnfulitiña luma”, gama lumoun, le linarün katei, arihúati luagu “iyeeni lan lau ligaburi habagaridun” (2 Tim. 3:5). Anhein hechu wabéi aturiahoun Lererun Bungiu, ménrengunbei woun wasubudiruni arufudahani mama inarüniti ani máhabadiwa lun (2 Tim. 3:14-17; Hud. 3, 4).

10. Ka wafurendeirubei lídangiñe le lariñagubei Hesusu lun damuriguaü le Pérügamubei luma le Tiatirabei?

¹⁰ Maha wamá lun furumiñeguarügü luwuyeri agamariduni. Lidan meha damuriguaü le Pérügamubei luma le Tiatirabei anihein meha ámuya turobuli. Añahein meha hádangiñe kristiánugu ha lídanbaña damuriguaü le, mígirun hamagili meha magíaguni, ligía meha mosu lubéi lererehan Hesusu houn (Aruf. 2:14, 20). Arufudahati katei le woun laguseragüdübadiwa lan Heowá ánhawa éiguada lidoun magíaguni íbini gibe lan wadasin o barühadiwa lan saragu irumu lidan inarüni (1 Sam. 15:22; 1 Fe. 2:16). Íbini wuriba lan hanügüni gürigia habagari lidan ubóu le, agurabati Heowá lun gaganbadi wamá lun lilurudun luáguti laruman ibagari (Efe. 6:11-13).

11. Ka wafurendeirubei darí guentó? (Ariha huméi giñe rekuáduru le gíribei “Le wafurendeirubei”)

¹¹ Ka gayaraabei wariñaguni luagu fiu katei le furendei wamaalibei? Arihaadiwa súdini lan lun wachoururuni anhein anha lubéi Heowá lun ligaburi wáhuduragun. Anhein wadügüña lubéi katei wuribati, adüga waméi asansiruni le mégeiwabei lau lóufudagun (Aruf. 2:5, 16; 3:3, 16). Ariñagayati Hesusu amu burí katei lidan uganu le lóunahabei lun burí damuriguaü. Ka uagu layanuha?

ARANSEÑU WAMÁ LUN WAWANDUNI ÉIBAAHOUNI

12. Ka wafurendeirubei lídangiñe uganu le heresibirubei lílana damuriguaü le Esümírünabei luma le Filadélüfiabei? (Arufudúni 2:10).

¹² Akutiha waméi uganu le leresibirubei damuriguaü le Esümírünabei luma le Filadélüfiabei. Ariñaga lumuti Hesusu houn kristiánugu ha lun manufudedun hamá luéi éibaahouni ladüga líchuguba lan Heowá hafayeiruaha ladüga úaraguni le harufudubei (aliiha huméi Arufudúni 2:10; 3:10). Ka wafurendeirubei lídangiñe uganu burí le? Lunti lan gabaroun wamani wóuchawaguba lan ani lunti lan aranseñu wamá lun wawandun (Mat. 24:9, 13; 2 Ko. 12:10). Ka uagu súdini lubéi lun gabaroun wamani sun katei burí le?

13, 14. Ka lánibei profesía le iridúbei lidan kapítulu 12 tidan líburu Arufudúni hawagu lubúeingu Bungiu?

¹³ Tidan líburu Arufudúni ariñawagúati héibaahouba lan lubúeingu Bungiu lidan “luéyuri Aburemei”, mini lan le lidan wadaani. Afuranguagüdawati lidan kapítulu 12 “aba lan ñein lan aban wuribu sielu” lárigiñebei lagumeserun Larúeihan Bungiu sielu. Migeli, lememe Hesukrístu, ageindaguati úara hama lisudaranigu luma Satanási hau sun lumafianu. (Aruf. 12:7, 8). Féridi hamuti láganiñu Bungiu wuribu, ábati hagurún ubouagun ani añaha asufuriragüdaña gürigia (Aruf. 12:9, 12). Kati lánibei sügǘ le hawagu lubúeingu Bungiu?

¹⁴ Abahüdaha tumuti líburu arufudúni woun ka lan ladügübei Satanási. Kei bugawaali lubéi siélugiñe aba lábürühan lau igañi hawagun kristiánugu anuadirúaaña, kristiánugu ha arihibaña lau katei le lánina Larúeihan Bungiu le yaabei ubouagu, “ha ñǘdünbaña lau le lubeibei Bungiu; falá haméi luganute Hesukrístu” (Aruf. 12:17; 2 Ko. 5:20; Efe. 6:19, 20). Ida liña lagunfulirun profesía burí le.

15. Kátaña san bián gefentiña ha uágubaña layanuhóua lidan kapítulu 11 tidan líburu Arufudúni, ani ka asuseredubei houn?

¹⁵ Adügati Satanási lun hábürühan láganiñu Bungiu hawagun kristiánugu anuadirúaaña ha anügübalin ubaraü lidan lapurichihóun uganu luáguti Larúeihan Bungiu. Hadan burí íbirigu ha añahein ha gánibaña buligasion wéinamuti. Hagía “bián gefentiña”b ha áfarawagubaña hilagubei según líburu Arufudúni (Aruf. 11:3, 7-11). Lidan irumu 1918, widü hádangiñe íbirigu ha alidihabalin apurichihani aba lichugún hadurun ani aba hasiadirún lun yebe hásügürün saragu dan furisunrugu. Saminatiña yebe saragu gürigia gumuha lan lapurichihóun.

