Wagía lubúeingu Heowá hínsiñeti irichaü le lúmagiñebei woun

1. Ka óuchawaguni úmabei lagagibudagua Hosé ani ka ladügübei?

GAGIBUGUATI meha Hosé le liráü Hakobu luma aban óuchawaguni hanarimeti. Súnwandan meha tariñagun aban würi lun: “Rounba numa”. Íbini tuguya lan meha lanboun Potifárü le liyubudiri weiriou, madügünti Hosé gasu tau. Másiñati lálügüdagun somu gürigia lungua, ka funa san uagu marounrun lubéi Hosé tuma. Úati meha Potifárü ñein ani Hosé aban meha idamuni tidan muna tuguya. Ani gayaraati meha tíchugun lidere dan lun anhein meha amahada tun. Íbini ítara máhati Hosé larounrun tuma íbini agiribuha tan lun lau saragu éregu. Ka san uagu mafala lubaroun? Ligía guánarügü ariñagubei: “Siñati [...] nadügün aban katei wuribati ítara lun nafigouhan ligibugiñe Bungiu” (Agu. 39:7-12).

2. Ida liña lasubudiruni Hosé figóu lan lagamaridun aban wügüri lani amu weiriou?

² Ida liña lasubudiruni Hosé wuriba lan ligibugiñe lagu Bungiu lagamaridun gürigia lani amu wügüri weiriou? Samina wamá mégeigili lan meha kei burí 200 irumu lun labürüdün lúrudu le ichugúbei lun Moisesi, le ariñagubei ítara: “Magamaridabá würi to maríeitu luma amu wügüri” (Afu. 20:14). Gama lumoun buídurügüti meha lasubudiruni Hosé ka lan lisaminanbei Heowá luagu magíaguni. Kei hénpulu, chouru lumuti meha Bungiu lan adügübalin maríei lun lerederun wügüri tuma würi. Chóuruti aganba lan ida liña lan lóunigirunu Heowá bián wéiyaasu Sara to lúguchu láruguti, dan le hálugubei bián urúeigu harounrun tuma. Ani aritagua lumuti ida liña lan giñe lóunigirunu Bungiu Rebeka, to lani Isaakü weiriou (Agu. 2:24; 12:14-20; 20:2-7; 26:6-11). Lau lasaminarun Hosé luagu sun le, ruti fe luagu le buídubei luma le wuribabei ligibugiñe lagu Bungiu. Kei meha le hínsiñe lubéi Heowá lun saragu, hínsiñeti meha lubuidun lilurudun lun ani aranseñu liña meha lun inebe lan lun.

3. Kaba wariha lidan aturiahani le?

³ Hínsiñeti san irichaü le lúmagiñeti Bungiu hun? Chóuruti hínsiñe lan hun. Sun wagía charatiwa, ánhawa móunigi gayaraabei wéiguadun tidoun sádara lun wáyeihani ligaburi ubóu le luagu le buídubei lumoun le wuribabei (Isa. 5:20; Rom. 12:2). Ligíati, warihibei ka lan irichaü le lúmagiñebei Bungiu ani ka lan uéigiñe buidu lubéi lun hínsiñe lan woun. Lárigiñeme ábame wakutihan ǘrüwa katei le gayaraabei wadügüni lun hínsiñe lan Heowá woun ani hínsiñe ligíame lilurudun woun.

KATEI SAN IRICHAÜ LE LÚMAGIÑEBEI BUNGIU

4. Ka igaburi múaranbei luma irichaü le lúmagiñebei Bungiu?

⁴ Dan meha le ya lubéi Hesusu ubouagu, óuseratiña meha alidihatiña relihión kamá le richaguatiña ani úaragua hagía. Gama lumoun, ariñagati Hesusu hawagun wuriba lan hagaburi lugundun ru hamani halurudun guánarügü luagu le buídubei lumoun le wuribabei (Apur. 7:16; Luk. 16:15). Uguñe weyu añahein gürigia ítara liña hagaburi kei alidihatiña relihión hagía. Según hagía saminatiña madügün hamá ni kata wuribati. Liibe-agei dan saminatiña iñu hamá hawéi amu ani ganigitiña hayanuhan wuriba hawagu gürigia. Magundanti Heowá lau igaburi le ani múaranti luma irichaü le ñǘbuinbei lúmagiñe.

