“Númabadibu lidan Paraísu”

1. Ka lariñagubei Hesusu murusun dan lubaragiñe lounwen lun aban hádangiñe gáfarahatiña ha lóubagiñebaña? (Lúkasi 23:39-43).

HESUSU úara hama bián gáfarahatiña ha lóubagiñebaña hasufuriruña meha ani hóunweguña meha murusun murusun (Luk. 23:32, 33). Bián meha wügüriña ha hadügüña meha bula lau Hesusu, ligíati, furanguti mama lan lani Hesusu disipulugu wügüriña ha (Mat. 27:44; Mar. 15:32). Gama lumoun, ábati lasansirun ligaburi aban hádangiñe. Aba lariñagun lun Hesusu: “Hesusu, haritaguabatia nuagu danme le lagumeserun barúeihan”. Lariñaga Hesusu lun: “Chóurugüda numuti bun uguñe: Númabadibu lidan Paraísu” (Luk. 23:43, TNM) (aliiha huméi Lúkasi 23:39-42). Úati meha ni kata le arufuduti anha lan meha gáfarahati ligía, lun uganu lánina “Larúeihan Bungiu le siélubei”, le lapurichihabei Hesusu lidan lani ministeriu. Mariñagunti Hesusu lebeluruba lan wügüri ligía lidoun Arúeihani le siélubei (Mat. 4:17). Layanuhaña meha Hesusu luagu Paraísu le lunbei ya lan ubouagu ámuñegü. Ida liña wasubudiruni?

2. Ka adügübei lun wasaminarun huríu lan meha wügüri gáfarahati le asakürihabei?

² Másiñati huríu lan gáfarahati le meha asakürihabei. “Aba ladeinhan [...] lun louba, lariñaga lun: Manufudetibu san luéi Bungiu, buguya le lábugiñebei ábanmeme súfuri luma?” (Luk. 23:40). Lúnrügüñein meha aban Bungiu háhuduragua huríu ánhañati amu néchanigu huduguatiña meha houn saragu búngiugu (Afu. 20:2, 3; 1 Ko. 8:5, 6). Lun hamuga mama hamá huríu gáfarahatiña hagía, ítara luba hamuga álügüdahani le: “Manufudetibun san ni murusun hawéi búngiugu?”. Lanwoun lira, “hóunrügüñein gürigia Ísüraelina ha féridihaña” lounahóua Hesusu, mama lun lapurichiha houn gürigia ha lílana amu néchani (Mat. 15:24). Ani subudigüda laali meha Bungiu houn ísüraelina láguyuguagüdübaña lan hilaaña. Másiñati subudi lan ariñahani le lun gáfarahati le meha asakürihabei, ani según dimurei le lariñagubei, arufudati gunfuranda lani láguyuguagüdübei lan Heowá Hesusu lun larúeihan lidan Larúeihan Bungiu. Kei le aubei warihei, hemenigiti wügüri le láguyuguagüdübei lan giñe Bungiu.

3. Ka funa san ñǘbuinbei lichügüwagu gáfarahati le asakürihabei dan le layanuhabei Hesusu luagu paraísu? (Agumesehani 2:15).

³ Anhein huríu lubéi meha wügüri gáfarahati ligía le asakürihabei, subudi lumuti meha luáguti paraísu, le meha líchugubei Heowá lun Adán tuma Ewa. Ligíati, másiñati samina lan, Paraísu lan le úagubei layanuhan Hesusu, ábanbei lan lubuidun fuluri-agei ya ubouagu (aliiha huméi Agumesehani 2:15).

4. Ka lunbei wasaminaruni luagu le lariñagubei Hesusu lun gáfarahati ligía?

⁴ Le lariñagubei Hesusu lun gáfarahati ligía lunti ladügün lun wasaminarun ida luba lan ibagari lidan Paraísu. Aban katei le gayaraabei líderaguniwa, waritaguni darangilaü le meha lídanbei larúeihan Salomón. Ariñagatu Bíbülia luagu Hesusu wéiriguti lan “sügǘ lau Salomón”. Ligía gayara lubéi wachoururuni ladügübei lan Hesusu ubóu le ábame lubuidun Paraísu úara hama ha lúnbaña harúeiha luma (Mat. 12:42). Kei lagurabúniwa, lunti hafurendeiruni “amu mudún” le lunbei hadügüni lun gayara lan hawinwandun lidan Paraísu lun súnwandan (Huan 10:16).

