Gayaraati wawinwandun lun súnwandan

1. Ka buiti wibihibei dan le wararamagun asaminara luagu füramasei le ladügübei Heowá woun lun wawinwandun lun súnwandan?

FÜRAMASETI Heowá “ibagari le magumuchaditi” houn ha gaganbadibaña lun (Rom. 6:23). Dan le wararamagun asaminara luagu lubuidun füramasei le, ábatima léredun ínsiñeni le wasandirubei luagu Heowá. Samina wamá luagu le: hínsiñetiwa lun Wabungiute le siélubei saragu darí lun líchuguni lubuidun idewesei woun lun maweiyasun wamá adiseda luéi.

2. Ida liña líderaguniwa füramase le lánina ibagari magumuchaditi?

² Füramasei le ladügübei Bungiu lun líchuguni ibagari magumuchaditi woun, íderagua lumutiwa lun wagagibudagun luma óuchawaguni. Íbini ánhawa hasiadira wáganiñu lun háfaraguniwa hilagubei, mígirun wabéi weseriwidun lun Heowá. Ka uagu? Ladüga subudi wamuti, ánhawa lan óunwegua úaraguñu lun Heowá, lagiribudagüdübei wabagari woun ani hemenigibadiwa, móunwedigiadiwa lanme (Huan 5:28, 29; 1 Ko. 15:55-58; Ebü. 2:15). Ka uagu chouru wabalin gayara lan wawinwandun lun súnwandan? Ariha wamá fiu resun.

WÍNWANTI HEOWÁ LUN SÚNWANDAN

3. Ka uagu chouru wabalin gayara lan ladügün Heowá lun wawinwandun lun súnwandan? (Sálumu 102:12, 24, 27).

³ Subudi wamuti gayara lan ladügün Heowá lun wawinwandun lun súnwandan ladüga ligía lébunabei ibagari ani wínwanti lun súnwandan (Sal. 36:9). Ariha wamá fiu bérusu tídangiñe Bíbülia le achoururagüdübalin woun winwan lan Heowá lun súnwandan ani lawinwanduba lun súnwandan. Ariñagati Sálumu 90:2 “lúmagiñe binadu dan lumoun lébeha dan Bungiu buguya”. Úaraguati luma le lariñagubei Sálumu 102 (aliiha huméi Sálumu 102:12, 24, 27). Abürühati profeta Abakúku luagu Wáguchi le siélubei: “Nabureme, ma funagia abunhein gumugua dan, Nubungiute le sándubei le móunwedadibei?” (Abak. 1:12).

4. Ka uagu moun lumuti lubéi wadiheridun anhein hénrengu lubéi woun lun gunfuranda wamani ñéingubeiñein lan Heowá?

⁴ Hénrenguti san hun lun gunfuranda humani magumuchagunbei lan Heowá? (Isa. 40:28). Mámarügüñein huguya asaminara ítara. Ariñagati Eliú luagu Heowá: “Siñati giñe wabahüdüni lirumudiri” (Hob 36:26). Íbini ítara, lau sun ua lan gunfuranda wamani le mini lubéi somu katei, úati mini lan lira mama lan inarüni. Kei hénpulu, másiñati ua lan gunfuranda wamani sunsuinagubei ida liña lan luadigimari leiti. Úati mini lan lira ua lan leiti. Ítarameme, úabei gunfuranda wamani sunsuinagubei wagía gürigia ida liña lan lagumeseha libagari Heowá ani magumuchadi lan. Íbini ítara úati mini lan le lagumuchuba lan libagari Heowá. Úabei gunfuranda wamani sunsuinagubei inarüni luagu le Adügübaliwa (Rom. 11:33-36). Ani lanwoun lira, anihein hali, lubaragiñe ladügüni ubóu, weyu hama burí saragu waruguma. Chóurugüda tumuti Bíbülia woun: Ligía lan “adügübalin múa lau lubafu”. Ariñagatu giñe “tulegualéi sielu lau lualin lichügü” (Her. 51:15; Adü. 17:24). Ariha wamá ábanya resun le achoururagüdübalin woun gayaraabei lan wawinwandun lun súnwandan.