5. Según Bíbülia, ka mini lubéi úaragua lan aban gürigia? Írida humá fiu hénpulu.

⁵ Aban lubuidun igaburi irichaü le lúmagiñebei Bungiu. Mini lan lidan murusun dimurei, wadügüni le buídubei ligibugiñe lagu Bungiu. Tidan Bíbülia, dimurei le ásügürawagüdübei kei “irichaü” arufudati lunti lan wawinwandun según liñun lúrudu le tídanbei: le lúmagiñebei Heowá. Kei hénpulu ruti Heowá gumadi houn alugurahatiña: “Úaraguala hubalansun” (2 Lur. 25:15). Ligíati, anhein busén lubéi aban kristiánu lun úaragua lan ligibugiñe Bungiu lunti richá lan lidan sun bísinisi le ladügübei. Lanwoun lira, gürigia le hínsiñebei irichaü le ñǘbuinbei lúmagiñe Heowá lun iyereeguti giñe lun larihini houserún amu lau marichaü. Lun lagundaaragüdüni gürigia ligía Bungiu lidan sun katei, súnwandan gabaroun lani lugumadin Heowá lidan sun le ladügübei (Kol. 1:10).

6. Ka uagu gayara lubéi wafiñerun luagu lilurudun Heowá luagu le buídubei lumoun le wuribabei? (Isaíasi 55:8, 9).

⁶ Ariñagatu Bíbülia Heowá lan gámabalin irichaü. Mini lan le lúmagiñe lan liabin irichaü le tímatimaati (Her. 50:7, TNM). Kei ligía lubéi adügübaliwa garichati lun líchugun lúrudu luagu le buídubei luma luagu le wuribabei. Kei mafigoun lubéi Heowá íñuti lisubudin wawéi, subudi lumuti le buídubei lumoun le wuribabei ánheinti wagía gébehati wasubudin lugundun dáseitiwa ani gafigoun wagía (Ari. 14:12; aliiha huméi Isaíasi 55:8, 9). Gama lumoun, gayaraati san wawinwandun según lúrudu le lúmagiñebei Heowá? Anha, ladüga adüga lumutiwa “lenege guánarügü” (Agu. 1:27). Ínchaha lumutiwa ínsiñeni le wasandirubei luagu Wáguchi Bungiu lun wáyeihani buidu buidu (Efe. 5:1).

7. Ka uagu mégeiwa lubéi lun ñein lan lúrudu? Ru humá fiu hénpulu.

⁷ Dan le wafalaruni lilurudun Heowá luagu le buídubei lumoun le wuribabei buiti lidin woun lidan wabagari. Ariha waméi ka lan uagu. Kéiburi hamuga, kaba hamuga asusereda anhein anúadira kada banku ebegi le lunbei tíchuguni luagu seinsu o kada lan kónpeni to ábunaguboun lau ligaburi tamisuraha? Ábanbei hamuga chagaguaü sun lira. Anhein hamugati kada lan háspitali o kada lan surusia o kada anosuhatiña etenira houn sánditiña lau ámuñegueinarügü igaburi, ma hóunweguña hamuga sánditiña, adián? Furanguti warihini lóunigirubadiwa lan gumadi le íchugubei woun anhein wasigira. Ligiaméme giñe asuseredubei lun gumadi le líchugubei Bungiu woun lun wabuidun guánarügü.

