Buídugüda waméi ligaburi wafurieidun

1. Ka labusenrubei Heowá lun wadügüni? (Ariha humóun giñe iyawaü).

KABA umoun woudin dan le megei wamá dǘgüdaguaü luma adundehani? Furanguti óunabagülei le woun. Gayaraati wafurieidun lun Heowá. Agunbiraha lumutiwa lun wadügüni. Ani subudi wamuti busén lan lun gabügürügua lan wafurieidun lun lugundun ariñagati woun: “Afurieida humá lun Bungiu sun dan” (1 Tesa. 5:17). Gayaraati wafurieidun lun lau afiñeni lun wamuriahan adundehani luma lidan sun le wadügübei lidan wabagari (Ari. 3:5, 6). Kei gíchigadi lubéi Heowá, ariñagati gayara lan wafurieidun lun saragu wéiyaasu; gayaraati wadügüni súnwandan.

2. Kaba wariha lidan aturiahani le?

² Furíei, ligía ábanbei lídangiñe idewesei le wéiribei lebegi woun. Íbini ítara, kei weiri lubéi beresegu wamá, anihein dan hénrengu lan woun wasagarun dan lun wayanuhan luma Heowá. Luéigiñe le aban oubaü, háfuga saminatiwa mosu lan wabuiduragüdüni ligaburi wafurieidun. Lun wibihini katei le, gayaraati líderaguniwa adundehani le tídanbei Lererun Bungiu. Lidan aturiahani le warihubei lani Hesusu hénpulu. Ani wafurendeiruba ida luba lan wasagarun dan lun wafurieidun. Warihubei giñe ida luba lan wabuiduragüdüni wafurieidun ánhawa írida seingü katei súdiniti lidan.

SAGATI HESUSU DAN LUN LAFURIEIDUN

3. Ka meha lasubudirubei Hesusu luagu furíei?

³ Subudi lumuti meha Hesusu súdini lan furíei lun Heowá. Saragu dan lubaragiñe liabin Hesusu ubouagun, ariha lumuti ida liña lan lóunabuni Lúguchi hafurieidun lubúeingu. Kei hénpulu, ñeinñein meha Hesusu dan le lóunabunbalin Heowá tafurieidun Ana, Dawidi, Elíasi luma hafurieidun saragu amu lubúeingu (1 Sam. 1:10, 11, 20; 1 Uru. 19:4-6; Sal. 32:5). Ligía lariñagunbei Hesusu houn lani disipulugu lun hafurieidun súnwandan ani lau afiñeni! (Mat. 7:7-11).   

4. Ka hénpulu buiti líchugubei Hesusu woun?

⁴ Lau burí furíei le ladügübei Hesusu lun Heowá, ruti meha aban buiti hénpulu houn lani disipulugu lun hafalaruni. Sun meha dan le laubei Hesusu agunfulira lau lani ministeriu ubouagu, gabügürüguati meha lafurieidun. Mosu meha lasagarun dan lun lafurieidun ladüga wéiriti meha beresegu lan ani añahein meha saragu gürigia geyegu lau (Mar. 6:31, 45, 46). Saragiaheiti meha lun gadaani lan lun lafurieidun lun Lúguchi (Mar. 1:35). Luagu aban dan, furíeiti sun áriebu lubaragiñe lanúadirun ladügǘn aban katei súdiniti (Luk. 6:12, 13). Guñoun le lubaragiñebei lounwen Hesusu, furíeiti lun Heowá gabügürügua ladüga meha subudi lani lasusereda lan katei le hénrengutimabei lidan lani ministeriu ubouagu (Mat. 26:39, 42, 44).

5. Ida luba wáyeihani Hesusu dan le wafurieidun?

⁵ Arufudati lani Hesusu hénpulu woun meberesenga lan liibe waberesegun, mosu lan wasagarun dan lun wafurieidun lun Heowá. Ítara kei Hesusu, másiñati mosu lan wadireirun dan lun wafurieidun: háfuga gayara lan saragia wamá o warumugun leti lun wafurieidun lun Heowá, ítara, warufudubei lun weiri lan lebegi idewesei súdiniti le woun. Haritagua tágili aban íbiri gíritu Lynne weiri lan teteingiruni Bungiu dan le tafurendeirunbei gayara lan tayanuhan luma lidan furíei. Abahüdahatu: “Dan le nasubudirúnbalin aranseñu liña lan lun laganbunina furumiñeguarügü oura, aba nagumeserun arihei keisi aban besi numada ani áfaaguatina lun nabuiduragüdüni ligaburi nafurieidun”. Chóuruti ítara liña lan hasandiragun saragu wádangiñe houngua. Guentó, ariha wamá seingü katei súdiniti le gayaraabei wíriduni lidan wafurieidun.