ADÜGǗWATIWA LUN WAWINWANDUN LUN SÚNWANDAN

5. Ka hemenigibei furumiñetiña gürigia?

⁵ Sun katei gabagariti le ladügübei Heowá ya ubouagu lóunwenguba, gürigiarübaña móunwegun lau lásügürün dan. Ruti aban lubuidun emenigini woun lun wawinwandun lun súnwandan. Wéridi lumuti Heowá Adán: “Meigabóun tin wewe to lánina lasubudirúniwa le buídubei lumoun le wuribabei. [...] Ladüga anhoun beiga ninarün bau bóunweba” (Agu. 2:17). Lun hamuga gaganbadi lan Adán tuma Ewa lun Heowá, móunwegunbaña hamuga. Gayaraati wasaminarun lígiruba lan hamuga Heowá lun heigin “tídangiñe wewe to lánina ibagari” lau lásügürün dan. Chóurugüda lumuti katei le houn habagariduba lan yebe “lun sun dan” (Agu. 3:22).b

6, 7. a) Ka amu katei arufudubalin madügǘn wamá lun wóunwegun? b) Ka hayumahabei hadügün danme le heresibiruni ibagari magumuchaditi? (Ariha humóun iyawaü).

⁶ Súdiniti wasubudiruni darihaña lan fiu aturiahatiña siensia ariñahani le arufudubei gayara lan lareidun wasesun, lóugiñe ariñahani le gayaraabei wafurendeirun lidan sun wabagari. Lidan irumu 2010, ariñagatu aban garüdia merigana hani sásaamu, gayara lan lareidun wasesun kei burí bián míñunu dimí gigabytes, ítara liña hamuga kei aban bidéu le aduraruti ǘrüwa míñunu oura (wanügüba yebe lóugiñe 300 irumu) lun gayara lan warihini. Ani másiñati gayara lan lareidun wasesun sügǘ luéi ariñahani le hadarirubei aturiahatiña siensia. Chóurugüda lumuti katei le woun adüga lani Heowá lisesun gürigia lun lareidahan saragu ariñahani luéi le gayaraabei wafurendeirun lídanrügü 70 o 80 irumu (Sal. 90:10).

⁷ Adüga lumutiwa giñe Heowá lau óunwenbu ayumahani lun wasigirun awinwanda. Ariñagatu Bíbülia, ru lumuti Bungiu ayumahani tidoun hanigi gürigia lun hawinwandun lun súnwandan (Apur. 3:11). Ligía ítara liña lubéi óunweni woun kei aban ágani (1 Ko. 15:26). Samina wamá luagu le. Anhein adagara aban lanarime sandi wawagu, werederuba san cháguñu wáhabu? Úa, le wadügübei ñǘdüntiwa lun surusia ani guratiwa árani lun wareidagun. Adüga wamuti sun wayaraati lun móunwegun wamá. Ani, anhein ounwe somu gürigia le hínsiñebei woun, meberesenga anhein nibureinti lubéi o derebuguhali lan, barüti le aban lanarime igarigu woun ani magidarunti lau lóufudagun (Huan 11:32, 33). Subudi wamuti hínsiñe wamá lun le Adügübaliwa ani míchugun lubéi hamuga ayumahani le woun, lun hamuga mama lan ligía labusenrubei houn gürigia. Anihein amu burí resun lun wafiñerun gayara lan wawinwandun lun súnwandan. Akutiha wamá fiu katei le adüga laalibei Heowá luma le ladügübei guentó le arufudubalin masansirungili lan le labusenrubei ladügün houn gürigia.

MASANSIRUNGILI LISUUNI BUNGIU

8. Ka lachoururagüdübei Isaíasi 55:11 woun luagu lisuuni Heowá?

⁸ Ladüga lafigouhan Adán tuma Ewa, ligía galagante habalin hadügawagun óunweni, íbini ítara masansirun lumuti Heowá le labusenrunbei ladügün (aliiha huméi Isaíasi 55:11). Le labusenrubei, hasigirun gürigia úaraguatiña awinwanda lun súnwandan. Ida liña wasubudiruni? Luagu sun katei le ariñaga laalibei Heowá luma le adüga laalibei lun lagunfuliruni lisuuni.