8. Kaba abiniruni heresibira ha hínsiñebei irichaü le lúmagiñebei Bungiu houn?

⁸ Biní lumutiña Heowá ha áfaagubaña lun inebe lan lugumadin houn. Füramaseti: “Galagantehabei gürigia buítiña múa, haganóuba giñe lidan súnwandan” (Sal. 37:29). Samina humaali san ida luba lan ibagari ámuñegü ubouagu danme le hafalaruni gürigia lilurudun Heowá? Wawinwanduba lau ugundani, darangilaü luma úarani. Busenti Heowá lun heresibiruni abiniruni le. Chóuruti gébuna lan lun hínsiñe lan irichaü le lúmagiñebei woun. Ka lunbei wadügüni lun hínsiñe lan igaburi le woun? Ariha wamá ǘrüwa katei le gayaraabei líderaguniwa ibihei.

KA GAYARAABEI WADÜGÜNI LÚNTIMA HÍNSIÑETIMA LAN LILURUDUN HEOWÁ WOUN

9. Kaba íderaguawa lun línsiñedun irichaü lúmagiñeti Bungiu woun?

⁹ Furumiñe: Hínsiñe hamá gürigia ha íchugubaña lúrudu woun. Anhein busén wabéi lun hínsiñe lan irichaü woun, lunti hínsiñetima lan le íchugubalin lúrudu luagu le buídubei lumoun le wuribabei. Éibutima línsiñedun Heowá woun éibutimaame wawinwandun según lilurudun le richabei. Samina wamá luagu Adán tuma Ewa. Lun hamuga hínsiñe lan Heowá houn maweiyasunbaña hamuga maganbadi lun (Agu. 3:1-6, 16-19).

10. Ka ladügübei Abüraámü lun gunfuranda lani ligaburi larihini Heowá katei?

¹⁰ Ma mabusenrúntiwa lun lasuseredun woun kei le asuseredubei lun Adán tuma Ewa, adián? Lun méiguadun wamá lidoun ligiaméme charati mosu wasubudiruni Heowá buidu, hínsiñe ligíame ligaburi woun luma lun wáfaagun lun gunfuranda wamani ligaburi lisaminan. Ánhawa adügei chóuruti laganwounduba lan ínsiñeni le wasandirubei luagu. Teni wamá lun Abüraámü, wügüri le asandirubei aban óunwenbu ínsiñeni luagu Lubungiute. Íbini dan le hénrengu lubéi lun gunfuranda lani le lanúadirubei Heowá lun ladügüni, mebedagunti lun Heowá. Adügarügü lumuti sun liyaraati lun gunfuranda lani buidu. Kei hénpulu, ida liña lóunabun Abüraámü dan le líchugunbei fe luagu anúadiraali lan Heowá lagünrinchaguni uburugu Sodoma luma Gomora? Furumiñe hanufudeti meha lagünrinchaguaaña lan “le aguseragüdüti íñugutimati lidan sun ubóu” ha gadurunbaña hama ha madurunbaña. Güreweiti meha lun Abüraámü lasaminarun ladügüba lan Bungiu aban katei ítarati, ligía ladügübei fiu álügüdahani lun Bungiu lau saragu ǘnabuguni. Gaguraasunti meha Heowá ani óunaba lumuti meha. Lárigiñe lagumuchun layanuha Abüraámü luma Heowá, aba gunfuranda lani Abüraámü ariha lani Heowá le tídanbei hanigi gürigia, ani maweiyasunbei lan agünrinchaguaña ha madurunbaña úara hama ha gadurunbaña (Agu. 18:20-32).