IDA LUBA IBAGARI LIDAN PARAÍSU?

5. Ida liña hadireiruni lidan hisaminan ibagari lidan paraísu?

⁵ Ida liña hadiraruni ibagari lidan Paraísu? Másiñati hasaminarun luagu aban lubuidun párüke, kei fuluri-agei Edén (Agu. 2:7-9). O másiñati haritaguni profesía le tídanbei liliburun Mikaíasi le ariñagubei hawagu lubúeingu Bungiu “gayaraabei hemeraagun lábugiñe tamuñadiri hanadürigu” (Mik. 4:3, 4). Ani másiñati aba lan liabin hichügüwagun bérusu le tídangiñebei Bíbülia le ariñagubei luagu ñeinbei lan saragu éigini (Sal. 72:16; Isa. 65:21, 22). Ligíati másiñati wadiraruni wachügüwagun aban lubuidun fuluri-agei lau aban dábula buin lau éigini burí semeeti. Diraguatün san hungua irimichei lubuidun líhemen burí fuluri luma nadü? Ani gayaraati san hasaminarun kamá hamuga le harihiñanu humadagu hama hiduheñu éheraha ásügüra aban lubuidun dan úara? Másiñati águyuguaaña lan fiu hádangiñe. Mámabei aban uénedü sun katei burí le, larihuba sun katei líbeina le ya ubouagu. Lau sun lira, ñeinbei wadagimanu lidan Paraísu le anügüti ugundani.

6. Kaba wadasin lidan Paraísu? (Ariha huméi dibuhu).

⁶ Adüga lumutiwa Heowá lau iyaraani lun wagundaarun lau wawadigimari (Apur. 2:24). Lidan Larúeihan Kristu le lánina Milu Irumu ñeinbei saragu wadagimanu lun ladügǘniwa. Ha lúnbaña hásügürün lídangiñe óunwenbu asufuriruni hama míñunu gürigia ha lúnbaña háguyugun; mégeibaña daüguaü, éigini luma aban fulasu lun hawinwandun. Gíbebei wadagimanu le lunbei ladügǘniwa, lau sun lira lanügüba saragu ugundani. Ítara kei lóunigiruni Adán tuma Ewa fuluri-agei Edén, gachansinbadiwa giñe lun wadügüni Ubóu le ábame Paraísu. Samina humá luagu ugundani le lunbei lanügüni warufudahan houn míñunu gürigia ha lúnbaña háguyugun ha meha lóuguabei hasubudin luagu Heowá luma luagu le labusenrunbei ladügün. Gayaraabei giñe wayanuhan houn lubúeingu Heowá ha úaraguabaña lun, ha meha óunwegubaña saragu dan lubaragiñe liabin Hesusu yahoun ubouagu.

7. Ka wachoururubei ani ka uagu?

⁷ Gayaraati wachoururuni ñeinbei lan darangilaü lidan Paraísu, ñeinbei giñe ugundani ani úabei chagaguaü ñein. Ka uagu? Ladüga yusu lani Heowá abahüdaguni lani larúeihan Salomón lun líderaguniwa arihei ida luba lan ibagari danme le Larúeihani Liráü Ubóu.

ADÜGATI LARÚEIHAN SALOMÓN LUN WARIHINI IDA LUBA LAN IBAGARI LIDAN PARAÍSU

8. Ida liña lagunfulirun dimurei le lídanbei Sálumu 37:10, 11 luma 29 lidan dan le sügühalibei? (Aliiha huméi fánreinti “Álügüdahani le hadügübei aliihatiña” le tídanbei garüdia to).