SEINGÜ KATEI SÚDINITI LE GAYARAABEI WÍRIDUNI LIDAN WAFURIEIDUN

6. Según Arufudúni 4:10, 11, ka ladünabei Heowá lun leresibiruni?

⁶ Alawaha waméi Heowá. Lidan aban lanarime arufudúni, arihati apostolu Huan 24 wéiyaaña áhuduragua lun Heowá sielu. Aba halawahani ani subudi hamuti ligíarügüñein lan garicha lun leresibiruni sun “uéiriguni, inebesei, luma ubafu” (aliiha huméi Arufudúni 4:10, 11). Anihein giñe saragu resun hama ánheligu lun halawahani luma lun híchugun uéiriguni lun Heowá. Lúmañanu sielu ani subudi hamuti buidu buidu. Ariha hamuti ligaburi lau le ladügübei ani alawaha hamuti dan le harihini nadagimein (Hob. 38:4-7).

7. Ida liña walawahani Heowá lidan wafurieidun?

⁷ Alawaha wamuti giñe Heowá dan le wayanuhan luma. Adüga wamuti dan le wariñaguni lun ka lan hínsiñebei woun luagu ani ka lan uagu garíaguadi wabéi lun le ladügübei. Dan le waliihanu luma waturiahanu Bíbülia, áfaagua wamá lun wáyeihani ligaburi Heowá le hínsiñetimabei woun (Hob. 37:23; Rom. 11:33). Lárigiñe, abahüdaha waméi lun Heowá ida liña lan wasandiragun woungua dan le wararamagun asaminara luagu lubuidun ligaburi. Gayaraati giñe walawahani Heowá dan le líderagun kada aban wádangiñe o dan le giñe líderaguniña sun wábirigu. Súnwandan letenirun woun ani góunigi lumutiwa (1 Sam. 1:27; 2:1, 2).

8. Ka burí katei uágubei gayara lan wíchugun seremei lun Heowá? (1 Tesalónikana 5:18).

⁸ Ru wamá seremei lun Heowá. Anihein saragu resun wama lun wíchugun seremei lun Heowá (aliiha huméi 1 Tesalónikana 5:18). Ru wamá seremei lun luagu sun katei buiti le wámabei; ladüga sun idewesei le buídubei lúmagiñe Heowá liabin (Sant. 1:17). Kei hénpulu, gayaraati wariñagun lun Heowá weiri lan weteingiruni luagu lubuidun Ubóu le ñein wabéi, luagu sun katei buíduburiti le adüga láalibei, luagu wabagari, hawagu waduheñu, hawagu wamadagu luma luagu wemenigin. Ani busentiwa giñe weteingiruni Heowá ladüga gayara lan gamadagua wamá luma.

9. Ka uagu hénrengu lubéi lun geteingiradi wamá?

⁹ Másiñati lunti lan wadügün aban áfaaguni espechaliti lun wasaminarun buidu ka lan uagu lunti lubéi leteingiruni kada aban wádangiñe Heowá. Wawinwanduña lidan aban ubóu le buinbei lau meteingiradi. Wéiriti hetenirun gürigia lun hibihini le habusenrubei mama lun híchugun seremei luagu le hámabei. Ánhawa afalarei igaburi le, buin luba wafurieidun láurügü le wamuriahabei woungua. Lun masuseredun lan katei le woun, mosu wáfaagun lun geteingiradi wamá luma lun wasigirun eteingirei Heowá luagu sun katei le líchugubei woun (Luk. 6:45).

10. Ida liña líderagunu geteingiradi aban íbiri lun tawandun? (Ariha humóun giñe iyawaü).

¹⁰ Gayaraati líderaguniwa geteingiradi wamá lun wagagibudagun luma turobuli. Ariha waméi tikesin aban íbiri gíritu Kyung-sook, le áfuachubei tidan Garüdia Awisahatu to lánina 15 lidan eneru, irumu 2015. Dariwati kánserü le awanseeli lidan tani pulmón. Ariñagatu: “Bulesei lumutu nanigi nasubudiruni luagu sándiñadina lan. Sanditina kamá hamuga féridinaali sun númati ani aba nasandirun aban lanarime anufudei”. Ka íderagubarun íbiri to lun tubaruaguóun tan? Ariñagatu sagü lan guñoun lubaragiñe tarumugun aba lan tamudeirun iñu tun tuban lun tafurieidun lun Heowá lau umalali héreti lun teteingiruni luagu seingü katei buiti le asuseredubei tun weyu ligía. Adügati katei le lun darangilu tan ani ínchaha lumutu lun tariñaguni lun Heowá weiri lan línsiñe tun. Ariha tumuti lau katei le tásügürübei ida liña lan líchugun Heowá iderebugu houn lubúeingu ha úaragubaña dan le hásügürün lídangiñe lénrengunga ani aba tíchugun fe gíbetima lan abiniruni lidan tibagari sügǘ lau lénrengunga. Ítara kei Kyung-sook, anihein giñe saragu resun wama lun weteingiruni Heowá, íbini dan le wásügürüña lan lídangiñe turobuli. Íderagua lumutiwa wíchugun seremei lun Heowá lun wawandun ani ruti giñe darangilaü woun.

