Álügüdahani le hadügübei aliihatiña
Ka mini lubéi dimurei le lariñagubei Hesusu “maritagua humatia luagu niábiña lan lúnrügü níchugun gálumaü”?
Arufudahati Hesusu lunti lan darangilu wamá. Luagu aban dan aba lariñagun houn lani apostolugu: “Maritagua humatia luagu niábiña lan lúnrügü níchugun gálumaü ubouagu; mama niábiña íchiga gálumaü, niábiña íchiga wuribu. Lau niabin, hafanreinraguba ha mafiñenbaña nuagu hama ha afiñebaña nuagu; lawuribuhaba wügüri luma lúguchi, isaani tuma túguchu, ídiñu tuma tágürü” (Mat. 10:34, 35). Ka labusenrubei Hesusu lariñagun lau dimurei burí le?
Mabusenrunti meha Hesusu hafanreinragun iduheñu, subudi lumuti meha ladügüba lan le larufudahabei lun hafanreinragun iduheñu. Mosu gabaroun hamani ha lúnbaña hadügagun houngua lánigume disipulugu ani badisei hagía luagu magundanbaña lan haduheñu lau le hanúadirubei. Másiñati, magundanbaña lan gürigia ha úmabaña hamarieida o hiduheñu lau úaragua humá lun larufudahan Kristu.
Ariñagatu Bíbülia houn kristiánugu: “Lun habagaridun lidan darangilaü hama súngubei” (Rom. 12:18). Hadan fiu iduheñu gayaraati ítara lan larufudahan Hesusu kei aban “wuribu”. Susereti katei le dan le lánharun aban hádangiñe iduheñu lun larufudahan Hesusu, ani ha híbiri máhatiña lun ani magundantiña lau. Lagaganiraguba —kada aban “hama liduheñu”— ladügarügü hafurendeiruñein lan inarüni (Mat. 10:36).
Gürigia ha lánigubaña Hesusu disipulugu ha awinwandubaña hama iduheñu ha ámuñegueinarügütu hani relihión hawéi, anihein dan mosu lan hanúadirun anhein hagundaaragüdübei lubéi Heowá luma Hesusu o hagundaaragüdübaña lan haduheñu. Másiñati hadügüdarun haduheñu hawagu lun hefeduhan ítaga fedu le tani relihión. Lidan oura ligía, mosu hanúadirun kaba lan hagundaaragüda. Ariñagati Hesusu: “Le hínsiñehabuti lun lúguchi o lúguchu sügǘ lau nínsiñe lun, madüna lumuti nánigu lan” (Mat. 10:37). Ligíati, mama lariñaguña Hesusu ha lan busenbaña lun lánigu hamá disipulugu lun lan mínsiñe hamá hagübürigu houn. Le meha lafuranguagüdübei houn lunti lan furangu lan houn ka lan súdinitimabei houn lidan habagari. Anhein íchiga somu waduhe le mama gefenti luagu Heowá lidere dan woun lun máhuduragua wamá lun Heowá, hínsiñememebei waduhe woun, gama lumoun súdinitimati ínsiñeni le wasandirubei luagu Heowá.
Inarüni gari lan dan le líchugun somu waduhe lidere dan woun. Wagía le lani Hesusu disipulugu subudi wamuti dimurei burí le: “Le mawandunti asufuriruni libe lasufurirúniwa luagu wagabu lun lafalarunina, madüna lumuti nánigu lan” (Mat. 10:38 TNM). Ligíati, wagía keisi kristiánugu, subudi wamuti lun lan wafalaruni Hesusu lunti aranseñu wama lun wasufurirun, aban lídangiñe asufuriruni ligía, híchugun waduheñu lidere dan woun. Lau sun lira, agurabatiwa lun ladügün lubuidun wagaburi lun hasansiruni ligaburi hasaminan luma lun hebereserun lau uganu le tídanbei Bíbülia (1 Fe. 3:1, 2).