⁸ Ínchaha lumuti Heowá Dawidi lun labürühani ida luba lanme ibagari ámuñegü lidan larúeihan urúei le chútimabei aau ani úaragua ligía (aliiha huméi Sálumu 37:10, 11, 29). Dan le wayanuhan hama gürigia luagu Paraísu, liibe-agei dan aliiha wamuti Sálumu 37:11. Ani buiti lun wadügüni, lugundun yusu lumuti meha Hesusu bérusu le dan le líchugubei aban serumu luagu wübü. Ítara liña larufuduni lagunfuliruba lan dimurei burí le ámuñegü (Mat. 5:5). Arufuda lumuti giñe le labürüdübei urúei Dawidi ida luba lan ibagari lidan larúeihan Salomón. Lidan meha dan ligía, hawinwanduña meha ísüraelina lidan saragu darangilaü, lidan lubuidun ibagari, lidan meha “ageiraü le rísibei ani buidu ligía lun ábunaguni”. Ariñagaali meha Bungiu: “Anhein hadüga le lubeibei nilurudun [...] Níchuguba lubuidun dan hun hageira, harumuguba darangilu lugundun nesefurubei hageira hawéi animaalugu gáñitiña luma luéi wuribu” (Fad. 20:24; 26:3, 6). Gúnfuliti meha füramasei le dan le larúeihabei Salomón (1 Kro. 22:9; 29:26-28). Ani füramaseti Heowá úaaña lanme gürigia salufuritiña (Sal. 37:10). Lidan murusun dimurei, dimurei le lídanbei Sálumu 37:10, 11 luma 29 gúnfuliti lidan dan le sügühalibei ani lagunfuliruba giñe ámuñegü.

9. Ka tariñagubei lurúeite Saba luagu larúeihan Salomón?

⁹ Chülüti ariñahani luagu lubuidun habagari ísüraelina lábugiñe larúeihan Salomón tarigeirugu lurúeite Saba. Adügatu aban limigifen wéiyaasu darí Herusalén lun tarihini sun katei le lau tagu (1 Uru. 10:1). Lárigiñe tarihini tungua ida liña lan katei lábugiñe larúeihan Salomón, aba tariñagun lun urúei: “Mariñawagúnti ni lamidan nun. [...] Mosu weiri lan hagundan búmarigu, óunwenbu funa giñe hagundan ha eseriwidubaña bun, luagu bubaduñanu lan súnwandan, aganbahei lichú lau bererun!” (1 Uru. 10:6-8). Lubuidun ibagari le meha hawinwandubei gürigia lábugiñe larúeihan Salomón ábarügü meha hénpulu lira, wéiritimabei le lunbei ladügüni Heowá lidan sun Ubóu lábugiñe Larúeihan Hesusu le Lisaani.

10. Ka uagu íñutima lubéi Hesusu luéi Salomón?

¹⁰ Wéirigutimati Hesusu luéi Salomón lidan sun katei. Aban meha wügüri charati Salomón ani adügati meha charati wéinamuti ani lau lásügürün dan barüti meha katei le saragu wuribani houn lumutuniña Bungiu. Ánheinti Hesusu aban urúei le mafigounti ani macharati (Luk. 1:32; Ebü. 4:14, 15). Méiguadunti tidoun ni aban tídangiñe sádara to lesetihabou Satanási lubá. Arufuda laali Kristu mafigoun habéi lan ani madügünbei lan ni kata le gayaraabei ladügün wuribani houn gürigia úaraguatiña ha lídanbaña Larúeihan Bungiu. Ma barüti katei le saragu ugundani woun wasubudiruni ligía lan warúeitebei?

11. Kátaña lúnbaña híderaguni Hesusu?

¹¹ Híderagubei 144.000 urúeigu Hesusu lun hóunigiruniña gürigia ani lun hagunfuliruni le labusenrunbei Heowá lun ubóu (Aruf. 14:1-3). Sügǘ hañame urúeigu ha lídangiñe saragu lénrengunga le yaabei ubouagu kei wügüriña hama würiña. Ligía gunfuranda habadiwa lubéi buidu. Kábati amu katei hadüga?

KABA HADÜGA KRISTIÁNUGU ANUADIRÚAAÑA ÁMUÑEGÜ?

12. Kaba dasi líchiga Heowá houn 144.000?

¹² Gíbebei wadagimanu le lunbei ladügüni Hesusu úara hama 144.000 sügǘ meha lau le ladügübei Salomón. Urúei le, arihati meha hau saragu míñunu gürigia lídanrügü aban ageiraü. Ánhañati ha lúnbaña harúeiha lidan Larúeihan Bungiu harihuba hau saragu milu míñunu gürigia lidan sun ubóu. Ma lanarime dasi móubawati le líchugubei Heowá houn 144.000 kristiánugu anuadirúaaña ha!