9. Ka san füramasei adüga laalibei Bungiu? (Danieli 12:2, 13).

⁹ Füramaseti Heowá lásaaragüdübaña lan gürigia lídangiñe óunweni ani líchuguba lan chansi houn lun hibihini ibagari magumuchaditi (Adü. 24:15; Titu 1:1, 2). Chóurugüda lumuti Hobu aban hádangiñe lubúeingu Heowá ha úaraguatiña lásaaragüdübaña lan Heowá gürigia ha óunwegubaña (Hob. 14:14, 15). Subudi lumuti meha profeta Danieli hásaaruba lan sun gürigia lídangiñe óunweni ani gachansinbaña lun hawinwandun lun súnwandan (Sal. 37:29; aliiha huméi Danieli 12:2, 13). Subudi hamuti huríu ha awinwandubaña lidan lidaani Hesusu líchugubei lan Heowá “ibagari magumuchaditi” houn lubúeingu ha úaraguabaña (Luk. 10:25; 18:18). Ayanuhati Hesusu saragu wéiyaasu luagu füramasei le ani ligía aban hádangiñe ha láguyuguagüdabaña Heowá (Mat. 19:29; 22:31, 32; Luk. 18:30; Huan 11:25).

10. Ka larufudahabei águyuguni le adügǘbei lidan binadu dan? (Ariha huméi dibuhu).

¹⁰ Heowá íchugubalin ibagari ani gabafuti lun lagiribudagüdüni habagari hilaaña. Ruti ubafu lun Elíasi lun láguyuguagüdüni tiráü würi to hilaalibei tani weiriei to sarepütana (1 Uru. 17:21-23). Ani saragu dan lárigiñe, lau lídehan Bungiu, águyuguagüda lumuti profeta Eliséu tiráü würi Sunemüna (2 Uru. 4:18-20, 34-37). Arufudahati águyuguagüdüni burí le gabafu lan Heowá lun lagiribudagüdüni habagari gürigia ha óunwegubaña. Ani dan le meha ya lubéi Hesusu ubouagu, arihúati furangu ru lani lúguchi ligiaméme ubafu lun (Huan 11:23-25, 43, 44). Guentó anihein Hesusu sielu ani rúaali sun ubafu lun “sielu luma ubouagu”. Ligía gayara lubéi lagunfulirun füramasei luagu láguyuguagüdübaña lan sun hilaguaaña lun heresibiruni ibagari magumuchaditi (Mat. 28:18; Huan 5:25-29).

11. Ida liña ladügün lebegi esefuruni lun wawinwandun lun súnwandan?

¹¹ Ka uagu lígira Heowá lun lounwen Liráü le hínsiñebei lun, aban óunweni le hanarimeti? Ru lumuti Hesusu óunabagülei dan le lariñagubei: “Ladüga wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, [...] lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi” (Huan 3:16). Lau líchuguni Heowá Liráü kei lebegi esefuruni lun ferudunawa lan wafigoun, ru lumuti Bungiu chansi woun lun wibihin ibagari magumuchaditi (Mat. 20:28). Afuranguagüda lumuti apostolu Pábulu lisudinin fánreinti le luagu lisuuni Bungiu lau dimurei burí le: “Ítara kei lídangiñe lan aban wügüri liabin óunweni ubouagun, ítara giñe lídangiñe lan aban wügüri liabin hásaarun hilaaña. Ítara kei hóunwegun súngubei ladüga lúmagiñe lan Adán hayabin, ítara giñe gabagariya hamá súngubei [...] ladüga lánigu hamá Kristu” (1 Ko. 15:21, 22).

12. Ida luba lagunfuliruni Heowá lisuuni?

¹² Arufudahati Hesusu houn lani disipulugu lun hamuriahan lidan hafurieidun lun liabin Larúeihan Bungiu luma lun ladügǘniwa lugundan Lúguchi ya ubouagu (Mat. 6:9, 10). Aban lídangiñe lisuuni Bungiu lun hawinwandun gürigia lun súnwandan ya ubouagu. Írida lumuti Heowá Mesíasi le Lisaani lun larúeihan ani anihagua óundaragua 144.000 gürigia lun híderaguni Hesusu, lun gayara lan ladügǘniwa lugundan Heowá (Aruf. 5:9, 10).