16. Ka asuseredubei lidan irumu 1919 le aweiridagüdübarun hanigi gürigia ani ka ladügübei Satanási lúmagiñe dan ligía?

¹⁶ Lidan profesía le lídanbei kapítulu 11 le tídanbei líburu Arufudúni ariñawagúati giñe aba lanme háguyugun “bián gefentiña” lárigiñeme murusun dan. Wéirigüda lumutu hanigi gürigia lagunfulirun profesía le lárigiñebei hígirawagüdün íbirigu furisunrugúgiñe fiu hati lárigiñe hadaürǘn. Lidan ǘrüwa-hati, irumu 1919, aba háfuridun kristiánugu ha furisunrugúgiñe, dan lárigiñe aba hariñagun gumadimatiña madurun hamá. Lau lóufudagun aba hagumeserun íbirigu apurichihei uganu lánina Larúeihan Bungiu. Gama lumoun, meredeti léibaahaniña Satanási lubúeingu Bungiu. Lárigiñe “aba lewerahan düragón ligía duna liyumulugugiñe” hárigi lubúeingu Bungiu lun léibaahaniña (Aruf. 12:15). Ligíati, sun wagía mégeitiwa lun derebugu wamá ani afiñeñu wagía (Aruf. 13:10).

ADÜGA HUMÉI SUN HIYARAATI LIDAN DASI LE RU LAALIBEI HEOWÁ HUN LUN HADÜGÜNI

17. Ka ídemuei heresibirunbei lubúeingu Bungiu íbini ábürüha lan Satanási hawagun?

¹⁷ Lidan kapítulu 12 tidan líburu Arufudúni, ariñawagúati heresibiruba lan lubúeingu Bungiu ídemuei le magurabun hamuti, lugundun ariñawagúati aba lan “lánhunrenchun múa, aba lachuuruni sun duna” lánina éibaahouni (Aruf. 12:16). Ani ligía asuseredubei. Anihein dan, ayanuhatiña gürigia ha lídanbaña ubóu le lábugiñebei lubafu Mafia, kei burí aguseragüdütiña, luéigiñe hafulesein lumutuniña Bungiu. Gáñeihaña lubúeingu Heowá saragu kesi le adügübei lun maturobulin hamá luma lúrudu. Ka hadügübei lau hadaani? Yusu hamuti sun hadaani lun hagunfulirun lau dasi le líchugubei Heowá houn lun hadügüni (1 Ko. 16:9). Káteiti dasi le?

18. Ka dasi súdiniti wadügübei lidan lagumuhóun dan le?

¹⁸ Ariñagati Hesusu lidan aban profesía hapurichihabei lan lani disipulugu “uganu buiti le luáguti Larúeihan Bungiu” lubaragiñe lagumuchun ubóu (Mat. 24:14). Lun lagunfulirún lau dasi le, resibiwati ídemuei lúmagiñe aban ánheli o hámagiñe fiu ánheligu ha láubaña uganu le magumuchaditi luma lun hapurichihani “houn ha aganóubaña ubouagu houn sun néchanigu, rasa, luwuyerigu dimurei luma sun fulasu” (Aruf. 14:6).

19. Ka amu uganu lunbei hapurichihani ha hínsiñebei Heowá houn?

¹⁹ Mámarügüñein lapurichihóun uganu buiti luáguti Larúeihan Bungiu hadügübei lubúeingu. Ídehatiña giñe hama ánheligu ha iridúbaña lidan kapítulu 8 darí 10 tidan líburu Arufudúni. Rútiña ánheligu ha ñunsu luagu sun asufuriruni le lunbei liabin hawagu sun ha máhabaña lun uganu le lánina Larúeihan Bungiu le ítarabei kei “lúbara huya le dereguati luma watu gemeti”. Arufudati uganu le, kaba lan ladüga Bungiu houn gürigia ha lídanbaña ámuñegueinarügü fánreinti le lídanbei ubóu le lábugiñebei lubafu Satanási (Aruf. 8:7, 13). Mégeitiña gürigia hasubudiruni yarafaali lan lagumuchagüle ubóu. Ítararügübei gayara lan hadügüni sun asansiruni le mégeiwabei lun hásügürün lau ibagari lárigiñeme luéyuri ligañi Heowá (Sof. 2:2, 3). Kei le mínsiñe lubéi uganu le houn sun gürigia, mósume ganigi wamá. Ani hanarimetimabei uganu le lunbei wapurichihani lídanme lidaani óunwenbu asufuriruni (Aruf. 16:21).

GAGANBADI WAMÁ LUN KATEI LE BÜRÜWAÑUBEI LIDAN PROFESÍA LE

20. Kaba wakutihan lidan bián aturiahani le lunbei liabin lárigiñe le?

²⁰ Wéiriti lisudinin lun gaganbadi wamá lun burí “katei le bürüwañubei” lidan profesía burí le ladüga awanhein tidan iyawaü, lidan amu dimurei, ídehatiwa lidan lagunfulirun profesía le tídanbei líburu Arufudúni (Aruf. 1:3). Lau sun lira, ida luba wawanduni éibaahouni lau úaraguni luma lun wasigirun apurichihei uganu le lau ganigi? Anihein bián katei le lunbei líchugun erei woun lun wawandun: le furumiñeti, le tariñagubei líburu Arufudúni hawagu láganigu Bungiu, ani le libiaman, layanuhaba luagu abiniruni le lunbei weresibiruni ánhawa úaragua. Wakutihabei bián ariñahani le lidan bián aturiahani le lunbei liabin lárigiñe aturiahani le.