13. Kaba dasi espechaliti hadüga ha lúnbaña harúeihan luma Hesusu?

¹³ Ítara kei Hesusu, 144.000 kristiánugu ha, urúeigubaña ani fádirigubaña giñe (Aruf. 5:10). Lábugiñe Lilurudun Moisesi, dasi le súdinitimabei le ichugúbei houn fádirigu, hóunigiruni dandu hátuadi lumutuniña Heowá kei hamadagua luma. Kei “Liyawadirügüñein meha burí katei buiti le meha lunbei” liabin túteme lúrudu, chóurugüda lumuti katei le woun ha lan lúnbaña harúeihan luma Hesusu hadügüba lan aban dasi espechaliti: hetenirun lun hóunigiruni hátuadi lumutuniña Heowá luma hamadagua luma (Ebü. 10:1). Ibidiñegili woun ida luba lan hayanuhan urúeigu ha o fádirigu ha hama lílana Arúeihani ha lúnbaña hawinwandun ya ubouagu. Meberesenga ida luba lan laranseruni Heowá sun katei, gayaraati wachoururuni ha lan lúnbaña hawinwandun ya ubouagu lidan Paraísu, hibihubei lan adundehani le hemegeirubei (Aruf. 21:3, 4).

KA LUNBEI HADÜGÜNI “AMU MUDÚN” LUN GAYARA LAN HAWINWANDUN LIDAN PARAÍSU?

14. Ka hánibei “amu mudún” hama mudún míbetiña?

¹⁴ Ariñagati Hesusu hawagu gürigia ha lúnbaña harúeihan luma luagu “mibe hamá” (Luk. 12:32). Ayanuhati giñe luagu aban libiaman sétanu, le unbei lagúara “amu mudún”. Bián sétanu le lídanñanu aban fárüga (Huan 10:16). Nadagimein hali bián sétanu le úara, ani hasigirubei adügei darime paraísuhali ubóu. Lídanme dan ligía, sielu hañame kristiánugu anuadirúaaña ani ha lílana “amu mudún” hemenigibaña lun hawinwandun ya ubouagu lun súnwandan. Gama lumoun anihein ítaga katei le lunbei hadügüni “amu mudún” guentó lun gayara lan hawinwandun lidan Paraísu.

15. a) Ida liña híderaguniña “amu mudún” líbirigu Kristu? b) Ida luba gayara lan hasigiruni lani íbiri le hénpulu harihubei tidan iyawaü?

¹⁵ Machansinti meha gáfarahati le asakürihabei lun larufuduni leteingiradi luagu le ladügübei Hesusu luagu. Ánheinti ha lílana “amu mudún” anihein saragu chansi wama lun warufuduni weteingiradi luagu le ladügübei Hesusu wawagu. Kei hénpulu, arufuda wamuti hínsiñe lan Hesusu woun lau ligaburi wóuseruniña líbirigu ha kristiánugu ha anuadirúaaña. Ariñagati Hesusu leseriwiduba lan le wadügübei, kei ébunaü lun larihíniwa kátaña lan ha ítarabaña kei mudún (Mat. 25:31-40). Aban katei le gayaraabei wadügüni lun warufuduni wíderaguñanu lan líbirigu Kristu, lau wapurichihan lau ubebeni lidan dasi le lánina hadügǘn disipulugu (Mat. 28:18-20). Ligíati, busentiwa wayusurunu tulu to lánina taturiahóun Bíbülia to híchuguboun woun, kei burí líburu Winwan humá lau ugundani. Anhein magumeserungidün lubéi íchiga aturiahani tídangiñe Bíbülia houn gürigia, ka uagu máfaagun hubéi lun háluaha gürigia lun híchugun aturiahani houn?