13. Ka ladügübei Heowá lidan wadaani ani ka lunbei hadügüni?

¹³ Lidan wadaani, lóundaraguña Heowá “saragu gürigia” ha ítarabei hagaburi kei mudún ani larufudahaña houn lun hasubudiruni ida luba lan hawinwandun lábugiñe Larúeihan (Aruf. 7:9, 10; Sant. 2:8). Íbini fánreinguañu liña lan ubóu ladüga iyereehabúni luma burí saragu wuribu, lílana sétanu le áfaaguatiña lun hígiruni iyereehabúni. Lidan amu dimurei, hadaaguña awouhagülei tau hefeinte (Mik. 4:3). Lubaragiñe hageindagun lidan wuribu le anügübei óunweni, añaha íderaguaña gürigia lun hadariruni “ibagari magumuchaditi” lau harufudahan houn luagu Bungiu le inarüniti luma luagu lisuuni (1 Tim. 6:19). Kei hídehaña lubéi lun lawanserun Larúeihan Bungiu, másiñati híchuguña lan haduheñu lidere dan houn o hagagibudaguña lan luma maseinsuni, gama lumoun súnwandan ru lumuti Heowá le hemegeirubei houn (Mat. 6:25, 30-33; Luk. 18:29, 30). Chóurugüda lumuti sun katei le woun inarüni lan Larúeihan Bungiu ani lasigiruba lan agunfulirei le labusenrubei Heowá ladügün.

ABAN LUBUIDUN IBAGARI ÁMUÑEGÜ

14, 15. Ida luba lagunfulirun le füramasei lubéi Heowá lun lagünrinchaguni óunweni lun súnwandan?

¹⁴ Gumeseeli Hesusu Arúeiha sielu lidan Larúeihan Bungiu ani lagunfulirubei sun füramasei le ladügübei Heowá (2 Ko. 1:20). Lúmagiñe irumu 1914 larúeihaña Hesusu haganagua láganiñu (Sal. 110:1, 2). Yarafa madise Hesusu hama 144.000 hagañeirubei wuribu ani hagumuchuba hau gürigia wuribatiña (Aruf. 6:2).

¹⁵ Lídanme Arúeihani le lánina Milu Irumu, láguyuguagüdübaña Hesusu sun ha óunwegubaña ani líderagubaña sun gürigia ha gaganbadibaña lun, lun mafigounhaña lanme. Lárigiñe lagumuhóun óuchawaguni, sun gürigia ha ǘnabugubaña ligibugiñe Bungiu galagantehabei múa ani haganóuba giñe lidan lun súnwandan (Sal. 37:10, 11, 29). Ani “óunweni, ligíaba lagumuhóun ágani agünrinchawaguti” (1 Ko. 15:26). Maame lanarime wagundan!

16. Ka resun súdinitimabei wama lun weseriwidun lun Heowá?

¹⁶ Ítara kei warihini, tídangiñe Lererun Bungiu lébuna wemenigin lun wawinwandun lun súnwandan. Íderagua lumutiwa emenigini le lun úaragua wamá lun Heowá lidan lagumuhóun dan hénrenguti le. Ánheinti busén wabéi wagundaaragüdüni Heowá, mosu úaraguameme wamá lun luma lun Hesusu, mámarügü lun wibihini ibagari magumuchaditi, ladüga hínsiñe hamá woun tídangiñe sun wanigi (2 Ko. 5:14, 15). Ínchaha lumutiwa ínsiñeni le lun wasigiruni lani Hesusu hénpulu luma lun wayanuhan luagu wemenigin (Rom. 10:13-15). Dan le wáfaagun lun wígiruni wasaminarun wawouguarügü ani gíchigadi wagía, busentimabei Heowá lun lumadagu wamá lun súnwandan (Ebü. 13:16).

17. Ka lunbei wadügüni kada aban wádangiñe? (Matéu 7:13, 14).

¹⁷ Agía wagía? Wawinwanduba san lun súnwandan? Ru lumuti Heowá chansi woun, ligíati lunti lubéi wáfaagun lun wasigirun éibuga lidan üma le anügübei lidoun ibagari (aliiha huméi Matéu 7:13, 14). Ida luba san ibagari danme le wawinwandun lun súnwandan? Warihibei katei le lidan leweñegua aturiahani.