11. Ka uagu megei habéi meha lánigu Hesusu disipulu ganigi lárigiñebei lagiribudun sielun?

¹¹ Amuriaha wamá ganigi luma Heowá lun wapurichihan. Murusun dan lubaragiñe lagiribudun Hesusu sielun haritaguagüda lumutiña lani disipulugu mosu lan hapurichihan luagu “dandu Herusalén kei sun lóubawagu Hudéa, Samaria, chülǘ lumoun lidise-agei fulasu ubouagu” (Adü. 1:8; Luk. 24:46-48). Murusun dan lárigiñe, aba hárügüdüniña tábutigu haligilisin huríu apostolu Féduru luma Huan ani aba hanügüniña ligibugiñoun Liñun-agei lúrudu huríu. Ábati híchugun gumadimatiña gumadi houn lun mapurichihan hamá ñein ani siadi hamutiña háfaragubaña lan hilagubei ánhaña asigira apurichiha (Adü. 4:18, 21). Ka ladügübei Féduru luma Huan?

12. Según Adügaü 4:29, 31, ka hadügübei disipulugu?

¹² Aba lóunabuniña Féduru luma Huan alidihatiña huríu hagía, hariñaga houn: “Samina humá hungua anhein richá lubéi ligibugiñe Bungiu lun ladügǘn le hubeibei, ígira le lubeibei Bungiu. Wagía, siñati wámanichun lau katei le ariha wamaalibei luma le aganba wamaalibei” (Adü. 4:19, 20). Dan le hígiragüdünbaliña tábutigu haligilisin huríu Féduru luma Huan hama ha híbiri disipulugu, aba hafurieidun úara lun hamuriahan luma Heowá lun líderaguniña lun hasigirun adügei lugundan. Hariñaga: “Ruba anigi woun, wagía le bubueingu, lun wadimurehan buagu manufudeuga”. Óunaba lumuti Heowá lubuidun furíei ligía (aliiha huméi Adügaü 4:29, 31).

13. Ka gayaraabei wafurendeiruni lúmagiñe Jin-hyuk?

¹³ Gayaraati wasigiruni hani disipulugu hagüra hénpulu lun wasigirun apurichiha íbini dan le maha hamá gumadimatiña lun wadügüni. Ligía ladügübei Jin-hyuk, aban íbiri le adaürǘbei ladüga lafiñen. Dan le furisunruguñein lubéi, aba híchuguni lun letenirun houn fiu adaürǘtiña ha tídanbaña amu furisun dise hawéi ha híbiri adaürǘtiña. Gayaraati meha layarafadun houn lúnrügü lasubudiruni ka lan hemegeirubei. Ani migirúnti meha lun layanuhan houn luagu amu katei ni luagu le tariñagubei Bíbülia. Gama lumoun, aba lafurieidun lun Heowá amuriaha luma lun líchugun ganigi luma lichú aau lun lun meferidirun lani furumiñeguarügü chansi le ladarirun (Adü. 5:29). Ariñagati: “Óunaba lumuti Heowá nafurieidun ani ru lumuti lichú aau luma ganigi le nemegeirubei nun. Gumesetina íchiga saragu aturiahani tídangiñe Bíbülia le adurarubei seingü minutu kada aban lidan burí tubenari furisun. Gúñounti, aba meha nabürühan gárada lun níchugunu houn adaürǘtiña larugan”. Ítara kei Jin-hyuk, afiñetiwa luagu líderagubadiwa lan Heowá agunfulirei wani ministeriu, ani gayaraati wamuriahan lichú aau luma ganigi luma.

14. Kaba íderaguaün lun hagagibudagun luma burí turobuli? (Sálumu 37:3, 5).

¹⁴ Amuriaha wamá ídemuei luma Heowá lun wagagibudagun luma turobuli. Saragu wádangiñe wasufuriruña ladüga katei kéiburi weferidirun somu waduhe lidan óunweni, weibaahóun, wagagibudagun luma burí turobuli, lénrengunga, luma burí turobuli hama iduheñu. Ani adügaali sandi galugurahati luma wuribu lúntima laganwoundun turobuli burí le. Ligíati, dará humóun hanigi sunsuinagubei lun Heowá danme le hafurieidun lun. Ayanuha humá luma ítara kei hayanuhan luma aban besi humada. Gayaraati hachoururuni líderagubadün lan Heowá (aliiha huméi Sálumu 37:3, 5).