11. Ida liña larufuduni Abüraámü hínsiñe lan Heowá lun ani afiñen lan luagu?

¹¹ Yanu le layanuhabei Abüraámü luma Heowá libügürü Sodoma luma Gomora adügati lun lafurendeirun saragu lúmagiñe Heowá. Chóuruti adüga lan lira lun hínsiñe lan luma lun inebe lan Lúguchi le siélubei lun sügǘ luéi amu dan. Irumu lárigiñe aban lagagibudagun Abüraámü luma aban sügǘ hanarimeti lénrengun le óuchagubalin lafiñen luagu Bungiu. Aba lamuriahan Heowá luma Abüraámü lun ladagaragüdüni Isaakü liráü le hínsiñebei lun lidan aban sákürifisiu. Kei subudi laali lan Abüraámü Heowá buidu ligía madügün lubéi ni aban álügüdahani lun. Aranserügüti lun ladügüni le lamuriahabei Heowá luma. Íbini ítara hénrenguti meha lun ladügüni aransehani hénrenguti le. Chóuruti ráramagua lan asaminara luagu le lafurendeirubei lúmagiñe Heowá. Subudi lumuti meha Abüraámü maweiyasunbei lan Heowá amuriaha aban katei hanarimeti ítara. Según lafuranguagüdüni apostolu Pábulu subudi lumuti Abüraámü gayara lan lásaaragüdüni Heowá Isaakü lídangiñe óunweni (Ebü. 11:17-19). Inarüni katei le, lugundun füramase hali meha Heowá hádangiñeba lan ladügawagun Isaakü láfurida aban néchani, ani dan meha ligía masaanigungili meha Isaakü. Kei le hínsiñe lubéi Heowá lun Abüraámü chouru lumuti madügünbei lan Heowá katei le wuribati. Buin lau afiñeni gaganbaditi meha Abüraámü lun Bungiu Lúguchi, íbini hénrengu lan lun ladügüni (Agu. 22:1-12).

12. Ida luba wáyeihani Abüraámü? (Sálumu 73:28).

¹² Ida luba wáyeihani Abüraámü? Mégeitiwa wasubudiruni Heowá buidu. Ánhawa adügei, wayarafadatimaba lun ani éibume dan ábatimaame hínsiñe lan woun (aliiha huméi Sálumu 73:28). Lanwoun lira, waranserubei wasaminan buidu lun úara lan luma ligaburi lisaminan Bungiu (Ebü. 5:14). Ligíati anhein adügüdara somu gürigia wawagun lun wadügün somu wuribani wariñaguba lun uá. Masaminarunbadiwa wadügün aban katei le gayaraabei ladügün lun lagañidun Wáguchi Bungiu le siélubei wama ani gadeileime wamadagua luma. Ka gayaraabei wadügüni lun warufuduni hínsiñe lan irichaü lúmagiñeti Bungiu woun?

13. Ka lunbei wadügüni lun wáluahani buidu irichaü le lúmagiñebei Bungiu? (Ariñawagúni 15:9).

¹³ Libiaman: Áfaagua wamá sagü weyu lun hínsiñetima lan irichaü le lúmagiñeti Bungiu woun. Anhein busén lubéi aban wügüri lun taweinamudun lumesun mosu liñurahan gürabu sagü weyu. Ítara giñe mégeiwati áfaaguni lun laganwoundun ínsiñeni luagu le lariñagubei Heowá buidu lan. Anihán katei le lunbei wadügün sagü weyu. Subudi wamuti maweiyasunbei lan Heowá amuriaha wama lun wadügün lóugiñe le siñá wabéi adüga (Sal. 103:14). Chóurugüda lumuti woun hínsiñe hamá ha “abagaridubaña ibagari suruti lun” (aliiha huméi Ariñawagúni 15:9). Ma anhein busén wabéi weseriwidun lun Heowá lidan dan dayarüti, ma áfaaguatiwa lun wibihini, adián? Ligiaméme áfaaguni wadügübei lau wáluahani irichaü le lúmagiñebei Bungiu. Líchuguba Heowá gurasu woun lun wasigirun awansera, éibume lásügürün dan éibume wabuiduragüdüni (Sal. 84:5, 7).