16. Ka gayaraabei wadügüni lúmagiñe guentó lun waranserun lubá wawinwandun lidan paraísu?

¹⁶ Mama mosu wagurabahan wawinwandun lidan Paraísu lun aban wamá gürigia ha labusenrubaña Heowá ñein. Lúmagiñe guentó gayaraati wáfaagun lun haruma lan wagaburi dandu lidan le wariñagubei kei lidan le wadügübei, luma lau wanügün aban ibagari le aubei lagundaara Heowá. Mosu giñe úaragua wamá lun Heowá, hama houn wábirigu; aban wügüri lunti úaragua lan tun lani weiriou, ánhounti würi lun tani weiriei. Anhein wadügüñein lubéi sun wayaraati lun gaganbadi wamá lun lilurudun Bungiu íbini wawinwanduña lan lidan luriban ubóu le, ménrenguntimabei woun wadügüni danme lídanhadiwa Paraísu. Gayaraati giñe wabuiduragüdüni wagaburi luma iyaraani le wawagubei le arufudubalin luagu aranseñu waña lan lun wawinwandun ñein, kei le iridúbei lidan aturiahani le “Aranseedün san lun heresibiruni ‘múa keisi halagante’?” le tídanbei garüdia to.

17. Ka uagu moun lubéi wígirun lun lábürühan warüna ladüga wíchugun duru wawougua luagu figóu le adüga wamaalibei lidan dan le sügühalibei?

¹⁷ Mosu giñe wáfaagun lun míchugun wamá duru wawougua luagu figóu wéinamuti le adüga wamaalibei. Lau wariñaguni le, mabusenrúntiwa warihini lebegi asalbaruni kei aban üma lun wafigouhan “lau wagundan” (Ebü. 10:26-31). Gama lumoun, anhein asakürihaadiwa lubéi tídangiñe sun wanigi lídangiñe figóu wéiriti le adüga wamaalibei, ani áluahaadiwa ídemuei luma Heowá luma hama wéiyaaña lidan afiñeni, ani sansi wamaali wagaburi, gayaraati wachoururuni feruduna laadiwa lan Wabungiute le mánginbei lun líchugun ferudun (Isa. 55:7; Adü. 3:19). Haritagua huméi le lariñagubei Hesusu houn fariséugu: “Mama niábiña áluahaña ha richabaña […] niábiña áluahaña gafigountiña” (Mat. 9:13). Ligíati, sun wafigoun gayaraati ferudunawa lan seremei lebegi esefuruni.

GAYARAATI HAWINWANDUN LUN SÚNWANDAN LIDAN PARAÍSU

18. Kaba uagu habusenra hayanuhan luma gáfarahati le óunwebei lóubagiñe Hesusu?

¹⁸ Samina humá lídanñadün lan Paraísu ayanuha luma gáfarahati le meha ayanuhabei luma Hesusu. Chóuruti hayanuhaña lan hamuga huguya biángubei lau eteingiruni le hasandirubei luagu lani Kristu sákürifisiu. Háfuga hamuriaha luma lun labahüdahani hun ida liña lan lagumuhóun minutu le laubei Hesusu ya ubouagu ani ida liña lan lasandiragun lungua lau óunabagülei le líchugubei Hesusu lun, luáguti le hamuriahabei luma. Luagu le aban oubaü, gayaraati lálügüdünün wügüri gáfarahati ligía ida liña lan meha ibagari lidan lagumuhóun dan lidan ubóu le lábugiñebei lubafu Satanási. Maame lubuidun larufudahóun le tariñagubei Lererun Bungiu houn gürigia kei wügüri le! (Efe. 4:22-24).

19. Ka uagu gúndaabei lubéi wabagari lidan paraísu? (Ariha huméi dibuhu le luágubei tidáü garüdia).

¹⁹ Buídubei ibagari lidan Paraísu ani gúndaabadiwa súnwandan. Ñéinbaña gürigia ha úmabaña gayara lan wayanuhan luma wadagimanu le adügǘbei lun wasandiragun woungua buidu. Ani le buídutimabei eibu lanme lásügürün dan wasigiruba asubudirei Wáguchi le siélubei buidu ani wagundaaruba lau idewesei le lunbei líchuguni woun. Súnwandan wafurendeiruba katei iseri luagu luma luagu le ladügübei. Éibutima lásügürün dan, laganwounduba ínsiñeni le wasandirubei luagu Wabungiute weyu luagu weyu. Ma lanarime weteingiruni Heowá luma Hesusu luagu le füramasei habéi woun luagu ibagari magumuchaditi lidan Paraísu!