15. Ida liña líderaguniwa furíei dan le gaturobulin wamá? Ru humá aban hénpulu.

¹⁵ Líderagubadiwa wafurieidun súnwandan danme le wagagibudagun luma turobuli (Rom. 12:12). Subudi lumuti Heowá sun le hásügürübei lubúeingu ani aganba lumutiña “ha agúahabaña luagu” amuriaha ídemuei (Sal. 145:18, 19). Ariha tumuti Kristie katei le tungua, aban prekursora 29 irumu tau. Sódini, aba tagumeserun asandira. Adügati katei lira lun ladagarun sandi le lánina lueirin íruni tuagu. Dan lárigiñe, aba ladarirún aban sandi máraninati tuagu túguchu. Ariñagatu Kristie: “Aba nafurieidun lun Heowá tídangiñe sun nanigi lun líchugun erei nun lun nubaruaguóun nan sagü weyu. Áfaaguatina lun nederebudagüdüni numadagua luma: súnwandan nidin adamuridagua ani ábatima naturiahan nábugua”. Ariñagayatu: “Ágüdaha lumutina furíei lidan dan le nemegeirunbalin. Ruti saragu dǘgüdaguaü nun láurügü nasubudiruni anihein lan Heowá yarafa nun. Íbini móuchaadagun nan lau lóufudagun, óunaba lumuti Heowá nafurieidun ani ruti darangilaü nun”. Mabulieida waméi salba lumutiña lan “Bungiu ha deregeguabaña houngua lun luéi óuchawaguni” (2 Fe. 2:9).

16. Ka uagu megei wabalin lídehan Heowá lun wawanduni lénrengunga?

¹⁶ Amuriaha wamá luma Heowá lun líchugun erei woun lun wawanduni lénrengunga. Kei gafigoun wabéi, mosu wáfaagun súnwandan lun méiguadun wamá lidoun ladügǘn katei wuribati. Lugundun adüga lumuti Satanási sun liyaraati lúntima hénrengu lan woun wadügüni le buídubei. Áfaaguati lun lagadeiruni ligaburi wasaminan lau burí isebáhari le wuribati. Ani adügati isebáhari burí le lun wabuinchun lau saminaü wíyeti luma lun wiye wamá ligibugiñe Heowá, gayaraati giñe ladügün katei le lun wadügün figóu wéiriti (Mar. 7:21-23; Sant. 1:14, 15).

17. Amu luéi furíei, ka gayaraabei wadügüni lun wawanduni lénrengunga? (Ariha humóun giñe iyawaü).

¹⁷ Siñati wagagibudagun luma lénrengunga wábugua; mégeitiwa lun líderaguniwa Heowá. Lidan furíei le larufudahabei Hesusu houn lani disipulugu, amuriahati aban katei: “Mígira bawa lun wábürühan lidoun óuchawaguni, dísegüdarügü bawa luéi” (Mat. 6:13). Busenti Heowá líderaguniwa, gama lumoun mosu wamuriahani ídemuei ligía luma. Úati buídurügü lan wafurieidun, mosu giñe wadügüni sun wayaraati lun wadisedun luéi saminaü wuribati le kamanibei lidan ubóu le lábugiñebei lubafu Satanási (Sal. 97:10). Lun wóunigiruni wasaminan luma lun wabuinchagüdüni lau saminaü buiti, mosu waliihanu luma waturiahanu Bíbülia, woudin adamuridagua, ñüdün wagíame apurichiha. Füramaseti Heowá woun mígirunbei lan lun wóuchawagun lóugiñe le wayaraabei awanda (1 Ko. 10:12, 13).

18. Según le akutiha wamaalibei luagu furíei, ka lunbei wadügüni sun wagía?

¹⁸ Lun úaragua wamá lun Heowá lidan lagumuhóun dan hénrenguti le, mosu wéiritima lan wafurieidun lun uguñe weyu sügǘ lau lidan amu dan. Busenti Heowá lun wafurieidun lun ‘lau sun wemenigin’ (Sal. 62:8). Ligíati, sagá humá dan lun hafurieidun lun Heowá tídangiñe sun hanigi sagü weyu. Alawaha huméi Heowá ani ru humá seremei lun luagu sun le ladügübei. Amuriaha humá ganigi luma lun hapurichihan luma lun líchugun erei hun lun hagagibudagun luma turobuli luma lun mábürühan humá lidoun óuchawaguni le ñǘbuinti. Mígira humá lun ñein lan somu katei le eberesehatün luéi hafurieidun lun Heowá. Ida liñati lóunabuni Heowá hafurieidun? Wayanuhaba luagu katei súdiniti le lidan leweñegua aturiahani.