14. Ka san mini lubéi “katei le adouragubei lau laniguagu súdara”, ani ka uagu megei wabalin?

¹⁴ Haritaguagüda lumutiwa Heowá lau ínsiñeni mama lan ihürügu ladügüniwa le lariñagubei (1 Huan 5:3). Lubaragiñe lira góunigi lumutiwa ani megei wamuti sagü weyu. Samina wamá luagu umegeguni le líchugubei Bungiu le ítarabei kei daüguaü to uáguboun layanuhan apostolu Pábulu (Efe. 6:14-18). Ka fánreinti tánina daüguaü to óunigirubarun lanigi aban kristiánu? “Katei le adouragubei lau laniguagu súdara” le mini lubéi lilurudun Heowá le richabei. Ítara kei tóunigiruni lidáü aniguagu lanigi aban súdara, góunigi lumutu giñe lilurudun Heowá wanigi, mini lan le, le wasandirubei múnadagiñe wabiti. Ligíati súdini lubéi lun ñein lan somu katei le gayaraabei lóunigirunu wanigi ítara kei katei le adouragubei lau laniguagu aban súdara (Ari. 4:23).

15. Ida luba san wadaürünu lidáü aniguagu?

¹⁵ Ida luba san wadorunu lidáü aniguagu to lúmagiñetu Bungiu? Lau gabaroun wamani lilurudun Bungiu lau le wanúadirubei sagü weyu. Lubaragiñe wanúadirun kaba lan uagu wayanuhan, kaba lan uremu waganbahan, kaba lan isebáhari wariha o kaba lan líburu waliiha, álügüdagua wamá woungua: “Kaba ebelura tidoun nanigi? Aban san katei le aubei lagundaara Heowá? O katei le ínchahabalina lun nadügün katei le wuribabei ligibugiñe lagu Heowá, kei burí magíaguni, anarimeni, igaaduaü o katei le adügübei lun nuouguoun lan nasaminara?” (Fili. 4:8). Anhein úara lubéi le wanúadirubei luma lilurudun Heowá, lóunigiruboun lilurudun le richabei wanigi luéi wuribani.

16, 17. Ida liña san lachoururagüdüni Isaíasi 48:18 woun gayara lan gaganbadi wamá súnwandan lun lúrudu le ñǘbuinbei lúmagiñe Heowá?

¹⁶ Ánheinti nidiheri wabéi luagu siñabei lan wafalaruni lilurudun Heowá le richabei weyu luagu weyu o irumu luagu irumu? Samina wamá luagu hénpulu le layusurubei Heowá le wadarirubei lidan Isaíasi 48:18 (aliiha huméi). Füramaseti Heowá ítara liña lan waricha kei “lugudi barana”. Samina wamá láruñadiwa lan beya aríaguei ida liña lan liabin lugudi barana sin lararamagun aban lárigiñe aban. Ma masaminarungubeitiwa oura ligía luagu lachülürüba lan aban weyu lun ua lan lugudi barana? Uá masaminarungubeitiwa luagu lira. Subudi wamuti barühali lan lugudi barana saragu milu irumu abouha larun beya, ani chouru wamuti ítarameme luba lugudi barana abouha.

¹⁷ Ligíati, ka lunbei wadügüni lun ítarameme lan irichaü le wámabei le ñǘbuinbei lúmagiñe Bungiu? Dan le wanúadirun wadügün somu katei, furumiñe samina wamá luagu le labusenrunbei Heowá lun wadügün, lárigiñe ábame wadügüni. Meberesenga hénrengu lan le lunbei wanúadiruni, ñeinbei Wáguchi Bungiu le hínsiñehabubei wama súnwandan lun líderaguniwa lun wadügüni luma lun gaganbadiméme wamá lun lilurudun le richabei weyu luagu weyu (Isa. 40:29-31).

18. Ka uagu moun lumuti lubéi wíchugun hadurun amu según wasaminan?

¹⁸ Lǘrüwan: ígiraba lun Heowá lan arihei anhein ladügüñein lubéi gürigia le buídubei o mama lan ladügüñein. Íbini wáfaaguña lan lun wawinwandun según lilurudun Heowá le richabei, moun lumuti wasaminarun wuriba hawagu amu ni lun wasaminarun richatima wamá sügǘ hawéi. Mariha wamaña amu kamá le ni kata láurügü wasaminarun garicha wamá lun wadügüni según wasaminan. Lubaragiñe lira subudi waméi Heowá lan “aguseragüdüti íñugutimati lidan sun ubóu” (Agu. 18:25). Míchugun lumutiwa Heowá keisi aguseragüdüti. Ruti Hesusu aban gumadi: “Míchiga humá hadurun amu, michugúnwa láamuga giñe hidurun” (Mat. 7:1).b

19. Ida liña larufuduni Hosé afiñen lan luagu irichaü le ñǘbuinbei lúmagiñe Heowá?

¹⁹ Arihaya waméi lani Hosé hénpulu, aban meha wügüri richaguati. Míchugunti hadurun amu ni dan le hóuseruni wuriba. Óusera hamuti líbirigu guánarügü wuriba, alugura haméi kei idamuni ani adüga hagía lun lafiñerun lúguchi hilá lan. Átiri irumu lárigiñe aba ladunrangun Hosé hama. Kei ábanhali lan gumadimati gabafuti gayaraati hamuga meha lóuseruniña wuriba luma lun lafayeiragüdüniña luagu wuribani le meha hadügübei lun. Hanufudetiña meha líbirigu luéi ladügüni katei le íbini asakürihaaña lan meha saragu luagu le hadügübei. Aba lachoururagüdüni Hosé houn lau dimurei le: “Manufudeda humá, siñati níchaagun nungua kei Bungiu” (Agu. 37:18-20, 27, 28, 31-35; 50:15-21). Ǘnabuguti meha Hosé aba lígiruni sun katei lúhaburugu Heowá lun ligía lan aguseragüdaña líbugañanu.

20, 21. Kaba íderaguawa lun masaminarun wamá garichatiwa lan sügǘ hawéi amu?

²⁰ Ítara kei Hosé, ígira wamuti giñe sun katei lúhaburugu Heowá lun ligía lan aguseragüda. Kei hénpulu, masaminaruntiwa subudi lan woun ka lan uéigiñe hadügei wábirigu le hadügübei. Siñati wasubudiruni ka lan tídanbei hanigi; Heowarügüñein “aguseragüdübalin saminaü” (Ari. 16:2). Hínsiñetiña sun hawuyeri gürigia lun Heowá meberesenga halíagiñe lan hayabin o ka lan harasanbei. Amuriahati wama: “Hínsiñehabu humá” (2 Ko. 6:13). Le lunbei wadügüni lun hínsiñe hamá sun wábirigu woun ha ítarabaña kei iduheñu, ani míchiga wamá hadurun.

²¹ Míchuguntiwa giñe hadurun ha mama lílana damuriguaü (1 Tim. 2:3, 4). Kei hénpulu, masaminaruntiwa wuriba hawagu waduheñu ha mámabaña gefentiña ani masaminaruntiwa giñe maweiyasunbaña lan ánhara lun inarüni. Lun hamuga wadügüni wanaaguña hamuga woungua ani wasaminaruña hamuga richá wamá hawéi. Anihagua Heowá íchiga chansi “houn sun gürigia lidan sun fulasu lun hasakürihan” (Adü. 17:30). Maweiyasun wamá abulieidei ariha lániña Heowá kei gürigia marichatiña ha asaminarubaña hawougua richá hamá hawéi ha híbiri.

22. Ka ínchahabalün lun hínsiñe lan irichaü le lúmagiñebei Bungiu hun?

²² Anhein hínsiñe lubéi irichaü le ñǘbuinbei lúmagiñe Heowá woun, gundabadiwa ani ábanbadiwa hénpulu buiti houn gürigia ha geyegubaña wau. Ladügüba katei le lúntima hínsiñetima wamá houn amu luma lun hínsiñetima lan Wabungiute houn. Chouru wamuti ariha lani Heowá áfaaguni le wadügübei sagü weyu lun gaganbadi wamá lun lilurudun le richabei ani adügati katei le lun lagundaarun. Íbini anihein lan saragu marichaü ubouagu mábürühan lan warüna. Mabulieida waméi hínsiñe hama “gürigia harumatiña lun” Heowá (Sal. 146:8).